Mizoram Journalists' Association General Conference vawi 52 na neih a ni.

Aizawl March 27, 2026: Vawiin khan Mizoram Journalists' Association General Conference vawi 52 na chu IPR Auditorium Aizawlah neih a ni a, Finance Department Secretary Pu Ramchuana MFAS chu khuallian niin a hmanpui.

Khuallian, Pu Ramchuana chuan, Finance department in kan theih ang tawkin MJA te pual hian kut kan lo thawh ve thin a, Journalist te chuan awn lam leh tan lam neih a rem lova, mite tina lo thei tur ang berin thudik pho chhuan kan tum tlat tur a ni a ti. Thu thar thehdarh kawnga finfiah peih a, inrin tawkna leh huaisen taka hna thawk turin a chah a, in tuaitharna leh inzir chho peih a pawimawh thu a sawi bawk. Print media te chhiar hlawh lo anga ngaih mah nise, a hlutna a nep chuang lova, Electronic media kal chak tak ruala kal dan kan thiam pawh a tul a ni. Mizo tawng ziak dan dik hmanga mipuite zirtir leh entawn tlak kan nih theih nan tan la thar turin a fuih a. Tiang rit deuh hmanchang awm mahse, thudik tak hmanga sorkar khalh ngil tu ni zel turin a sawm bawk a ni.

MJA Vice President Pu C. Lalhmachhuana kaihhruai MJA General Conference inkhawm ah hian MJA Member boralta Ezrela Dalidia Fanaipari Fanai DDK Reporter sunna hun hman a ni a, Gen. Secretary Pu K. Zothanpara'n MJA hmalakna report pein, MJA President Pu C. Lalrambuatsaiha'n thu a sawi bawk. MJA President Pu C. Lalrambuatsaiha chuan MJA leh Mizoram Sorkar thawhhona chungchangte sawiin, Sorkar atanga Advertisment hmuh dan felfai zawk duan a nih avang leh Journalist Pension tih fel a nih chu lawmawm a tih thu a sawi a, MJA hmasawnna tichak tur hian hruaitute tawiawm tha ila, in sawisel mai lovin thawhhona tha neih hi pawl zahawmna vawng him leh ti hlu tu a ni a ti. Social Media in min run mek a, hetih mek lai hian MJA member te chu rintlak bik kan ni tur a ni a, MJA Member thuziak chu mipuiin a rintlak zia an hmu zel tur a ni a ti.

Chawhnu lamah rorelna neih a ni a, MJA hruaitu thlanna neih nghal a ni.

MJA HRUAITU THLAN THARTE 2026 - 2028

President : Pu Vanlalrema Vantawl

Vice President : Pu C. Lalhmachhuana

Treasurer : Pu Zohmingmawia

Executive Committee Member:

1) F. Lalrinfela

2) Samuel Lalruatsanga

3) H. Lalchhandama

4) Joseph Lalnuntluanga

5) Lalbiakzama

6) Lalnunzira Chawngthu

7) Vanlalruata

8) T. Lalbiakdika

9) Malsawmdawngzela Hrahsel

10) Lalramdinsanga

11) K. Zothanpara

MJA GENERAL CONFERENCE 2026 RORELTE

1. Mizoram sorkarin sum renchem chhuanlama a hnathawkte chanchinbu lak theih zat nasa taka a titlem hi ngaihtuah tha leh turin hmalak ni rawh se.

2. MJA member, accredited journalist-te an thiha sorkarin a ràlna (ex gratia) Rs 2,00,000 hi tisang turin sorkarah thlen ni se. Accredited journalist ni lo, MJA member thite sorkarin a ràlna Rs 1,50,000 pawh hi tihsan ni rawh se.

3. Mizoram Journalist Pension Scheme kan hman mek hi Family Pension Scheme anga kalpui a nih theih nan hmalak ni rawh se.

4. MJA Gen Hqrs hian MJA hmingin social media-ah account siam rawh se.

5. MJA-in prominent journalist puan tura a thlan dan hi Coordination Committee-ah postal ballot hmangin thlan thin ni tawh rawh se.

6. MJA Rising Day, March 23 hi General Headquarters leh District tinah hman thin ni rawh se.

7. MJA sticker, motor-a târ tur, lak sawn theih siam turin MJA Gen. Hqrs-in hma la rawh se.

OFFICIAL RESOLUTION

i) Mizoram sorkarin MJA ngenna anga kum 2026-27 budget estimate-ah Advertising and Publicity atan IPR Department-ah sum a hlawma a dah tak avangin kan lawm tak zet a. Advertisement atana sum dahte hi government approved media firm-te tan rualkhai taka hman a nih theih nan min bawhzuisak turin IPR Department kan ngen a ni.

ii) Mizoram sorkarin IPR Department kaltlanga press tour min buatsaihsak thin leh Press Information Bureau (PIB)-in press tour min buatsaihsak hi kan lawm tak zet a. Hun lo kal zel turah pawh press tour min buatsaihsak zel turin kan beisei a, kan ngen nghal a ni.

Zofate kut ropui leh ngaihhlut hlawh ber Chapchar kut chawngteah hlim taka hman a ni.

 

March 13, 2026 : Vawiin khan Zoram hmundangte rualin Chawngte khelmualah Chapchar kut hlim taka hman a ni a, Kut pa a tan Lunglei South Bialtu MLA Pu Lalramliana Papuia chu hman niin, Chawngte SDO(C) Pu Lalnunpuia Renthlei in kut a thleng a ni.

Chawngte Group YMA bultuma vawiina chapchar kut hmanah hian Kut Organizing Chairman Pu ZD Ramngamzauva chuan Kut hlim taka hmang turin a sawm a, Pu K. Lalchhawnkhama hnen atangin Pasalthate Hlado chham thin chu ngaihthlak leh thlir ho a ni. Kut thlengtu, SDO (C) Pu Lalnunpuia Renthlei MCS chuan, Chawngte Group YMA huaihawta Chapchar kut hman a nih chu lawmawm a tih thu a sawi a, Kut thupui ang ngeiin inremna neia, zo ram leh hnam tan theihtawp chhuah turin mipui te a sawm bawk a ni.

Kut Pa, MLA Pu Lalramliana Papuia chuan, Chawngte a piang ka nih angin, ka pianna hmun ngeiah Khuallian ni a, Chapchar kut ka hmang thei hi a lawmawm ka ti tak zet a, mizo hnam kengtu chu mizo mipa te kan nih ang mawhphurhna lian tak a in ngat a ni. Mizoram chhunga cheng hnamdang te, kan kianga khawsa te nen pawh in rem taka awm tum tur a ni a, chutih rual in hnam bil tana ruahmanna thil erawh chu hnam dangin min zen tawm rem lo chin engemaw zat a awm ve thin a, chungah chuan an kut rawn zen loh pawh an tan a him ang tih ka sawi duh a ni a ti. Hnam hrang hrang ten kan hnam nunphung in zah sak te pawh tul a, lung rual taka hun hman ho te pawh a tul a ni. Tun hnaiah inneih thuam chhawm chungchangah dan ennawn a ni a, dan te siamthat a ni a, mizo thlah leh hnamdang thlah ten mizo anga hamthatna kan neih te inang khat veka kan hmang leh hnamdang thlah ten an kut an rawlh lohna turin heng dante pawh siam a ni a ti. Hnam lam leh incheina hmang chauhva mizo zia lantir tum leh engemaw hun bik a tan chauhva mizo kan ni palh ang tih ka hlau a ni. Inti mizo lovin, mizo nunzia hi kan nun chhuah pui zawk tur a ni a ti.

Chawngte a chapchar kut hmannaah hian CADC Art & Culture Department ten Chakma Kut (Biju) lam an en tir a, Chawngte Group YMA huam chhunga Branch ten hnam lam chi hrang hrang leh mizo ten nundan leh in cheina te an entir a, MHIP Chawngte ‘P’ Branch pawhin Mizo te La deh dan entirin an chai nghal bawk a ni. Chapchar kut ah hian Chawngte leh a chheh vel khaw hrang hrang te fuan khawm in, Mizo Zaithiam lar, Siampuii Ralte, J. Lalrosanga, Thangromawia, Young Fella leh tulachhung zaithiam te an in lan bawk a ni.  

 

PIB huaihawta Mizoram atanga Jammu & Kashmir a zin mek Journalist ten Kashmir a, hmun pawimawh tak tak an tlawh.

18th Feb. 2026: PIB Aizawl huaihawta Jammu & Kashmir a zin mek Mizoram Journalist te chu February ni 16, Thawhtanni khan Srinagar Jammu & Kashmir tlengin PIB Srinagar hotute nen inkawmhona hun hman a ni a, MJA President Pu C. Lalrambuatsaiha chuan Mizoram Journalist te helai thleng min hruai thlenga Sawrkar laipui hmalakna hrang hrang hmu thei tura PIB hmalakna chu lawmawm a tih thu a sawi. 

Mizoram Journalist te chuan J&K Srinagar a hmun pawimawh tak tak an tlawh a, PIB hmunpui te Silk siam nana Pangang khawi a leh zirna hmunpui Central Silk Board te an tlawh a, Handicrafts Department Govt of Jammu & Kashmir te tlawhin Kashmir kut chhuak Carpet siamna hmunpui leh shawl siamna te an tlawh bawk. Heng Carpet leh shawl,  kut hmanga an siam chhuah te hi man man taka hralh chhuah thin a ni an ti. Carpet chi hrang hrang, Shawl leh Parda thlengin Kashmir kutchhuak hi an ngaihluin an hmang nasa hle a ni.

Mizoram Journalist te hian vawiin khan Council of Scientific and Industrial Research, Indian Institute of Integrative Medicine (CSIR - IIIM) Jammu tlawhin, Dr. Shahid Rasool Principal Scientist CSIR IIIM Jammu leh a thawhpui Scientist ten an lo dawngsawng a, Lavender chinna hmunpui te tlawhin Rose chi hrang hrang leh Lavender atanga damdawi leh rimtui chi hrang hrang, Perfume, Sahbon leh room tih rimtui nante siam chhuah a nih dan te an lo hrilhfiah a ni.

 DSEB conducts training for Exam Superintendents

Kamalanagar, 29 January, 2026: The District School Education Board (DSEB), Chakma Autonomous District Council, conducted a one-day training programme for Exam Superintendents in connection with the forthcoming Primary and Middle School Common Examinations today at the CADC Rest House Conference Hall, Kamalanagar.

The training programme was chaired by the President of the Board, Shri Anand Kumar Chakma, and attended by other officials. A total of 38 Exam Superintendents, appointed for 38 examination centres attended the programme.

During the session, the participants were briefed on examination-related rules and procedures, as well as their duties and responsibilities, with a view to ensuring the smooth and orderly conduct of the board examinations.

The training was conducted by Resource Persons appointed by the Board. The Common Examination, 2025 – 2026 is scheduled to be held from 2nd February to 11th February, 2026.

Ramchhung hmun dangte rualin Chawngteah Republic day urhsun taka hman a ni.

January 26, 2026: Vawiin khan Ramchhung hmundang rualin Chawngte playground ah Republic Day urhsun taka hman niin, Chawngte SDO (C) Pu Lalnunpuia Renthlei chu khuallian niin hnam puanzar a pawtpharh a, NCC 3, leh School Contingent 7 te hnampuanzar chibai buk a chhang let.

Khuallian chuan thu sawiin, Chawngte RD Block huamchhungah hmeichhiate chawikanna turin Self Help Group 826 awmin Village Organization 88 leh Cluster 7 hmangin hmasawnna hnathawh mek a ni.

Sorkar laipui hmalakna in Thingtlang mite inhlawhna MGNREGA pawh kum khata ni tam zawk in hlawhna siamsak turin VB GRAM G kalpui a ni dawn tih a sawi.

Mizoram sorkar duhsakna changin CHC Chawngte ah Ambulance dah a ni a, Ultrasound pawh hman theihin peih fel a ni tawh bawk a ti.

Chawngte RD Block huamchhunga ICDS hnuaiah Anganwadi centre 101 awmin nu naupai leh naupang te enkawl mek an ni a, Public work Department hmalakna in khawchhung kawngpui chhia thawmthat a ni a, SASCI  hmangin Borapansury atangin Bangladesh Boundary kawng siam zawh tawh a ni bawk. NABARD sum hmangin Chawngte to Borapansury kawng thawmthat hna pawh thawh mek a ni a ti.

Food & Civil Supply & Consumer affairs Department Chawngte Centre atangin AAY chhungkaw 415 te hnenah buhfai 35kg a thlawnin thlatin pek an ni a, chhungkaw 4458 te hnenah thlatin 5kg pek an ni bawk. Kum 2025 chhungin buhfai 28,282.36 quintals dawn chu semchhuah vek a ni tih a sawi.

Republic day lawmnaah hian March pass bakah zai leh hnamlam entir a ni a, khuallian hian CHC Chawngte ah damlote thilpek a hlan bawk a ni.

Chawngte a republic day lawmnaah hian MLA Pu Rasik Mohan Chakma te, Ex-MLA Pu BD Chakma leh MDC leh CADC Officer te, khawtlang hruaitu pawimawh tak tak te an tel a ni.