Lungrang ‘S’ ah Health Mela

 

Community Heath Centre Chawngte bul tumin vawiin khan Lungrang ‘S’ ah Health Mela neih a ni.

            Health Mela ah hian natna chi hrang hrang zawn chhuah a, damloin a thlawna enkawlna an dawn theih nan buatsaih a ni a, Doctor thiam tak tak te, hmanrua leh damdawi kengin Health & Wellness Centre awmnaah Health Mela hi neih thin a ni.

 

Lungrang ‘S’ a Health Mela neihah hian Dr. Arun–a (Ayush) , Dr. Lalhriatpuii (Ayush), Dr. Vanlalnghaka Sailo (Dental), Lalhmingsanga (Eye) NPCB&VI Dept. te an kal thei a, Damlo mipa 78, Hmeichhia 96, Kum 65 chunglam 17, an vaiin mi 174 te in entir an awm a, heng mite hi damdawi leh tarmit a thlawnin an pe nghal a ni.

 

Chawngte Block huamchhunga Village Level Entrepreneur (VLE) workshop neih a ni.

November 30, 2022: Vawiin khan Lawngtlai District, Chawngte Block a Common Service Centre (CSC) VLE te Workshop neiin service hrang hrang an pek theihte zirchianna an nei.

He Workshop Kamalanagar -III YCA Committee room a neih ah hian Lawngtlai District CSC District Manager (DM) Pu K. Lalfamkima chu resource Person niin a hmanpui a, Mipui ten an mamawh hrang hrang sorkar office engemaw zat pan ngai lova CSC kal tlanga chinfel theihna a nih avangin VLE te chu dik tak leh thahnemngai takin mipui te tanpui turin a fuih a, CSC ten kuthnathawktute ham thatna tura scheme hrang hrang PMKISAN, E-Sharm leh service tam tak an khawihah hian a nih tur ang taka dik leh rinawm taka hna thawk tur leh E-District service ah Tribal Certificate, Residential Certificate, Income Certificate pek chhuah chungchangah pawh fimkhur a tul zia te a sawi.

Vawiina workshop ah hian Agriculture Department aiawh telin, Chawngte Block VLE te an kal tha hle.

 

Raltlante tanpuina an hlan

 

November 29, 2022: Vawiin khan Chawngte Group YMA te chuan Bangladesh atanga Bawm raltlante tanpuina hlan in an kal

 

Kan tarlan tawh angin, Bangladesh atanga an sihimna zawnga raltlan mi 295 te chu tunah hian refugee Camp siamsak an la nih loh avangin, Lawngtlai District, Parva-III ah an khawsa mek a, Community Hall, School leh Health Sub-Centre ah dah an ni.

 

Raltlante chhawmdawl hna thawkin Parva-III khawtlangte chuan theihtawp an chhuah reng a, Sorkar, Pawl leh Mimal thahnemngaite atangin tanpuina eng emaw zat an dawn thu an sawi bawk. Vawiin khan Chawngte Group YMA te chuan an group huam chhungah Raltlante pual hian Vehbur khawn in Sumfai bakah Alu, Dal leh mamawh hrang hrang te an hlan a ni.

 

            Thlasik thil thawin min chhem heuh heuh tawh a, boruak inthlak lai anih avangin a duh tan kawr lum a hak theih ta. Kawngpui diak chu vut khu in a thlak a, Covid vanglai ang maiin hmai tuamna vuah lova khawlai chuah a rem meuh lo.

             Mahni hriselna vawn uluk a tul hle a, Kristian te tan hunpui a hnaih tawh avangin bazarna hmun pawh a lun tan tawh hle a, kawng hrang hrangah kan nunphung a danglam tan leh ta. Heng hunah hian engkawngah pawh fimkhur zual a tul a, ruihhlo lakah te, chetsual palh theihna lakah te, hriselna lamahte, kan in ven fimkhur a tul tak zet a ni.

            Lirthei khalhtute pawhin fimkhur leh midangte vengthawng tak chunga lirthei khalh a tul a, chutih rualin kawngpui kan dawna lirthei kal dan enfel hmasak hnuah chuah kawngpui kan thin tura, kan fate leh chhungkuaah in zirtir uar zel ang u.

Bangladesh atang raltlan ten Parva-III an lut.

November 21, 2022 : Bangladesh buaina avanga an sahimna zawnga Zo hnahthlak Mizorama lo lutte chu zanin dar 10:30 khan Parva ah hruai luh an ni a, Parva Community Hall ah an riak khawm ang.

Heng raltlan lo lutte buaipui tur hian Chawngte atangin dan leh thupek keng kawhtu SDPO Pu FC. Zonghinga leh a thawhpuite bakah Chawngte RD Block APO, Pu Rinnghinglova Khiangte leh a thawhpuite pawhin an awm chilh mêk a, Tuichawng Group YMA leh Parva khawtlangin an lo buaipui bawk. Parva khawtlang ten awlsam zawka heng raltlante an lo bawihsawm theih nan, APO hian ngen sakin Simeinasora atangin Parva –III ah hruai phei a ni ta a ni.