Chakma Autonomous District Council Monsoon Session thutkhawm vawi hnihna chu vawiin khan neih chhunzawm a ni.

 

August 17, 2023 Thursday: Chakma Autonomous District Council Monsoon Session thutkhawm vawi hnihna chu vawiin khan CADC Session Hall-ah neih a ni. Session-ah hian member 13 an tel.

 

Zawhna leh chhanna hun hawnah zawhna 14 atangin 9 hun pek a ni a, Pu Nirupam Chakma, MDC, CADC chuan zawhna 5 unstarred siamin, Pu Doymoy Daveng Chakma, MDC, CADC chuan unstarred question 3 leh starred question 1 a siam bawk.

 

Private member resolution pathum chu ngaihtuah leh vote thlak turin House hmaah pharh a ni a, Pu Doymoy Daveng Chakma, MDC, CADC chuan Private Member Resolution siamin CADC bill hun rei tak la awm tawhte zirchiang tur leh Mizoram sorkarin a hmaa a pawmpuina tura zawm turin committee din a phut a ni. Resolution hian lungrual takin thlawpna a dawng a passed a ni.

 

Animal Husbandry and Veterinary Department leh allied sector hnuaia beneficiary thlan dan tur kaihhruaina dik tak siam chungchangah Pu Doymoy Daveng Chakma, MDC, CADC chuan member 2 thlawpna a dawng mahse member 11 ten an pawmpui thei lo thung.

 

Chutiang bawkin private member resolution Pu Nirupam Chakma, MDC, CADC chuan Chakma Autonomous District Council hnuaia thawktu lakna tur “CADC Recruitment Board” hminga autonomous body din a dilnaah sawiho in Member 2-in an thlawp a, 10-in an dodal thung.

 

Session hi ni khat atan tihtawp a ni. Naktuk August 18, 2023 hian thutkhawm leh tur a ni.

Ni 13 chhung power supply an dawn loh avangin CADC Area Damdep leh a khaw chhehvel Power line siam in an hnatlang.

 

August 17, 2023 Thursday: Tun hnaia khaw chhiat hnuah Damdep leh a khaw chheh velin Power Supply ni 13 zet an hmuh tawh loh avangin nithum chhung YMA, YCA leh khawtlang mipuite hnatlangin Power line an siam.

 

Damdep YMA hruaitute hnen atanga The Chawngte Times thudawn danin, tunhnaia khaw chhiat atang khan Vaseikai piah lam Parva thlengin ni 13 vel zet eng an hmuh tawh loh thu an sawi a, vawiin thlengin an harsatna ngaihventu department mi leh sa hmel kan la hmu lo an ti.   

 

Damdep YMA hruaitute sawidanin, P&E Department ah hian Bungtlang SDO hnuaiah awm an nih thu sawiin, Vaseikaiah thawktu an in dah a, ni 13 vel eng kan hmuh loh avanga mipui harsatna sukiang tur hian thawktute hmel vawiin thlengin kan la hmu lo hi na kan ti hle a ni an ti. Hetiang a nih avang hian Sorkar hian kan harsatna sutkian a nih theih nan thawktu pawh min dah sak ngei se kan duh a ni an ti bawk.

 

Hnatlang thawh chhuak te hi Damdep – I, Damdep – II,. Damdep –III leh Dursora khua atangin YMA, YCA leh khawtlang mipui thahnem tak an thawk chhuak a, mamawh hrang hrang senso ngai te pawh YMA, YCA leh mitlawmngai thawhkhawm atangin hma an la tih an sawi bawk.

 

 Chakma Autonomous District Council Monsoon Session chu vawiin khan tan a ni.

 

August 16, 2023 Wednesday: Chakma Autonomous District Council Monsoon Session chu CADC Session hall Kamalanagar-ah vawiin khan CADC Chairman Pu Kali Kumar Tongchangya kaihhruaina in neih tan a ni.

Chawhma lamah zawhna leh chhanna hun hman a ni a, Stared question 2 leh un-stared question 7 te chhan fel a ni.

Chawhnu lamah Session neih chhunzawm leh niin, CADC Chief Executive Member, House Leader nibawk Pu Rasik Mohan Chakma in bill 3 pu lulutin sawiho a ni a, heng bill pathum te hi lungrual taka pawm a ni.

1.    The Chakma Autonomous District Council (Salaries and Allowance of CEM and EM) (second Amendment) Rules, 2023

2.   The Chakma Autonomous District Council (Salaries and Allowance of Chairman and Deputy Chairman) (second Amendment) Rules, 2023

3.   The Chakma Autonomous District Council (Salaries and Allowance of Pension of Member) (Third Amendment) Rules, 2023

Vawiin CADC fur thutkhawmah hian Pu Parimal Chakma, MDC leh Pu Khojoy Kumar Chakma MDC te an tell ova, Session hi naktuk Dar 10:30AM a tan leh turin Chairman in a ti tawp a ni.

 

 National Deworming Day an hmang.

 

August 10, 2023: Vawiin khan ramchhung hmundangte ang bawkin Chawngteah National Deworming Day hmangin Chawngte Civil SDO Pu Lalneihthanga Colney leh Sr. Medical Officer Dr. Andrew Khawlthangpuia chuan Chawngte ‘P’ Anganwadi Centre an tlawh.

 

National Deworming Day hi Sr. Medical Officer, Dr. Andrew Khawlthangpuia’n kaihruaiin Nu leh naupangte hnenah National Deworming Day hman chhante leh naupang hriselna tana in zirtirna leh hmalakna tha tak a nih thu a sawi a, naupangin Rulhut a pai theihna kawngte sawifiahin naupangte enkawl dan a zirtir bawk.

 

He hun hi Chawngte SDO (C) Pu Lalneihthanga Colney in hman puiin, naupang te hnenah Rulhut damdawi pe in a ei tir nghal a ni.

LAI, MARA, CHAKMA BJP COORDINATION COMMITTEE MIZORAM PALAI TEN UNION HOME MINISTER PU AMIT SHAH AN  HMU.

August 9, 2023: Nimin khan Lai, Mara, Chakma BJP Coordination Committee, Mizoram palaite chuan Union Home Minister Pu Amit Shah an  kawm. Union Home Minister Chamberah inkawmna hun  neiin, he hunah hian Palaite chuan Mizoram a Autonomous District Council pathum awmte hmasawnna tur hrang hrang te an sawipui a ni.

Mizoram a Sixth Schedule hnuaia Autonomous Council pathum ten hun rei tak an lo dil tawh, Sixth Schedule Amendment chungchangah, Pu Amit Shah chu ngun taka sawipui niin Union Home Minister Pu Amit chuan, India ramah Sixth Schedule hnuaia Autonomous District Council 10 awmte tana duan, 125th Constitutional Amendment Bill chu Central Sorkar in a rang lama passed anih tur thu palai te a hrilh a, tunah hian Manipur issue avangin, Opposition te chuan Parliament Session hi kal hleithei lovin an siam mek a, Bill tam tak a tan mek thu te leh No Confidence Motion te hial putluh a nih avangin Official Bill leh Business chawlh tir vek anih thu te pawh palai te hi lo  hrilh in, hun reilo te chhunga Sixth Schedule Amendment chungchang an hmalak zel dan tur BJP North East Coordinator Pu Sambit Patra kal tlangin hriattir an nih dawn thu a sawi bawk.

Lai, Mara, Chakma BJP Coordination Committee, Mizoram palai te chuan Pu Amit Shah hnena Manipur buaina pawh sawipui in, a rang lama remna leh muanna a awm thuai theina turin Central Sorkar chu hma la thuai turin an ngen pui bawk a ni.

Palai te hian Prime Minister Office (PMO) incharge, Minister Dr. Jitendra Singh leh BJP National President Pu JP. Nadda te chu naktuk hian an hmu leh dawn a ni. 

Kumin hi MLA General Election Mizoram a a awm dawn avangin, tun Parliament Session neih zawh veleh a tam thei ang ber Central Minister te hian Mizoram a an lo kal dawn thu palai te hi a hrilh a ni.

Lai, Mara, Chakma BJP Co-ordination Committee, Mizoram delegation te hi BJP North East Coordinator & National Spokesperson Pu Sambit Patra in a kaihruai in. Palai te hi Chairman, LMC BJP Coordination Committee, Mizoram leh CEM, MADC ni bawk Pu M. Laikaw, BJP National Minority Secretary Pu Delson Notlia, BJP Mizoram State Vice President Pu J.B. Rualchhinga, Ex MLA leh MDC, CADC Pu Nirupam Chakma, Ex MLA & BJP Lawngtlai District President Pu Sapliana Vandir, EM Education, MADC Pu M.H. Tiabi leh BJP Lawngtlai District General Secretary Pu N.C. Muankima te an ni.

 Tuilian avangin Chawngte ah nunphung pangai ala awh thei lo.

August 8, 2023: Ruahsur avanga tui lianin Chawngteah chhungkaw engemaw zat hmun himah dah an ni.

Chawngtea tui lian hi ala kiam thei meuh lova, a len lai ber erawh a thleng pha tawh lo thung. Ruah ala sur deuh reng avangin harsatna lian thleng thei dinhmunah ala ding reng a, Tlawmngai pawl Central YCA, YLA leh YMA te pawhin tanpui ngaite tanpui turin hma an la reng a ni.

Vawiin khan Chawngte a tuilian avang leh inkalpawhna kawng apin avangin dawrkai ten nitin mamawh hralh kawngah rate tih danglam a awm loh nan SDO Civil, Pu Lalneihthanga Colney leh Police Department te nen dawrkai te an kal chilh a, Buhfai leh nitin mamawh te rate tidanglam lova, dan pangaia hralh turin an hriattir a ni. 

Tuilian avanga mahni in luah thei lova chîm leh luah ngam loh khawpa tui hnaite chu hmun himlamah dah an ni a, heng mite pawh hi SDO Pu Lalneihthanga chuan tlawhin tui thianghlim in tur a pe bawk. Chawngte Sub-Division huam chhungah SDO Office in report an dawn danin Chhungkaw 151 te chu mahni in luah thei lova hmun him lamah dah an ni a, chhungkaw 51 te relief camp ah dahluh niin leimin avangin in 29 a chhia tih thu The Chawngte Times an hrilh.

An hriselna dinhmun en dikin Sr. Medical Officer Dr. Andrew Khawlthangpuia leh Medical team te chuan hma an la nghala damlohna nei te chu Damdawiin lamah an dinhmun enfiah tura hruai nghal an ni.

Hetih lai hian Lawngtlai DC atanga mipuite hriattirna chhuahin India Meteorological Department a tanga an hriat danin August ni 13 thleng hian ruahtui tla nasa tura rin a ni a, mipui te chi-ai lo tur leh zinchhuak rih lo turin a hriattir a ni.

 NEWS: Leimin avangin Chawngte leh Lunglei inkarah lirthei atlan tlang thei lo.

 

August 7, 2023 : NH 302 Lunglei leh chhumkhum inkar hriattheih chinah leimin hmun hnihah awmin tun dinhmunah Chawngte leh Lunglei inkarah lirthei eng chimah a tlan tlang thei lova, khualzin phur (Maxi cab) lirthei pawh an let.

 

Thudawn danin Leimin awmna hmun hi Hauruang khaw bul leh Chhumkhum – phairuang inkarah leimin hi awm nia hriat a ni. 

 

 

 

Tuilian in Chawngtea veng thenkhatah chenna in luah theih lovin a chîm.

 

August 7, 2023: Ninga ni atanga ruah sur avangin tui alian hle tawh a Chawngte a veng thenkhatah chenna in luah theih lohvin a chîm tawh a, tuiin chîm hlauhawma awm te pawh engemaw zat an in thiar chhuak.

 

Kamalanagar -IV ah tuilian avangin in luah theih lova chîm awmin, Kamalanagar - I New Angel School thlang lamah pawh tuilian hian in a chîm bawk a, mitlawngngai ten an bungrua an thiarchhuah pui a ni.

 

Ruah hi ala sur belh zel chuan hlauhthawn awm engemaw zat a awm tura ngaih a ni a, chhiatna nasa zawk a thleng thei a, mipuite kan in ralrin a tul âwm e.

 

Tun dinhmunah (9:30AM) tuilian avanga mihring thi leh hliam hriattur ala awmlo.

 

Football ground pawh tui a tling nasa hle a, drainage athat tawk loh vang a ni thei