Zirlai hmeichhia te be nawmnah a puh Associate Professor Pankaj Roy lakah lungawiloin Mizoram Chakma Student Union leh Central Chakma Mahila Samiti te chuan Govt. Kamalanagar College Principal hnenah complaint an theh lut.

 

September 23, 2025: Vawiin khan Mizoram Chakma Student Union leh Central Chakma Mahila Samiti te chuan Govt. Kamalanagar College, a Associate Professor Pankaj Roy chuan zirlai hmeichhia pali te mipat hmeichhiatna lam rawngkaiin a be thin tia puhin MCSU leh Central CMS te College kawtah an pungkhawm a, Govt. Kamalanagar College Principal chu a office-ah hmuin he thil hi an ngaizam mai mai dawn lova, chak taka chhui chiang a, a theih ang anga hmalain hremna pawh hmu ngei se an duh thu an sawi.

 

Mizoram Chakma Student Union leh Central Chakma Mahila Samiti te chuan, Dan ang takin Internal Complaints Committee (ICC) in chhui chiang se an duh a, a tuartu zirlai hmeichhe pali te hian an zirna kawngah harsatna engmah tawk zui lo se an duh thu an thlen bawk. Tin, pawikhawihtu a puh Associate Professor Pankaj Roy hian thiam loh a chang anih chuan zirlai dangin hetiang harsatna an tawh zel lohna turin dan anga hrem ngei nise, chhui chian  a nih hma chuan Associate Professor Pankaj Roy hi College ah kal chhunzawm rih lo turin an duh thu an sawi bawk.

 

Mizoram Chakma Student Union President, Pu Parbesh Chakma chuan Zirlai harsatna tawk mek pali te bulah kan ding reng a, an dikna chanvo an hmuh theih nan theihtawp kan chhuah dawn a ni a ti. He thil thleng avang hian Zirlaite himna turin chak taka hmalak a tul tih a sawi a, investigation kal lai a nih avangin thuneitu ten thutlukna dik tak siama a mawhphurtu hian hremna hmu ngei se an duh thu an sawi a ni.

 Joint NGO Chawngte chuan Mizoram sawrkar leh Health Minister hnenah lawmthu an sawi.

Chawngte September 3, 2025: Chawngte tlawmngai pawl inzawmkhawm Joint NGO Chawngte chuan vawiin khan thuchhuah siamin Chawngte mipui mamawh Mizoram Sorkara an thlente ngawihpawimawh saka tihhlawhlin a nih avangin Mizoram Sorkar leh a changtu Health Minister Pi Lalrinpuii hnenah lawmthu sawiin thuchhuah an siam.

An thuchhuaha lan danin, Community Health Centre, Chawngte a thawktu (Staff) indaihlohna leh hmanrua (Facilities/Equipment’s) awm ṭhat loh chungchânga May ni 8, 2024 khân a changtu Minister Pi Lalrinpuii chu a Pisa ah hmuin Chawngte mipui ten an mamawh hrang hrang te ziakin an lo thlen tawh a. Health Minister Pi Lalrinpuii chuan an ngennate ngaihpawimawh a, a hlawhtlinna an hmu chho mêk zêl a, ṭhangkhat lian zet Ambulance chhiat avanga harsatna tawk thin chu vawiin September 3, 2025 ah ‘AMBULANCE FLAG OFF’ Programme hman a lo ni thei ta hi Chawngte mipui tân hun ropui leh chhinchhiahtlâk tak a ni an ti. Community Health Centre, Chawngte hmasâwnna tûra theihtâwp min chhuahsaktu Health Minister Pi Lalrinpuii, chungah Chawngte mipui aiawhin Joint NGO Chawngte chuan lâwmthu an sawi a, Tin, Chawngte hmasâwnna tûra khawtlâng mamawh hrang hrang Sawrkâra kan thlen tawh te , Sawrkârin engemawzât min tihhlawhtlin sak tawh avângin lâwmthu an sawi bawk a, Community Health Centre, Chawngte a kan mamawh hrang hrang kan thlen te zing a mi; Ultrasound leh Khâwl dangte pawh kan dawng thuai dawn tih thu kan hria hi a thlamuanthlâk kan ti hle bawk a ni tiin thuchhuah an siam a ni.

India ram zalenna ni Chawngteah urhsun taka lawmna hun hman a ni.

August 15, 2025: India ram zalenna ni (India Independence day) lawmna hun urhsun takin Chawngteah hman a ni a, Chawngte Civil SDO Pu Lalnunpuia Renthlei chu khuallian niin hnam puanzar a pawtpharh a, College NCC, School NCC te nen Contingent 18 ten hnam puanzar chibai buk a chhang let a ni.

 

Khuallian Pu Lalnunpuia Renthlei chuan, Sawrkar laipui hmalakna leh khawtlang hmasawnna hrang hrang te sawiin, Chawngte RD Block huamchhungah PMAY-G hmangin chhungkaw 2748 te insak tanpuina pek an ni tawh a, chhungkaw 2020 te tan hmalak mek a ni bawk. Mizoram State Rural Livelihoods Mission hmangin hmeichhia te chawikanna turin kum 2024-2025 chhung khan Self Help Group 77 din belhin tunah hian SHG 822 an awm mek a, SHG 41 te hnenah Loan Rs. 76.50 lakh pek an ni tawh bawk. Thingtlang mite inhlawhna MGNREGA hmangin inhlawhna kalpui mek zel a ni a, kut hnathawktu ten an chhawr tangkai hle a ni a ti.

 

Thingtlang miten tui thianghlim in tur an hmun theih nana hmalakna pawh hlawhtling taka kalpui a ni a, Chawngte Rural Drinking Water Supply Scheme NABARD sum Rs.9,00,00,000.00 (Rupees nine Crore) hmanga siam pawm April ni 8, 2025 khan Chief Engineer, PHED Er. Ngentluanga’n a hawng a ni. Nikum may thla atanga khan CHC Chawngteah Golden Card hmanga damlo enkawl theihte chuan a thlawnin enkawl an ni a, Ultra sound khawl leh Ambulance neih tuma hmalak mek a nih thu a sawi bawk.

 

Vawiina Independence Day lawmna inkhawm Chawngte ‘C’ football ground a neihah hian CADC hotu te leh sawm bik tha hnem tak an tel a, Contingent 18 ten March-pass en tirin, hnam lam hmuhnawm tak tak thlir ho a ni bawk a, tlai lamah Hmeichhia leh mipa football final match hmuhnawm tak thlir ho a ni bawk.