LADC Executive Member, i/c Sport leh LDFA President ni bawk, Pu C. Hrangṭhianga leh CADC Chief Executive Member, Pu Rashik Mohan Chakma chuan Chawngte a Astro turf field siam mek an tlawh.

January 29, Chawngte : PMJVK sum Rs. 532.50 lakhs hmanga Chawngte football ground Astro turf phah tura siam mek chu vawiin khan LADC Executive Member, i/c Sport leh Lawngtlai District Football Association (LDFA) President ni bawk, Pu C. Hrangṭhianga leh CADC Chief Executive Member, Pu Rashik Mohan Chakma in an tlawh a, CADC Chairman, Pu Buddha Lila Chakma leh Executive Member, Pu Lakhan Chakma ten an ṭawiawm.

Work Supervisor in a sawi danin, "Hna hi 40% thawh zawh tawh a ni" a ti. Hetah hian Security Fencing te, khelmual pumpui hel chhuaka concrete paver block footpath te, Pavilion -cum- change room leh Viewers galleries te a tel bawk ang.

Chawngte Football ground Astro turf phah tur hian December ni 3, 2021 khan Sport & Youth Service Minister, Pu Robert Romawia Royte in lungphum phum tawh a, a hmuna tlawhtu LADC Executive Member, Pu C. Hrangṭhianga chuan hna an thawhchin ah hian a thawk ṭha hle niin a ngai bawk.

LDFA President, Pu C. Hrangṭhianga chuan, Chawngte ṭhalai infiam mite hmasawnna leh National player atan ṭha taka chherchhuah an nih theih nan hmalak aṭul thu leh, infiam mite tana rotling tak Chawngte in an nei tur chu a lawmpui thu a sawi a, hetiang field ṭha leh rotling hi ṭha taka enkawl turin CADC Chief Executive Member Pu Rashik Mohan Chakma a sawipui bawk a ni.

LADC Executive member i/c Revenue Department changtu ni bawk, Pu C. Hrangṭhianga hian Chawngte 'P' LADC Revenue Officer Office tlawhin hmasawnna tur a sawipui a, Amah lo dawngsawngtu YLA Chawngte 'P' Branch hnenah Football pe bawkin Chawngte 'P' YLA Field pawh tih puitlin a nih theih nan a theih ang anga hmalak zel dan tur YLA Hruaitute nen an sawi ho.

Chawngteah Covid-19 a ṭaidarh leh avangin mipui himna leh hri danchah a nih theih nan ruahmanna siam in, Chawngte Civil SDO Conference Hall ah meeting neih a ni.

January 29, Chawngte: Vawiin khan Chawngte Civil SDO Dr. Manesia Khaimeichho kaihhruaina hnuaiah Chawngtea khawtlang hruaitute an ṭhukhawm a, CADC Executive Member, Pu Charan Singh in a telpui.

Chawngte ah hian tun dinhmunah hrikai thar mi 15 hmuhchhuah a ni tawh a, hengte hi 4C ah enkawl mek an ni. 

Meeting kal khawmte chuan State dang leh District dang atang Chawngte lut tur reng rengte Screening point siamin Joint VLTF leh Medical lam duty ten endik an ni anga, khaw chhungah Covid Symptom neite chu a rang theih ang bera test nise, Vantlang hmun leh Bazaar naah te, khawlai chhuak vak reng reng ten hmaituamna an vuah vek tur a ni a, he thu zawmlo te chu man leh chawitir an ni ang. 

Chawngte 'P' leh Chawngte 'L' ah hian Community Covid Care Centre (4C) buatsaih leh nise tih a ni a, Zan dar 10 hnu lamah khualzin leh Lirthei eng chi mah luh rem tih a ni lovang. tiin an rel a ni.

Republic Day Chawngte ah sawmbik ten an hmang.

January 26, Chawngte : Ramchhung hmundang ang bawkin vawiin khan Republic day Chawngte a Civil SDO Office kawtah hman a ni.

Hrileng Covid-19 avangin kum dang angin he hun hi mipui pungkhawm lova hman a ni a, Chawngte a Republic day hmannaah hian Chawngte Civil SDO, Dr. Manesia Khaimeichho chu khuallian niin hnam puanzar a pawt pharh a, CADC Chairman, Pu Buddha Lila Chakma leh CADC Executive Secretary pawhin a tawiawm.

Covid-19 avangin kan ramin harsatna atawh mek avangin, Republic day pawh hlung taka hman theih a nih lo chu pawi a tih thu sawiin, sawm bik helai hmuna kal khawm zawng zawng ten, hlim taka hun hmang turin duhsakna thu Khuallian, Dr. Manesia Khaimeichho chuan a sawi bawk.

 National Voters day hmang.

January 25, Chawngte : Vawiin khan ramchhung hmundang ang bawkin, Chawngte ah National Voters Day hman a ni.

He hunah hian khuallian, Chawngte Civil SDO, Dr. Manesia Khaimeichho chuan, Democracy ram kan nih angin, zalen takin kan duhna hmunah Vote hmangin kan zalenna kan hmang thei hi lawmawm a tih thu a sawi a, vote nei thar te hnenah Voter ID sem nghal. Tuichawng (Lagislative Assembly Constituency) ah hian Voter 26272 an awm mek a ni.

He hunah hian Booth Level Officer te leh Vote nei thar mi thenkhat an tel thei a ni.

Sawrkar laipui in Thingtlang mi (Rural Area) te tan Ni za (100) inhlawhna a siamsak pawisa lakchhuah kawngah harsatna an tawk mek.

January 13, Chawngte : Sawrkar laipuiin Thingtlang mite inhlawhna tura a siam Ni 100 inhlawhna a an inhlawh la tur hian Chawngte leh a chhehvel khua thingtlang mite te tan harsa hle a, an in hlawhna pawisa la tur hian Mizoram chhim tawp, Parva, Simeinasor te, Mainabâpsora, Bangladesh ramri depa awm, Nakdarasora, leh hmun hrang hrang atang tein Chawngte ah State Bank Of India Chawngte Branch leh Mizoram Rural Bank Chawngte Branch te an pan a, a bik takin Mizoram Rural Bank atanga la chhuak tur an tam hle a ni.

Bank bula intlarte kan zawh kualnaa an chhan danin zing dar 2 vel atang khan an intlar tan tawh a, kum lam a upa deuh te pawh engemaw zat awmin, thalai deuh te pawh an awm bawk. MRB lama thawktu ten pisa kai chhung hian chhum lo chat lovin pawisa hi pe chhuak reng a, mahse, mipui an kiam thei meuh lo. Nitin mi thahnem tak an intlar reng a heng intlar zingah hian Account Holder ni lemlo, midang lo din sak te pawh an awm niin a lang.

CADC Area, Chawngte RD Block huam chhungah hian Village Council 88 awmin, Ni 100 inhlawhna hi Chawngte Bank ah lak angai vek si a, an mahni Account atang la chhuak tur hian hun rei tak tak intlar angai ta a ni. 

Mizoram Rural Bank Chawngte hian Nikum 2021 July ni 19 zan khan rawk tumin beih an tâwk tawh a, Police lam atanga thudawn danin pawikhawihtu hi chhui mêk a ni a, vawiin thlengin man chhuah ala ni lo thung.

Chawngte leh a chhevel mipui tan Bank dawr a huphurh awm hle dawnin a lang a, heng mipui intlar te pawh hian hrileng laka himna tur CAB an zawm lo hle a, hrikai awm palh ta se, inkaichhawn a awlsam hle dawn a ni.