Chawngte hi ka tan hard posting ah ka ngai lova, Chawngte hian hmangaih tu a mamawh niin ka hmu. 

- Lalnunpuia Renthlei SDO (C)

January 14, 2024: Vawiin khan All NGO Join Committee hruaitute leh SDO (C) Pu Lalnunpuia Renthlei te a pisa ah inkawm hona an nei a, Chawngte khawchhung hmasawnna tur an sawi ho. 

Join NGO Committee Chairman Joseph Lalchhingpuia leh a thawhpui khawtlang hruaitute chuan kum kalta a an thil phût te tihhlawhtlin tam tak karah khawtlang mamawh em em, Health department lamah kan beisei leh sorkar lam thuneitute intiamna vawiin thlenga tihhlawhtlin loh te hi na taka nawr leh an tum thu an sawi.

SDO Pu Lalnunpuia Renthlei MCS chuan, Chawngte hian hmangaihtu a mamawh hle niin ka hria a, khawchhung kawng dinhmun leh thil tamtak thlirin hna thawhtur a tam hle a ni a ti. Chawngte hi ka tan Hard Posting ah ka ngai lova, ka nu leh pa ten min awmpui avangin rilru nghet takin ka awm dâwn a ni a ti. SDO leh BDO ka nih angin hmasawnna hnathawh tur awm ang angah theih tawp chhuah ka tum a ni a ti bawk. SDO hi Chawngte SDPO Pu R. Lalthankima'n a ṭawiawm a ni.

 India Republic Day lawmna hun hman dan tur an sawi ho.

January 14, 2024 : Vawiin khan Chawngte Civil SDO, Pu Lalnunpuia Renthlei kaihhruaina hnuaiah India Republic Day lawmna Chawngte a hman dan tur an sawi ho.

SDO Conference hall a meeting neihah kum 2025 India Republic Day lawmna prog hi Chawngte Playground hman nise, zing dar 8:00AM ah hnam puanzar pawtpharh turin Khuallian atan SDO (C) Pu Lalnunpuia Renthlei beisei a ni. March pass contingent atan School leh NCC te beisei an ni bawk.

Republic Day lawmna tura mawhphurna hrang hrang ruahman a ni a, kumin hi Kristian te hun pawimawh Sunday a nih avangin prog lian tak erawh an siam lo. VIP hian Chawngte Damdawiin tlawhin damlo te hnenah thil pek hlan se an ti a ni.

 Chakma Autonomous District Council, Village Council inthlan lo awm tur atan Draft Electoral roll tlangzarh a ni.

 

January 08, 2024 : Vawiin khan Chawngte SDO (C) Conference hall ah Lawngtlai District Election Officer, Lawngtlai Bawrhsap, Pu Cheemala Siva Gopal Reddy, IAS chuan Chakma Autonomous District Council huam chhunga Village Council inthlanna neih huna hman tur Draft Electoral roll a tlangzarh.

 

Electoral Roll tlangzarhna inkhawm hi Election Officer, Pu Collin Hlychho in a kaihhruai a, Draft roll tlangzarh tura hmalak dan tlangpui tarlangin, chak taka hma latu VLO leh Election Branch thawktute hnenah lawmthu a sawi a, Draft roll hi January ni 16, 2025 thleng siam that ngaite siamtha tura thehluh theih tih a sawi.

 

Vawiina tlangzarh Draft roll a alan danin CADC Area ah hian Village Council 88 a awm a, Voter hmeichhia 17,682 awmin mipa 18,212 an vaiin 35,894 an awm mek a ni, polling station khata vote tam berna 19-Kamalanagar -I niin, voter tlem berna 3-Boranasury a ni bawk.

 

Draft roll tlangzarhna neih zawhah Election officer, Pu Collin Hlychho kaihhruaina in VLO training neih chhunzawm a ni.

 

Lawngtlai bawrhsap, Pu Cheemala Siva Gopal Reddy chuan Chawngte a, hmasawnna hnathawh hrang hrang te a hmunah enfiah nghal a, Addl. DC. Pu Zoramsiama Hmar in a tawiawm.