Chakma Autonomous District Council, CEM Pu Molin Kumar Chakma chu vawiin khan No-Confidencial Motion hmangin CEM atanga paihthlak a ni.

 

Chawngte June 16, 2025: Chakma Autonomous District Council chuan vawiin khan CADC Session Hall, Chairman, Pu Lakkhan Chakma kaihruaina hnuaiah Special Session an nei a, Chief Executive Member, Pu Molin Kumar Chakma chu No-Confidence Motion hmanga paihthlak a ni.

 

He motion hi Zoram People’s Movement (ZPM) member leh 15-Rengkashya Constituency aṭanga MDC thlan tlin nibawk, Pu Doymoy Daveng Chakma chuan a pulut a, CEM Pu Molin Kumar Chakma hian sorkarna chelh chhunzawm turin member a ngah tawk tawh lova,  hruaitu thlak danglam ngai a nih thu a sawi.

 

Motion hi sawihona nghal niin, vote lak a ni a, Session atel Member thlan tlin mi 17 zinga mi 15 chuan motion hi an thlawp a, mi 1 chuan motion thlawp lo zawngin a vote thung. MNF MDC awmchhun, Pu Rasik Mohan Chakma chuan vote a thlak lo. Motion hian majority chiang tak a hmuh avangin pass a nih thu puan a ni. Hemi hnu hian Special Session chu tihtawp a ni.

 

11^th CADC hi hian CEM a tan Pu Rasik Kohan Chakma lakluh  anih hnuah, kumin February ni 27 khan Pu Molin Kumar Chakma hian a thlak a ni. CADC ah hian thlantlin member 20 awmin, Member pakhat thita ai thlan anih loh avangin tun dinhmunah Member 19 an awm mek a, ZPM member 16, MNF member 1 leh BJP Member 2 an awm mek a, BJP Member Pu Nirupam Chakma hi Session ah a tello bawk a ni.