Chawngte Police ten In rawktu ni a puh an man.

August 26, 2022 Chawngte: August ni 25 zana in rawkna thleng, Pi Lalrintluangi chhenna rawk chungchangah In rawktu ni a puh Police ten an man.

August ni 15 zan khan, Pi Lalrintluangi, MzSRLM Block Manager chenna chu rawk a ni a, pawisa Rs. 85000 ruk bo a ni. Tarlan tawh angin Chawngte Police te chuan rang taka chhui zelin, Nimin khan In rawktu ni a puh Likim Chakma chu man a ni. 

An mi man hian hnen atang hian Rs. 39000/- leh Smart Phone Rs. 17000 man a lei thar nen recovered a ni a, Likim Chakma chu case siam sakin tukin khan District Jail ah thawn nghal a ni.

Hruihhlo hi

Ruihhlo hi khawi hmunah pawh buaipui tham atling vek mai awm e. Kan ramah pawh, khawpui atang thingtlang thlengin ruihhlo buaipui lo khua hi kan awmloh hial a rinawm. Sawrkar leh tlawmngai pawl ang pawhin nasa takin do thin mah ila, do rem erawh a har hle. Ruihhlo kalkawng pawh dang chep viau thin mahse, kawng dangah aput ru leh zel a, fing takin an chhep ral leh thin.

Ruihhlo avangin mimal nun a khawlova, chhungkua a rum a, khawthlang a mangang thin a ni. Nun tichhetu, zalenna lak ata min hnuk hniamtu ruihhlo te hi bansan a, chhungkua leh khawtlang ti nuamtu niturin bul kan tan atul tawh tak zet a ni. 

Ruihhlo hi tih rêm theih loh khawp hial a pungchak a nih avangin, a do dan tha erawh kan zawn thiam a pawimawh hle a, thalaite an thiamna leh theihna zawn a kawng kawhhmuh te, infiam mite theihna hai chhuah leh chhawmdawl kawngah te, thiam thil neite leh kawng hrang hranga an theihna chi hrang hrang hai chhuaha, an kawng zawhtur kawhhmuh leh kaihruai te hian a sawt zawk ang em?

 

MSc (EVS) Gold Medalist (Topper)

Chawngte ‘P’ Nula, Nunu-i  

Pu Sapnunzira leh Pi Sangchiri te fanu, Nl. Lalfakawmi (Nunu-i) hi Ni 18, August 2022 a Mizoram University, Post Graduate final result chhuakah MSc (EVS) ah Gold Medalist (Topper) niin hlawhtlinna a chang.

Nunu-i hi Lawngtlai District, Chawngte ‘P’ a piang leh seilian a ni a, Unau pali (4) zinga naupang ber a ni. Naupang fel leh nu leh pa thuawih thei tak niin lehkha thiam thei tak a ni nghe nghe.

Chawngte ‘P’ Primary School - II ah zir chhuakin, Hermon Middle School Chawngte ‘P’ ah a kal chhunzawm a, Baptist Boarding School, Chawngte ah lut lehin Central High School Aizawlah Class –X hi 1st Div. in a passed bawk a ni.

High School a zawh hnu hian Mizoram Institute of Comprehensive Education (MICE) atangin Class - XII chu 1st Div. in a zirchhuak leh a, kum 2012 khan Pachhunga University College (PUC) Aizawlah BSc (EVS) ah Mizoram Top-2 ah in hlangkai leh in tun dinhmun hi a thleng ta a ni.

Nunu-i hian, Pathian leh zirna leh kawng engkima min thlawptu ka nu leh pa te, zirtirtu tha tak takte avanga hlawhtlinna chang thei ka ni a ti a, class tan tir phat atangin routine in siamin thiam ngei tumin ka bei thin a, exam dawnah chuan ka zir tawhsa ennawn hi a ni deuh ber. Lehkha ka zir hmain ka tawngtai hmasa ngei ngei thin tiin a sawi bawk.

A tum dan chuan kumin chu mahni inchhiar zau nan hun hman phawt a, kumthar lamah  MPSC coaching te kal a tum thu a sawi a, tuna zirna kawng zawh mek a zirlai puite hnenah kawng engkimah Pathian hre rengin, Social media pawh hi min hnuk hniamtu a hmang lovin kan zirlai min pui tura atangkai taka hmangin, hmathlir mumal tak nei a, chhawr tlak nih tumin, peih lo chung pawha tih hram hram a ngaih hunah pawh beidawng lo ila, kan thlen chin a piangah lungawi thiam apawimawh a ni tiin zirlaite a chah bawk.

Bungrua engmah chuh hman lovin Parva-ah In a kang.

August 23, 2022 Parva - II: Vawiin khan Pu Suno Chondro Parva - II te chhungkua chenna in chu bungrua engmah chuh hman lovin a kang.

Pu Suno Chondro te in kan hun hi chawhma dar 11:00 vel a ni a, in a kan lai hian in neitute hi an awm lo. Kang mei lo chhuah na hi tap mei atanga kangkai ni turah an ngai, Pu MD. Laldinga Parva - II hnen atanga thu dawn danin kangmei a chhuak tih an hriat rualin khawngtlang mipui te an pung khawm nghal a, theih tawp chhuahin an thelh a, hmundang erawh a kangkai hman ta lo a ni. VC leh YLA te pawhin kangmei tuartute chhawmdawl nan vehbur an khawn nghal a, In kang hian a bul hnaia Electrict hrui a kan chhiat tel avangin, hengte leh an chen lailawkna tur pawh hnatlangin an buaipui nghal dawn tih a sawi. Pu Suno Chondro te in hi Maurâp, abang dâp leh a chung Di a ni a, eirawng bawl nan tap mei an hmang thin a ni. chhungkaw member pathum a khawsa an ni a, buh leh an ran vulh lai Ui 4 akang hlum bawk.

MzSRLM Block Manager chenna in chu mi tu tih hriat loh ten an rawk.

August 16, 2022 Chawngte : Nizan khan MzSRLM Chawngte Block Manager, Pi Lalrintluangi chenna in chu rawk a ni.

In rawkna thlen hun lai hi hriat a ni lova, zing dar 5:30 velah hriat chhuah a ni. Pi Lalrintluangi sawi danin, Vawiin a zin chhuak tura in siamsa vek a nih thu a sawi a, a ken tur bag chu siting room lamah dahin, zinga athawhin a room chu pawn lam atang kalh hnan a nih a vangin a chhuak lawk thei lova, bangah lawn liamin thil thlen dan a hrechhuak ta chauh a ni. A bag chu in hawngsa a hmuin, bag-a a dah pawisa chu a lo awm tawh lova, kawngkapui ber inkalhna chu tichhia in misual hi inchhungah alut thei ta a ni. Hetiang a inrawkna hi ṭum hnih lai a lo tawk tawh nghe nghe.

A rang theih ang berin Chawngte Police Station-ah FIR thehluh nghal a ni a, police lam pawhin rang tak enfiahin misualin hmanrua a hman chemte leh torchlight pawh pawn lamah an hmuchuak bawk. Police te hian thuzawh zawhfiah tur mi 3 man tawh in he thu buatsaih lai hian misual hi man chhuah ala ni lo.

India Independence day hlim takin chawngteah hman a ni.

August 15, 2022 Chawngte: Ram chhung hmundang ang bawkin vawiin khan India Independence day hlim takin hman a ni.

Chawngteah Independence Day lawmnaah Lunglei HPC Vice Chairman, Pu Lawmawma Tochhawng chu khuallian niin hnam puanzar a pawt pharh. Pu Lawmawma Tochhawng chuan thu sawiin, Hri leng karah sorkar chuan chak taka hma lain hmasawnna tam tak hmuh tur a awm a, Public Works Department chuan hna chi hrang hrang thawkin NESIDS, NABARD, NEC, STATE, SPA, SEDP, NEDP & CSS project kaltlangin sorkar office building, Airport, Zirna in, Primary Health Centre, Market shed, Car parking sak hna thawh a ni.

Mizoram sorkar chuan Medical re-imbursement dil ve thei lo chhungkua tan Mizoram Health care scheme dinin health insurance a ruahman sak a, kum 2021-2022 chhungin chhungkaw 200122 an in ziak lut thei a ni. Thalai infiammi te tan an theihna haichhuah a nih theih nan hmalak a ni a, Chawngte ah ngei pawh Astro tuff phah a ni tawh a ni. 

Hrileng karah zirlai 90805 hnenah SSA hnuaiah a thlawnin School Uniform leh zirlaibu pek a ni a, tui thianghlim in tur leh School building tha zawk pawh tam tak sak zawh a ni. Food & Civil suply & consumer affairs dept. hmalakna in Public Distribution system (PDS) hmangin buhfai chhungkaw 1123340 hnenah sem a ni bawk a, hripui leng karah chhuanchham avanga nunna chan chhinchhiah an awm lo. 

MNF Party flagship programme SEDP hnuaiah hmasawnna tur ngaihtuahin MLA Constituency tinah beneficiary 1500 awmin chhungkaw 60000 anni dawn a, chhungkaw tin hian eizawnna an duh thlan ngei a bul tanna tur Rs. 50,000/- an dawng dawn a ni. a ti.

Zai leh hnam lam hrang hrang thlir hoin Parade contingent te hnenah khuallian hian lawmman a sem nghal a, tlai lamah Independence day lawmna puala football tournament leh badminton tournament pawh zo felin lawmman sem nghal a ni.

Football tournament ah team 52 chhuakin Chawngte 'L' FC leh Chawngte 'P' FC ten final khel in Chawngte 'L' FC ten 6-0 in hnehna an chang ta. Badminton lamah result chu hetiang hi a ni.

Independence Day boycott tum chu thulh a ni.

August 14, 2022, 9:30PM Chawngte: Lunglei HPC Vice Chairman Pu Lawmawma Tochawng hoin Chawngte Group YMA leh Central YCA hruaitute Emergency meeting an nei.

Central YCA leh Chawngte Group YMA ten Chawngte khawtlang mamawh Mizoram sorkara an thlen tih hlawhtlin a nih loh avanga lungawi lohna lantirin vawiin tlai dar 3:00 a an meeting thuchhuak chuan India ram zalenna ni August ni 15 lawmna programme boycott tura an rel tawh chungchangah Emergency Meeting zan 9:30 ah neih a ni.

Khawtlang hruaitute chuan an ngenna point hrang hrang te sawi nawn in, CHC Chawngte ah MBBS Doctor nghet a awmloh thu te, X-Ray technician awmloh thu te, Police Department indaih lohna leh hmeichhe Police mamawhna te, SDO (C) staff dinhmun leh BDO leh SDO (C) chu kawp lova, MCS Officer hran dah tura an  ngen thu an sawi nawn a. Vawiin khan Lawngtlai bawrhsap, Pu Amol Srivastava IAS chuan SDO (C) Office a thawktur, Lalchhuanawma UDC leh Joseph Lalchhanchhuaha LDC te transfer order a chhuah a, BDO leh SDO (C) pawh MCS Officer a hrana dah tura ngenna a siam thu an sawi lang bawk.

Lunglei HPC Vice Chairman, Pu Lawmawma Tochawng chuan an ngenna te chu a hriatthiam puiin âwm a tihpui thu a sawi a, heng in mamawh in thlen te hi a hmun ngeiah ka hmuhpui che u angin, kan hotute hnenah theihtawp chhuahin tihhlawhtlin anih theih nan hma ka lakpui ang che u a, tuna in thil tum, India Independence day erawh tibuai lovin hlim takin i hmang ho ang u tiin a sawm nghal a ni.

Group YMA leh Central YCA te chuan Sorkara an thil phut thenkhat tih hlawhtlin a nih, tih hlawhtlin tumna thu dawn anih vang te leh MLA zahawm tak leh CADC CEM zahawm takte min ngenna zahawm tak chu kan pawm a, Lawngtlai bawrhsap Pu Amol Srivastava IAS in hma min laksak naah lawmthu kan sawi a, Independence day boycott kan tum chu kan in hnukdawk rih ang a, amaherawh chu kan ngenna zawng zawng te hi August ni 31 ral hma ngei a min tihhlawhtlin sak kan phut a, kan MLA Zahawm tak pawhin chak taka min umzui sak turin kan ngen nghal bawk a ni. an ti.

Lunglei HPC Vice Chairman Pu Lawmawma Tochhawng chuan hetianga tlawmngai taka, thu tha kan sawiho thei hi a lawmawm tak zet a ni a ti.

Chawngtea India ram zalenna ni lawmna Prog. Dang dawn.

August 14, 2022 Chawngte: Vawiin khan Group YMA President, Pu ZD. Ramngamzauva kaihhruaina in Central YCA leh Group YMA joint meeting an nei a, Chawngte a India ram zalenna ni lawmna prog. dan (boycott) an rel.

August ni 8 khan Chawngte khawtlang mamawh hrang hrang Mizoram Sorkar a an thlen tawh chhanna engmah a awmloh avanga lungawi lohna lan tir nan kawng an lo zawh tawh a, he an kawngzawh ni hian SDO (C) hnenah Memorandum an lo thehluh tawh bawk a, heng Chawngte khawtlang mamawh an thlente hi vawiin thleng a, chhanna duhawm Mizoram Sorkar atanga a hmuh loh avangin lungchhiat thlak an ti hle.

Kawng zawh nia an sawi tawh angin India ram zalenna ni August ni 15 lawmna prog. Chawngtea hman tur chu dan an tum ta a ni. Mizoram sorkar atanga chhanna duhawm lungawi thlak an dawn hma chuan he an hmalakna hi kaltlangpui an tum a ni. SDO (C) Pisa kawt atanga Independence Day lawmna hmanna tur Baganpara Helipad panna kawnga pung khawm a, kawng dan an tum a ni.

India ram zalenna kum 75na lawmna pualin CADC BJP ten lawmna kawngzawh an nei.

August 13, 2022 Chawngte : Vawiin khan CADC BJP te chuan India ram zalenna kum 75na lawmna pualin khawlai an fang.

India ram zalenna kum 75na lawmna Azadi ka Amrit Mahotsav puala lawmna kawngzawh hi BJP Office atang CADC Secretariat thleng an kal a, 'Har Ghar Tiranga' in atum angin India khua leh tui ten Independence thlen hma atanga in tina India ram puanzar zar theuh tura hmalak a nih angin mipuiah zirtirna leh in kawhhmuh nan he kawngzawh hi an hmang a, flag la tar lote chu flag an pe bawk.  

He kawng zawhah hian MLA Dr. BD. Chakma leh Ex-Minister leh BJP National Council Member, Pu Nirupam Chakma pawh an tel.

One day Sensitization meeting neiin MzSRLM  Chawngte Block hnuaia Self Help Group ten Vawk insurance chungchang an zir ho.

August 13, 2022 Chawngte: Vawiin khan Mizoram State Livelihoods Mission Chawngte block hnuaia Self Help Group ten Vawk Insurance tih theih dan an zir ho.

He hunah hian MzSRLM Block Mission Manager, Pi Lalrintluangi te, National Insurance Company Limited (NICL) Representative, Israel Lalawmpuia te, Veterinary Officer, Dr. C. Lalawmpuia ten thu an sawi a, MzSRLM, AH&Vety Dept. leh  NICL thawhhona in Vawk vulhtu ten harsatna an tawh theih chungchanga Insurance an tih theih dan hrang hrang leh hamthatna an hmun theihdan te SHG member kal khawm te hian an zir ho.

MzSRLM Chawngte Block-ah hian khaw 88 a awmin Village Organization (VO) a awmkim vek tawh a, Self Help Group 553 an awm mek a ni.

Editorial

Khawpui fai leh thianghlim nih hi khaw dang chan a ni bik lova, kan khawpui ngei hi khawpui fai leh thianghlim ah kan siam thei. Faina leh thianghlimna lamah hian kan hnufum viau lova, hma erawh kan sawn lem lo. Nasa taka inzirtir leh kan thawh a ngai hle mai. 

I-Day football tournament lian tak an khel mek a, a entu mipui awmna lam sulhnu erawh thil eina leh in na bur ruak, bawlhhlawh hlirin a khat a, a mi chengte sulhnu anih hai theih rual a ni lo. 

Bawlhhlawh ngaitheilo hlir kha bawlhhlawh zingah inkhel kan en dual dual a, a ti bawlhhlawhtu deuh vek kan ni mai awm mang e. A tifaitu kan ni theilo a nih pawhin a tibawlhhlawhtu nihloh theuh i tum ang u. Khawlai leh bawlhhlawh bawm ni lova bawlhhlawh paih mai mai zia kan la put chhung chuan inti changkang mai mai kan nih hmel ta riau. Ram leh hnam changkang zia lakchhawn awlsam ber chu faina leh thianghlimna hi a ni.

‘Clean your space, clear your mind'

Chawngte khawtlang mamawh NGO ten sorkara an thlen tihhlawhtlin a nih theih nan theihtawp chhuahin hma kan la ang. - Andrew-a EM, LADC

August 10, 2022, Lawngtlai : Thawhtanni kalta a, Central YCA leh Group YMA hmalaknaa Sorkara an thilthlen chungchangah lungawilohna lantir nan kawngzawh huaihawt chu LADC Executive Member, Chawngte 'P' Bialtu MDC ni bawk, Pu Andrew Laltlanzara chuan, Chawngte khawtlang in kan mamawh NGO ten an auchhuahpui chu âwm atih thu a sawi a, CHC Chawngte a MBBS Doctor nghet neilo leh X-ray Technician awmlo te, Police indaih lohna avanga mipuiin harsatna an tawk thin chu pawi a ti hle a, SDO leh BDO chungchanga hmalakna te, kawngpui tha neih theih nan te, theihtawp chhuaha hmalak atum thu a sawi. Hemi chungchangah hian thuneitu sang zawkah pawh thlen a, Amah ngei pawh Aizawla kalin thuneitute sawipui a, tihhlawhtlin a nih theih nan theih tawp chhuaha hmalak a tum thu The Chawngte Times a hrilh. A sawi zelnaah hetianga khawtlang mamawha hma kan lakna reng reng a, pawl leh party bik sawi lova inlungrual taka thawhho zel hi a tul a ni a ti.

Mizoram Sorkara an thilphut tihhlawhtlin a nih theih nan kawngzawh an huaihawt.

August 8, 2022 Chawngte: Chawngte Group YMA leh Central YCA tangkawpin Chawngte mipui mamawh Mizoram Sorkara an thlente vawiin thlenga tihhlawhtlin a nih loh avanga lungawilohna lantir nan kawngzawh an huaihawt.

Vawiin kawngzawh hi dar 11:00am khan  Chawngte 'L' kawtchhuahah tanin, Gr. YMA President, Pu ZD. Ramngamzauva leh Central YCA President, Dr. Jyotir Moy Chakma te chuan thu an sawi a, Chawngte khawpui chhunga mipui mamawh hrang hrang tam tak zingah point 5 Mizoram sorkarah kan thlen chu ngaihsak leh tih hlawhtlin ala ni lova, hei vanga hian vawiin hian Mizoram sorkar a kan lungawilohna tih lanna turin kawngzawh kan huaihawt a ni an ti.

Mizoram Sorkara kan thu thlen te zingah Chawngte Power Sub-Station a Penal Board min dahsak tura kan ngenna chu ngaihtuah niin Mizoram chah thlen a nih thu a sawi a, reiloteah hman thei a beisei thu a sawi bawk.

Community Health Centre (CHC) Chawngte ah MBBS  Doctor nghet an awm lova, Radiographer (X-ray technician) pakhatmah an awm lova, Nurse leh thawktu dang pawh an in daih lo hle a, hengte pawh hi a rang theih ang berin lo dah se an duh thu an sawi. Chutiang bawkin, Chawngte Police Station ah thawktu an tlemin an indaihlo hle a, Hmeichhe Police kan neih loh avangin harsatna kan tawk thin bawk a, Police dah belha abik takin hmeichhe police min pe ngei turin kan phut bawk a ni an ti.

Chawngte a office pawimawh ber, Sub-Divisional Officer office ah SDO leh 4th grade 1 chiah regular staff awmin, SDO hian BDO hna a kawp bawk a, thawktu dah belh tur leh SDO leh BDO hi kawp lova MCS Officer a hranga dah ngei turin kan duh a ni an ti.

Vawiina kawngzawhnaah hian buaina leh harsatna lian tham a thleng lova, Chawngte Civil SDO Pisa-ah Memorandum thehluh nghal a ni a, SDO (C) Dr. Manesia Khaimeichho chu a dam that loh avangin Office aiawhin LDC atan chhawr lai, Pu Vanlalkima'n a dawng. Hemi chungchangah erawh Central YCA leh Group YMA hruaitute chuan a lungawih thlak loh hle an ti a, kan memorandum thehluh te hi August ni 14 hma ngeia hlawhtlinna kan hmu loh a nih chuan India Independence Day boycott chungchang pawh kan ngaihtuah tha ang an ti.

Sawrkara an thilphut tihhlawhtlin a nih theih nan kawng an zawh dawn.

August 7, 2022 Chawngte: Chawngte Group YMA leh Central YCA tangkawpin Chawngte mipui mamawh sawrkara an thlente vawiin thlenga tihhlawhtlin a nih loh avanga lungawilohna lantir nan kawngzawh an huaihawt.

Ruahmanna an siam danin naktuk thawhtanni dar 11:00am a tanin Chawngte 'L' kawtchhuahah Gr. YMA aiawh thusawi ngaihthlak a ni anga, Dar 11:30 ah Chawngte 'C' khelmual bulah Central YCA aiawhin thusawina an nei bawk ang. Chhun dar 12:00  Civil SDO office ah memorandum an thehlut dawn a ni.

Sawrkara an thilphutte an tarlan dan in, Community Health Centre (CHC) Chawngte a Staff dah belh te, Chawngte Police Station ah Police dah belh a, hmeichhe police pakhat tal dah te, SDO (C) Office ah Staff dah belh te, SDO (C) leh BDO te Officer pakhatin kawp lova, MCS Officer a hrana dah tura an ngenna te chu mipui mamawh phuhru tawk tura chhanna an la hmuh loh avangin lungawilohna lantir nan kawngzawh hi an huaihawt dawn a ni. Chawngte Power Sub-Station a panel board mamawh tawk dah tura an ngenna erawh tihhlawhtlin mek a nih thu an tarlang thung.

Ram chhung leh pawn, hmun hrang hrang khuarel chhiatna tawk chanchin kan hre chamchi mai a, chung chhiat tawhnaah chuan chhanchhuaktu tur inzir chhuak ten fimkhur takin chhanchhuah hna chu an thawk thin tih pawh kan hria, mipui te pawhin chung khuarel chhiatna alo thlen thut pawha chiai lova, an hmachhawn theih nan inzirtirna pek a ni thin a, amaherawh chu kan khawpuiah erawh chuan chutiang inzirtirna chanchin hriat a awm ngai meuh lo.

Kangmei, Tuilian leh thil dang dang pawh kan lo tawk tawh in, kan la tawk zel ngei ang, heng atan hian inbuatsaihna tha kan neih ava tul tawh tak em.

Khuarel chhiatna a lo thlen hian awmze neilova chet lak ngawt hi a finthlak loh hle a, chetsualna leh nunna hial chan theihna hnai tak a ni. Kan khawpuiah hian hetiang lam inzirtirna neih hi a hun tawh tak zet a ni.

 

India Independence Day lawmna turin Chawngte ah Football Tournament vawiin khan tan a ni.

August 3, 2022 Chawngte: Lawngtlai District Chawngte-ah vawiin khan India ram zalenna ni August ni 15 lawmna turin Football tournament buatsaih chu vawiin khan tan a ni.

He hunah hian Chawngte Area Football Association (CAFA) President, Pu C. Lalhmunmawia chuan Tournament hawnna inkhawm tawiah thu sawiin, "Infiam mite tana hun lawmawm tak, Football tournament buatsaih a nih hi lawmawm a tih thu a sawi a, Sport Minister zahawm tak, Pu Robert Romawia Royte leh CADC CEM chhuak ta, Pu Rasik Mohan Chakma hmalakna in Astro Tuft ah inkhel tur kan nih angin hetianga field tha leh puitling hi dimdawih kawngah mawh kan phur a, infiam mi pungkhawm kan nih angin, hnam hrang hrangte in unauna tha neia, buaina siam zawnga hun hmang lo turin a chah a ni.

He tournament hi Chawngte Area Football Association (CAFA) enkawlna hnuaiah neih a ni a, Chawngte leh a chheh vel Club 52 ten an khel dawn a ni.

Chakma Autonomous District Council, Deputy Chief Whip a tana ruat thar, Pu P. Thantluanga'n a Pisa a luah.

August 1, 2022 Chawngte: Vawiin khan Chakma Autonomous District Council Deputy Chief Whip atana ruat thar, Pu P. Thantluanga chuan a pisa luah in, CADC Chairman, Pu Kali Kumar Tongchangya leh Legislative Secretary, Pu Dikambar Chakma leh Ex- MDC, Pu VL. Piangenga'n Office an luh pui a ni.

Pu P. Thantluanga chuan, 'CADC member niin hotute duhsakna zarah chanvo tha tak ka chang thei hi ka lawm hle a, Ram leg hnam tan ka theihna zawnah theihtawp chhuah in hma lak zel ka tum ang' a ti.

CADC ah hian Nominated hi 4 an awm thin a, hun kal tawhah pawh Planning Vice Chairman leh Deputy Chief Whip nihna an lo chelh tawh thin a, tunah 10th CADC ah hian Pu P. Thantluanga hi Deputy Chief Whip atan CADC Executive Committee chuan a ruat thar ta a ni.