Chawngte Joint NGO ten hruaituten Sorkara an mamawh leh harsatna an thlen tawhte chu August 13, 2024 thleng hmalakna ngaihchan phawt an tum.

 

July 18, 2024: Vawiin khan NGO pakua telna Joint NGO's Chawngte chuan Lawngtlai Press Club ah thuthar thehdarhtute kawmin Mizoram Sorkar a Minister pathum te hnen a ngenna an thlen tawhin awmzia a neihloh vanga an lungawiloh thu leh thlathar August 13 thleng ngaihchan an tum thu leh hemi hnuah a tul chuan nazawka Sorkar nawr an tum thu an sawi.

Chanchinbumite an kawmnaah   May 8 & 9, 2024 khan Aizawl-ah kalin Jt.NGO hruaituten PWD, Health leh Home Minister te hmuin mamawh tamtak an neih zingah an mamawh zual tak tak chauh ngaihpawimawhsak tura an ngenna chuan vawiin thlengin ngaihsak a hlawhlo niin an sawi a, hriatthiam har an tiin, inngaihsaklohna leh inthliarna ang hiala an ngaihthu an sawi.

 

Jt NGO hruaitute chuan Chawngte khawchhung bikah ringawt pawh mihring 13,448 awmin, Police indaihlohna a lian hle niin an sawi a, tun dinhmunah Chawngte Police Station ah awm thei tur a tih mi 24 ah mi 6 chauh an awm a, Constable phei chu pakhat chiah a awm niin an sawi a, Home Minister hnena Police an mamawh belh thu an thlen chuan awmzia a la neilo niin an sawi.

 

Community Health Centre Chawngte hnuaiah mihring 24,939 awmin hmanrua chi hrang hrang ah a tlabalin thawktu an indaihloh hle tih an sawi a, thildang engemawzat zingah Doctor pakhat tal dahbelh tura an ngenna chuan ngaihven a hlawh lovin, June 6, 2024 a Doctor 35 lak thar zingah Chawngte ah dahtur ruahman a nivelo chu hriatthiam har an tih thu an sawi a, CHC Chawngte ah thawktu awmtheitur a ngaih mi 46 a nihlaiin tun dinhmun ah mi 22 chauh an awm thu an sawi bawk.

 

SASCI hnuaiah Chawngte khawchhung kawngpui siamthat tura tih chu hna chu mumal taka thawh a awmlo niin Jt NGO Chawngte hruaitute chuan an sawi a, tunthla Ni 22 hi he hna zawhfel huntur a tih anih laiin Water bound Macadam (WBM) takngial pawh phah zawh a la nilova, an phahsa pawh ruahsur vang leh hmanrua thalo hman vangin a chhe deuh vek niin an sawi bawk.

 

Tun dinhmun ah Chawngte leh Diltlang South inkar leh Chawngte leh Lunglei inkar chu lirthei tan kal harsa khawpin a chhia tih Jt.NGO Chawngte hruaitute chuan an sawilang tel bawk.

 

Jt. NGO Chawngte hruaitute chuan Sorkara an mamawh leh harsatna an thlen tawhte chu August 13, 2024 thleng hmalakna ngaihchan phawt an tum thu leh hemi hnuah hmalakna an lungawina ang an hmulo a nih chuana nazawka sorkar nawr an tum thu an sawi.

 

Jt. NGO Chawngte hruaitute chuan hun kaltawhah Sorkar a an thil thlen thinah te inbumna anga ngaihtheih, thawktu dahbelh leh thildangah an lo tawngfo thin tih an sawi a, mihring hmuhtur awmlo thawktu dahbelh ang chite, reilote thawka, hmundanga lakchhuah leh ang chite an lo tawkfo thin chu inzahlohna leh inhmuhsitna ah an ngaih thu an sawi lang tel bawk.

Chawngte khawchhung kawng chhe lutuk avangin vawiin khan Chawngte Civil SDO Conference Hall ah khawtlang hruaitute leh PWD aiawh leh Contractor aiawh an thukhawm.

 

July 16, 2024: Vawiin khan Chawngte Civil SDO, Pu Daniel Sailo kaihruaina in SDO Conference Hall ah Chawngte a tlawmngai pawl hrang hrang hruaitute, Zirlai pawl hruaitute, PWD Department aiawh leh Contractor aiawh te chu Chawngte khawchhung kawng siamthat a nih theih nan tul leh pawimawh sawihona hun an nei.

 

Khawtlang hruaitute chuan SASCI hnuaiah Chawngte khawchhung kawngpui siam hna hi July ni 22, 2024 hi hnathawh zawh hun tura tih a nih chung pawhin vawiin thlengin hnathawhna hnuhma duhawm hmuh tur ala awmlo chu pawi an tih thu an sawi a, nikum lam atang tawhin vawi tam tak nawr ni mahse ataka hlawhtlinna awm lo chu pawi an tih thu an sawi. Hetih lai hian Contractor lam chuan Lung tha lak tur a tam tawk loh avanga hna a chak theih loh thu an sawia, tuna lung an lakna bakah lung lakna tur Lungtha awmna zawnchhuah kawngah pawh chak zawka hmala turin Department hotute pawh an beisei thu an sawi bawk. Fur ruahtui tam lai a nih avangin blacktop hna thawk thei lo mahila, heng kawng chhe lai hi thlakhat (1 month) chhungin Boulder phah chhuak vek turin an beisei a ni.

 

Khawtlang hruaitute chuan Ningani hian kawng chungchangah leh Chawngte khawchhunga office leh hmun pawimawha thawktu indaih loh chungchangah an hmalak tawhna leh Mizoram sorkar nena an in dawr tawn tawhna zawng zawng te chu thuthar thehdarhtute kawmin an puangzar dawn tih an sawi a, SDO Pu Daniel Sailo chuan thuneitu sangzawk lamah pawh thlenpuia, theihtawp chhuahin hma ala dawn tih khawtlang hruaitute a hrilh nghal a ni.

 

 

 NEWS: Vawiin Dt.13.7.2024 khan Joint NGO Chawngte chuan meeting neiin, May Ni.8 & 9, 2024 a Health Minister, PWD Minister leh Home Minister hnena Chawngte khawtlang harsatna leh mamawh an thlen te, thla hnih hnu ah pawh chhanna an la hmuhloh avangin hmalak zel dan tur an rel.

 

He Meeting hi LDSA chuan kaihruaiin, meeting ah hian Dt.8.5.2024 ah Health Minister hnena Chawngte CHC a MBBS pakhat leh X-Ray Technician awmlo chungchang leh, hriselna kawnga chawngte khawtlang hmasawnna tura thawktu dang indaih lohna te thlen anih thu sawi  a ni a. Health Minister hnena thu an thlen hnu ah pawh Health Department hnuaiah Doctor 35 appointment pek thar an awm thu leh Chawngte CHC a MBBS lak thar dah an ni velo chu a pawi an ti a, tin, MBBS chauh nilo thawktu dang leh hmanrua leh lirthei mamawh an thlen te pawh pakhat mah pek an nilo tih an sawi a ni.

 

Dt.9.5.2024 ah Joint NGO Chawngte hian PWD Minister leh Home Minister hmu leh nghalin, PWD Minister hnenah hian Chawngte khawchhung kawngsiam mek chungchang an thlen a, a bikin Chawngte 'C' khawchhung kawng vawiin thlenga siam that ala nilo chu a pawi an tih thu sawiin, Chawngte 'C' leh Chawngte 'L' khawchhung kawng la siam zawhloh te chu a hma thei ang bera siam zawh anih theih nan a hmalak zel dan tur meeting ah hian an sawi bawk  a ni.

 

Dt.9.5.2024 ah vek hian Joint NGO Chawngte hian Home Minsiter hnenah Chawngte Police Station a thawktu indaihlohna an thlen tawh thu meeting ah hian sawi ni in, thawktu dahbelh aia, constable awmchhun Dt.25.6.2024 a Mizoram sorkar in a sawnchhuak chu apawi an tih thu sawiin, Chawngte khawtlang zahlohna ah an ngai tih meeting ah hian an sawi bawk.

 

Joint NGO Chawngte hian Minister pathum hnena an thu thlen te bawhzui leh tihhlawhtlin sak an nihloh avangin, Press conference Dt.18.7.2024 Thursday hian Lawngtlai Press Club ah neih nise an ti a, he press conference ah hian Joint NGO Chawngte Resolution puanchhuahna an nei dawn a ni. Joint NGO Chawngte Meeting ah hian YMA Chawngte Group, YLA Sub Headquarters Chawngte, MHIP Chawngte ‘P’ Branch bakah Chawngte P Thalai Pawl, Mizoram Chakma Students’ Union (Central), Central Chakma Mahila Samiti, Central Young Chakma Association leh Lawngtlai District Students’ Association aiawhte an tel a ni.

 

 Zirlaite hian kan zirlai tluk zetin Pathian thu Bible ngainat hi hlawhtlinna bul a ni.

- Daniel Sailo SDO (C)

 

July 12, 2024: Nimin khan Mizo Students' Union Headquarters Chawngte chuan Chawngte Area zirlai titha lawmpuina hun an hmang a, Chawngte SDO (C) Pu Daniel Sailo MCS chuan khuallian niin a hmanpui.

 

Zirlai titha lawmpuina hun hi Chawngte 'P' Community Service Centre ah hmangin MSU Vice President Felix Lalnundawnga'n a kaihruaia, MSU President Steven Lalramtluana'n thu a sawi, MSU President chuan MSU hmalakna hrang hrang sawiin, Govt. Kamalanagar Higher Secondary school ah lecturer indaihlohna Mizoram sorkara an thlen chu hlawhtlinna tluantling hmuh ala nilova, vawiin atanga ni sarih ralhmaa tihhlawhtlin anih loh chuan MSU hian na takin hma kan la dawn a ni a ti.

 

Khuallian Pu Daniel Sailo MCS SDO(C) chuan thu sawiin, Zirlaite hian zirna tluk zetin Pathian thu Bible ngaina, mahni nun uluk taka vawng turin a chah a, hlawhtlinna tha tak chang turin zirlaite chu duhsakna a hlan a ni.

 

Vawiina zirlai tithate lawmpuina hun hmanah hian HSLC, HSSLC leh Under Graduate 2024 exam a 1st division chin zirlai 36 te hnenah lawmpuina thilpek an hlan a ni.

 

 Chawngte ah India Independence Day 2024 lawmna hun hman dan tur an rel.

 

July 12, 2024: Vawiin khan Chawngte Civil SDO Conference hall-ah SDO, Pu Daniel Sailo kaihhruaina hnuaiah Chawngte a India Independence Day hman dan tur an rela, Sorkar mipawimawh leh khawtlang hruaitute an kal khawm.

 

Kumin I-Day lawmna hun hman dan tur sawiho a ni a, Football tournament buatsaih nise tih a nia, Chawngte Football Ground ah Zing dar 8:30AM ah ram puanzar pawhpharh a ni anga, March past tur contingent 10 leh hnam lam hmuhnawm tak tak beisei an ni. Tin hemi nia tul leh pawimawh buaipui ngaite pawh chanvo inruat nghal a ni bawk.

 

'Chawngte khawchhung kawng siamthat hi hna hmasaah kan neih a tul' 

– Pu Daniel Sailo, BDO Chawngte

 

July 12, 2024:         Vawiin khan Chawngte Block Development Officer, SDO (C) ni bawk, Pu Daniel Sailo chuan Kamalanagar Town Area a, VCP leh PWD hotute kawmin Chawngte khawchhung kawng chhe lutuk chu siamthat theih dan tur a sawipui a, tun dinhmunah mipui leh zirlai ten kawng chhiat avangin harsatna an tawk mek tih ka hria a, hna hmasaberah kawng siamthat hna hi thawh a nih nghal theih nan hmalak a duh thu a sawi.

 

PWD aiawh pawhin Chawngte khawchhung kawng siamthat hna hi Contractor kutah awmin hna hi arang theih ang bera thawk turin an hriattir tih a sawi a, fur lai a nih avangin duh angin hna thawhchak a har thute a sawi bawk. BDO Pu Daniel Sailo chuan PWD in an khawih loh tur chin kawng chhe lai chu thawmthat hna thawk turin hma kan la nghal ang a ti a. a remchan dan ang anga hna tan a nih tur thu a sawi a ni.

NEWS: Chawngte ‘P’ a Bethani Welfare Committee chuan thuchhuah siamin, Govt. High School Chawngte fencing chu tu tih hriat loh kut tuara tihchhiat then a nih chu pawi an ti hle a, hetiang hi thleng nawn tawh lo se an duh thu an tarlang.

 

July 10, 2024: Vawiin khan Chawngte ‘P’ a Bethani Welfare Committee chuan thuchhuah siamin an vengchhunga sorkar hmun pawimawh awmte chu a chiat leh thatah mawhphurtu a inngaiin theihtawp chuahin enkawlin hma an lo la thin a, tun hnai maia Govt. High School Chawngte Fencing chu tu tih hriat loh kut tuarin tihchhiat then a nih chu pawi an ti hle a, tun hnuah chuan heng sorkar hmun pawimawh tak tak Govt. High School, PHE Office, Gas Go-down etc. compound ah te ruihhlo tih nan leh tichhe tura chetlakna hi thleng nawn tawh lose an duh thu tarlangin hetiang titu hriatchhuah an nih chuan dan ang taka action lak a ni dawn tih an thuchhuahah hian an tarlang a ni.

 

 

 PRESS RELEASE

 

" LADC Chairman in CCB rules palzút a session a kaihruai hi a pawi kan ti."

- ZPM Lai Dist. Hqtrs. Lawngtlai.

 

LADC Emergency Session neih mekah, Chairman Pu VL. Hmuaka chuan CCB rules bawhchhia in Deputy Chairman thlanna a kalpui a, heihi LADC dan palzútna leh mipuite zahlohna lian takah kan ngai a ni.

 

Dt. 08th July, 2024 (Wednesday) - a LADC Emergency Session ah, LADC Chairman hian LADC inkaihhruaina dan The Lai Autonomous District Council (Constitution, Conduct of Business etc.) Rules 2010 ; Chapter - VII, 'District Council Session Conduct and Business Thereof- General', Rule 54 (List of Business) clause (1) leh, Chapter - XIII 'Conduct of Business - Miscellaneous' Rule 141 (District Committee and Power of the Chairman) clause (3) te bawhchhiain Deputy Chairman thlanna a hun taka kalpui lovin, dan in a sawi ang hunbi leh kalphungte bawhchhiain, chawpchilh leh hmanhmawh takin Deputy Chairman inthlana neih a ni a. Heihi LADC dan leh mipuite zahlohna lian tak niin, LADC Chairman hian a mawhphurhna leh CCB rules a hrechianglo ah kan ngai a, a pawi kan ti hle a ni.

 

Hetih lai hian, ZPM Legislature Party Leader Pu K. Hre Kung leh a thawhpuite'n dan palzútna awm reng chunga session a tel duh lova, ZPM Legislature Party member te'n session hall an chhuahsan ngam hi an huaisen kan tiin, dikna an duhna hi kan chhuang tak zet zet a. INC leh MNF inzawmte kaihhruai ULP sawrkar hian LADC dan leh dunte palzút a, Pathianin min pek he ram inrelbawlna sang ber hi zahlo taka enkawl tawhlo turin kan ngen bawk a ni.

 

 

Issued by :-

Media, IT & Publicity Dept.

ZPM Lai Dist. Hqtrs Lawngtlai.

(PR No. 31/ZPM-LD/PR-24)

Dated Lawngtlai,

10th July, 2024.

 

Condolence meeting held for Late Dg. Jayan Chakma, Executive Engineer, CADC

 

July 2, 2024: A solemn condolence meeting was held today at the CADC Secretariat Office in honor of late Mr. Jayan Chakma, Executive Engineer, Public Works Department, CADC, who passed away early this morning. The meeting was conducted by Mr. Montu Chakma, Executive Member and in-charge Chief Executive Member, and was attended by the Councilors and officials of CADC.

 

Late Dg. Jayan Chakma was born on January 1, 1968, and joined the CADC as a Cultural Assistant on September 17, 1987. He was eventually promoted to the post of Executive Engineer in the Public Works Department (PWD).

 

The eulogy of the departed Executive Engineer was read by Dg. Montu Chakma, highlighting his invaluable contributions to the CADC through the Public Works Department and his efforts in the development of the Chakma language, scripts and the preservation of the Chakma culture.

 

Dg. Jayan Chakma passed away due to liver cirrhosis at 2:40 AM on July 2, 2024, at the age of 56 years.

 

A silent prayer was observed for the peace of the departed soul.

 

Published by: Information & Public Relations Department, Chakma Autonomous District Council