Mizoram Larsap, Dr Hari Babu Kambhampati-in Chawngte a tlawh
December 3, Chawngte: Mizoram Larsap, Dr Hari Babu Kambhampati chuan vawiin khan Chakma Autonomous District Council (CADC) hmunpui, Chawngte (Kamalanagar) a tlawh.
Larsap hian zing dar 10:30-ah helicopter-in Chawngte a thleng a. Mizoram Arm Police-in guard of honour lo pein, Tuichawng bialtu MLA Dr. Buddha Dhan Chakma, Lawngtlai Bawrhsap, Dr. Andrew H. Vanlaldika, CADC Chief Executive Member (CEM) Pu Rasik Mohan Chakma, Lawngtlai Superintendent of Police (SP) Pu DKS Singh leh official dangte'n an lo dawngsawng.
CADC Rest House tuala amah lawmna inkhawm buatsaihah Larsap Dr. Hari Babu Kambhampati chuan Lawngtlai District chhunga Sub-Division pakhat leh CADC hmunpui, Chawngte tlawh theia a awm chu lawmawm a tih thu a sawi a. Hma sawnna kawngah ram chhung hmun dang nen khaikhina ADC huam chhunga mite an hnufual bik thin chu pawi a tih thu sawiin, state sawrkar leh district council hnuai thawktu zawng zawng chu ram bial leh a mi chengte hmasawn nana theih tawp chhuah chu an mawhphurhna a ni tih hre thar leh turin a chah a ni.
Mizoram Larsap chuan sawrkar laipuiin mipui hamthat nana scheme a duan - Pradhan Mantri Jan Dhan Yojana (PMJDY), Pradhan Mantri Jeevan Jyoti Bima Yojana (PMJJBY), Pradhan Mantri Surakhsa Bima Yojana (PMSBY), Atal Pension Yojana (APY), Pradhan Mantri Ujjwala Yojana (PMUY) leh scheme hrang hrangte chu mipui vantlangin an hriat a, an chhawr tangkai theih nan mipuite hnena hriattir a, a hlawhtlin nana theih tawp chhuah chu sawrkar hna thawkte mawh a nih thu a sawi. Prime Minister-in India ram mipuite mahni kut kea ding a, intodelhna kawng zawh tura "Atmanirbhar Bharat" (Self Reliant India - Mahni Intodelh) auhla nena a sawmna tihlawhtling tura theih tawp chhuah turin official kal khawmte leh mipuite chu a chah a. Autonomous District Council chungchanga India Danpuiin Governor kova mawhphurhna a nghahte chu tha taka hlen chhuah a tum thu sawiin, mipuite hamthat nan District Administration leh District Council te chu inlungrual taka thawk ho tura a duh thu a sawi bawk.
He hun hi Lawngtlai Bawrhsap, Dr Andrew H. Vanlaldika chuan a kaihruai a, Larsap hi amah lo lawm nan CADC hmingin Chakma hnam thuam leh District Administration hmingin Lai puan hlan a ni a. CADC CEM Pu Rasik Mohan Chakma chuan inlawmna thu sawiin, CADC dinhmun tlangpui a tar lang bawk. CADC Art & Culture Department hnuaia Chakma cultural troupe te'n hnam lam an entir a. CADC-a Executive Secretary Pu Pronit Bikash Chakma chuan lawm thu sawiin hun a khar a ni.
Larsap lawmna inkhawm hman zawh hian CADC Rest House Conference Hall-ah state sawrkar leh CADC hnuaia department hotute nena inkawm hona hun buatsaih niin, Bawrhsap Dr Andrew H. Vanlaldika'n Chawngte Sub-Division dinhmun tlangpui leh SP Pu DKS Singh-in Chawngte Sub-Division chhunga venhimna lam dinhmun powerpoint presentation an pe a. Tlawmngai pawl hruaitute, Kohhran hruaitute, political party hrang hrang hruaitute leh CADC-a member-te nen inkawm hona hun buatsaih chhunzawm a ni. Hemi hnu hian Larsap chuan Chawngte Community Health Centre tlawhin, an dinhmun a en a, Damdawiin lama thuneitu ten lo dawngsawngin, Sr. Medical Officer, Dr. Walter Lalnuntluanga Sailo chuan Damdawiin dinhmun tlangpui a hrilhfiah nghal a, tlai dar 2:30-ah Aizawl lam panin helicopter-in a thlawk chhuak leh nghal a ni.
