Chawngte NGO hrang hrang hruaitu thukhawm chuan CHC tih changtlun a nih theih nan hmalak an rel.

 

February 29, 2023: Vawiin khan Lawngtlai District chhung, Chawngte a NGO hrang hrang hruaitu thukhawm chuan Chawngte khawpui chhung hmasawnna tur ngaihtuahin hmalak an rel.

 

Lawngtlai District Students Association huaihawta neih, meeting hi LDSA President Pu F. Lalkulhchungnunga’n kaihruaiin Chawngte ’P’ YMA Library-ah an thukhawm a, Community Health Centre Chawngte tih changtlun theihna tur leh CHC in a ken tel Staff indaih lohna te chu Sorkar thuneitute hnena thlen nise tiin an rel a, MBBS Doctor neih belh chungchang te, Ultra Sound khawl neih dan tur te, X-Ray khawl tha neih theih dan tur leh a enkawltu tur chungchangte, Ambulance pakhat tal dah a nih theih nan te, thawktu post hrang in daihlohna te chu thuneitute hnenah thlen nise an ti.

         

Tin, heng bakah hian venhimna lam thawktu Police indaih lohna te pawh thuneitu sang zawk hnenah thlen nise an ti bawk a, hun remchang hmasa berah bawhzui tura intirh nise an ti a ni.

 

 LADC CEM Pu V. Zirsanga chu CEM a nihna atangin bang turin an phut.

 

February 28, 2024 : Lai Autonomous District Council a Member of District Council (MDC) 13 te chuan vawiin khan hming ziakin CEM nilai Pu V. Zirsanga chu bang turin an phut.

 

An lehkha a ziahlan danin eiruk thubuai avanga Convict hial a nih avangin  Lai Autonomous District Council a Chief Executive Member nihna zahawm tak la chelh zui zel chu Lai ram leh hnam tan mualphonaah an ngaih thu ziak langin, MDC 13 te hian a kaihhruai sorkar chu kal zel tlakah an ngaih loh avangin CEM nihna chu bansan turin an phut a ni. 

 

 

 Longpuighat PHC chu Doctor a awm veleh function tir a ni ang. - Health Minister

 

February 22, 2024 Thursday: Vawiin a Mizoram Assembly Budget session neihah Lawngtlai West bialtu MLA Pu C. Ngunlianchunga zawhna chhangin, Health Minister Pi Lalrinpuii chuan Longpuighat PHC chu Doctor kan neih velleh function tir a ni ang tih a sawi. Tuichawng Bialtu MLA Pu Rasik Mohan Chakma pawhin, Borapansury PHC hi PPP Model ah khan a function na a rei tawh a, 2019 ah khan District Council in kan zo love tiin Health Department ah kan thlen tawh a, kum 2019 July thla atangin Mizoram Sorkarin a take-up ang tih order a awm tawh a, tun thlengin hmalakna a awm loh thu a sawi a, Mizoram Sorkar hian engtikah nge a enkawl ang tih leh CHC Chawngte hi a hmang tangkaitu leh mamawhtu kan tam a vangin Sub-Divisional Hospital ah hlankai theih dan a awm em? tih zawhna a siam a Health Minister chuan Sorkar dan awm tawh a nih avangin Borapansury PHC chu a function theih dan tur ang ang a ngaihtuah mek a ni a ti a, CHC Chawngte erawh chu Sub-Divisional Hospital a hlankai theih dan tur chhanna duhawm a awmlo thung.

Lawngtlai District Students' Association in Lawngtlai District ti hming thatu Nl.Zorinsangi (MCS) Chawimawina thuziak an hlan

Dt.20.2.2024 Tuesday khan Lawngtlai District Students' Association chuan Nula Zorinsangi D/o T. Malsawmdawngliana college veng Lawngtlai chu, Mizoram Civil Service (Combined Competitive Examination) 2023 a pahnihna anih lawmpuina leh chawimawina thuziak hlanna hun an hmang a. He hun hmannaah hian LDSA Adviser Pu H. Lalramhluna chuan, Nl. Zorinsangi chu Lawngtlai college veng mai bakah, Lawngtlai District pumpui ti hmingthatu a ni tih sawiin, LDSA chuan a hlawhtlinna a an lawmpui thu leh, Lawngtlai District a awm thalaite tana entawn tlak ni zel turin a fuih a ni.

Nl. Zorinsangi te chhungkaw lam atangin Nl. Zorinsangi Pa, Pu T. Malsawmdawngliana chuan thu sawi bawkin, LDSA ten an fanu chawimawina an hlan chu a lawmawm atih thu leh, Lawngtlai District in zirna mai bakah, kawng hrang hranga hma asawnna kawnga hna thawktu ni tura LDSA din a ni chu tha a tih thu a sawi bawk.

Nl. Zorinsangi chawimawina hun hmannaah hian LDSA hruaitu atangin Nl. Lalpriskili leh Tv. Lalpekhlua bakah, LDSA member atangin Tv. Mafana Fanchun, Nl. Esther Lawmsangzuali leh LDSA Adviser Pu H. Lalramhluna te an tel a ni.

 

 Mizo Zirlai Pawl, Sub-Hqrs. Chawngte in zirlai titha te chawimawina an hlan.

 

February 13, 2024 (Tuesday) : Vawiin khan Mizo Zirlai Pawl Sub-Hqrs. Chawngte chuan zirlai tithate chawimawina hun Chawngte BDO Conference Hall ah hmangin General Headquarter Vice President, Pu C. Lalremruata chu khuallian niin a hman pui a, zirlai 26 te thilpek an hlan.

 

Vawiin a zirlai titha chawimawina hun an hmanna hi Pu Jefferson Ramdinmawia President in a kaihruaia, Pastor Ngurchhuana UPC (NEI) in hunserh hmangin, Khuallian Pu C. Lalremruata chuan thu a sawi a, Sikul tha leh khawpuiah sikul kan kal theilo a nih pawhin kan zirna hmun theuhah theihtawp chhuaha kan beih chuan hlawhtlinna tha a chan theih tho tih a sawi a, zirlai te chu ram, khawtlang leh chhungkaw tan chhawr tlak nitur a zir turin a fuih a ni.

 

Zirlai titha chawimawina inkhawmah hian Secretary Pu Remruatdika chuan report pein, Adviser Pu Vanlalduhawma pawhin thu a sawi.