Manipur zohnahtlak tawrhna leh an thlavang hauhna turin Chawngteah kawng zawh a ni.

 

July 25, 2023: NGOs Coordination thuchhuak angin vawiin khan Chawngteah Manipur zohnahthlakte tawrhna tawmpui leh an thlavang hauhna kawng zawh a ni a, Chawngte Group YMA, YLA Sub-Hqrs. Chawngte, MHIP te nen kawng an zawh a mi thahnem tak an pung khawm.

 

Vawiin kawngzawhah hian Manipur a chi leh chi buaina chinfel a nih theih nan chak taka hma laturin India Sorkar an phut thu te, Manipur zohnahthlakte tawrhna chu kan tawrhna a ni tiin an au rual a, Group YMA President Pu PC. Lalramnghaka te, Chawngte 'P' Branch MHIP President Pi Lalremchini te, MSU President Pu Felix Lalnundawnga ten thu an sawi a, YLA Sub-Hqrs. President Pu J. Thanghleia'n tawngtai hona a kaihruai bawk. He kawngzawhah hian Central Chakma Mahila Samiti (Chakma Nu pawl) leh Central YCA member thahnem tak an tel bawk a, Central CMS aiawhin Pu Ju-ni in thusawina hun a hman bawk.

 

Kawngzawh chhung hian Lirthei hmanga sumdawngte, dawr nei zawng zawng ten an dawr an khar vek a, chhung tiin an inah puan dum an lo zar vek bawk a ni.

 

Thusawitu te hian Manipur a zofate tawrhna chu an tawrhna leh natna a nih thu an sawi lang a, zofate thihna leh sawisak, hmeichhia te pawngsual an nih chu na an tih thu an sawi bawk a ni.

 

Vawiin kawng zawha kalkhawhmte chuan thawhlawm thawh in, Manipur atanga raltlan Chawngte Area awm te hnenah tanpuina an hlan nghal a, thawhlawm tling khawm hi Rs. 28040/- a ni.

 

 India Independence Day Chawngte a hman dantur sawi ho a ni.

 

July 17, 2023: Vawiin khan SDO (C) Pu Lalneihthanga Colney kaihhruaina in SDO Conference Hall ah kumin 2023 India Independence Day hmandan tur sawi ho a ni.

 

Kumin 2023 a India Independence Day hmanna tur hmun atan Kamalanagar Playground niin zing dar 8 ah Ram puanzar pawh pharh a ni ang. Mizoram sorkar lamin khuallian tur an ruat lo a nih chuan CADC CEM hman nise tih a ni.

 

Kumin I-Day pual hian Parade contingent 12 beisei niin, infiam mite tan Football Tournament leh Badminton tournament buatsaih nise, Chawngte Area Football Association (CAFA) leh Chawngte Badminton Club (CBC) ten lo huaihawt se tiin an kutah dah a ni.

 

 

Kristo Mohan Memorial Badminton Tournament nihnih awh tur vawiin khan hawn a ni.

 

July 17, 2023 Chawngte: Vawiin khan Kamalanagar Badminton Club (KBC) buatsaihin Kristo Mohan Memorial Badminton Tournament, Kamalanagar -III Indoor Stadium ah hawnna neih a ni a, CADC Executive Member i/c Sport dept. Pu Santosh Chakma chu khuallian niin tournament a hawng.

 

Kamalanagar Badminton Club (KBC) President, Pu BH. Shadhan Bikash Chakma kaihhruai hawnna inkhawmah hian CADC Executive Member, Pu Santosh Chakma chuan thu sawiin, infiamna hian inthian thatna leh thawhhona tha a siam a ni a ti. Kristo Mohan Memorial Tournament buatsiah a nih chu lawmawm a tih thu a sawi a, Chakma te tana mi pawimawh tak, Graduate hmasa ber leh a fanu pawh Chakma hmechhe zinga Matric zo hmasa ber an nih thu a sawi bawk.

 

Kamalanagar Badminton club ah hian member 70 vel awmin, tun tum tournament ah hian team 35 an khel dawn a ni.

 

 

Chakma Joint NGO ten thuchhuah siamin Kamalanagar khaw chhung kawngpui siam that a nih theih nan thuneitute an ngen.

 

July 17, 2023: Chakma NGOs lian tak tak pathum, Young Chakma Assocaiton (YCA), Mizoram Chakma Students’ Union (MCSU), Chakma Mahila Samiti (CMS) te chuan nimin khan thuchhuah siamin, Kamalanagar Town Area kawngpui chhiat avanga mipui harsatna tawh chungchangah July ni 5 khan Executive Engineer Tlabung Division hnena ngenna an siamah he hna thawktu tur atan Contractor Pu Malsawm Sangzela ruat a nih thu tarlan a ni a, thuneitu te atanga an hriat danin Pu Malsawm Sangzela hi he hna thawk tura ruat a ni lo tih hriat a ni leh a, an thudawnna fuh tawk loh avanga Pu Malsawm Sangzela hming an tarlang chu pawi an ti hle a, tih mualpho tumna ni lovin, an hriat sual avanga tarlang an nih thu leh an tih sualah thupha an chawi thu an thuchhuahah hian tarlan a ni.

 

Chutih rual chuan Chakma NGOs te hian mipui harsatna sutkian a nih theih nan Kamalanagar khawchhung kawngpui siam that hna chu thuneituten theihtawp chhuaha hma laksak turin an ngen a ni.

Vengchhung kawngpui chhe lai thawmthat hnatlang an nei.

July 15, 2023: Vawiin khan Chawngte 'P' Bethani veng chuan an veng chhung kawngpui chhe lai thawm that hna an thawk a, hnatlang thawk chhuak hi mi 70 vel an ni. 

Chawngte 'P' Bethani vengah hian veng hmasawnna turin Welfare Committee din a ni a, anni hmalakna leh kaihhruaina hnuaiah lungrual takin an thawk a, heng kawng thawm thatna tura senso leh hmanrua lakkhawmna turin mitlawmngai ten an thawh khawm a ni.

Bethani Welfare Committee hmalakna in hmasawnna tur kawng hrang hrang an lo thawk tawh thin a, hnatlang runpui pawh kumin hian tum hnih an neihna a ni tawh bawk.

 Mualbu 'L' Vehicles Association ten kawng thawmthat hnatlang an nei.

 

July 13, 2023: Vawiin khan Chawngte to Mualbu 'L' inkar PMGSY road chu lirthei kal harsa khawpa a chhiat tawh avangin Lawngtlai District, Mualbu 'L' a Lirthei nei in zawmkhawm pawl te chuan an remchan dan anga thawh khawmin hnatlang an kohva, Village Council hotute, YLA leh YMA te nen kawng thawmthat hna hi an thawk a, Mualbu 'L' Vehicle Association member leh Mualbu khawtlang mipui engemaw zat an thawk chhuak a, Mualbu 'L' khua luh hma kawngpui chhe zual an thawm tha a ni.

Sector Officer te pualin Election Training Lawngtlai ah neih ani.

July 11, 2023: Mizoram State Assembly inthlanpui neihtur ah Lawngtlai District ah inbuatsaihna kalpui mek niin, vawiin khan Sector Officer te leh venhimna lam thawktute, DC Conference Hall, Lawngtlai ah Training neihpui an ni.

Lawngtlai District Election Officer, Lawngtlai DC Pu David Lalthantluanga chuan inthlanna felfai leh muanawm tak neih a nih theih nante, vote nei ten kimtaka vote an thlak theih nan te theihtawp chhuah a hmalaturin Training a telte sawmin, an tihtur a duante thataka hlen chhuakturin a chah.

Lawngtlai District ah hian Assembly bial pathum awmin, Tuichawng bialah Polling Station 70, Lawngtlai West ah 69, Lawngtlai East ah 42, a vaiin Polling Station 181 a awm a, heng Polling Station te hi  Sector 29 ah thenin, Sector Officer ten an vil dawn a, Sector Officer 29 ruat an nih bakah thlaveng atan mi panga ruat an ni.

Sector Officer te hi a thawhkhat nan vote thlakna khawl Electronic Voting Machine hmandan leh nihphung te zirtirin hriathriat an ni a, July 24 hmain Sectror Officer te hian an huamchhunga Polling Station ah te EVM hmandan mipuite zirtir vek tura tih an ni

Vawiin a Sector Officer leh venhimna lam thawktute tana Training buatsaih ah hian Additional DC Pu Abraham Beirazi Khithie leh Election Officer Pu Denny Lalchhuanawma ten an hriattur pawimawhte hrilhin, hriatfiahloh leh hriatthiamloh awmte sawihovin inhrilhfiahna hun hman a ni