State Bank of India, Chawngte Branch chuan mipui ten tangkai taka an hman theih nan Chawngte ‘P’ ah ATM an hawng

 

July 22, 2025 Chawngte: Vawiin khan State Bank of India Chawngte Branch chuan Chawngte ‘P’ ah SBI ATM hawnna hun hman a ni.

ATM hawnna inkhawm hi SBI Chawngte Branch Manager Pu Zonunsanga chuan kaihruaiin ATM dah a nih theih nan hmalak dan tlangpui a sawifiah a, Pro Pastor R. Lalengkima’n hunserh a hmang.

SBI Lead Manager Pu JM Soren chu khuallian niin, SBI ATM chu mipui ten tangkai taka an hman theih nan lawm takin a hawng a, Chawngte ‘P’ VCP Pu Lalrozama leh YMA President Pu HC. Lalthlangliana’n thusawiin, SBI Chawngte Branch Manager thar Pu Robert Lalruatsanga’n lawmthu sawina hun a hmang a ni.

Chawngte ‘P’ a ATM hawn thar hian ATM Card keng lo pawhin UPI transaction hrang hrang hmangin pawisa alak chhuah theih a, pawisa note Rs. 500/-, Rs. 200/- leh Rs. 100/- dah luh a ni. Tun dinhmunah E-Surveillance Camera vuah fel a nih loh avangin zan lamah ATM hi hawn theih a ni dawn lova, E-Surveillance Camera vuah fel a nih hnuah erawh chuan 24hours a hman theih thuai beisei a ni.

Chawngte-ah ruihhlo thahnem tak halral a ni.

 

July 18, 2025 Chawngte : Vawiin khan Chawngte Area Anti Drug Squad chuan Chawngte playground bulah ruihhlo an man te tihralna hun hmangin Chawngte SDO(C) Pu Lalnunpuia Renthlei in a hman pui.

 

Chawngte Area Anti Drug Squad Chairman, Pu C. Lalhmunmawia chuan ruihhlo halralna inkhawm a kaihruai a, Mizoram Sorkar chuan Ruihhlo do turin khaw tinah Village Level Task Force on Ruihhlo do Committee din tura a tih angin Chawngte ‘P’ ah din a ni a, sawt zawka Chawngte khawpui chhunga ruihhlo do anih theih nan Chawngte Area Anti Drug Squad chu May ni 3, 2025 khan din chhunzawmin chak taka hmalak a ni a ti. Ruihhlo chi hrang hrang Zu, Drug leh Ganja te man a ni a, Damdawi leh Ganja te chu him taka dah khawmin vawiin hian kan hal ral dawn a, Zu kan man tam takte chu tihchhiat nghal zel a ni thung. Vawiin kan halral tur ruihhlo kan man zawng zawng hi Rs.6,98,000/- man hu nia chhut a ni a, hetiang zat ruihhlo man thei tura tha leh zung sengtu zawng zawng hnenah lawmthu a sawi a ni.

 

Chawngte SDO(C) Pu Lalnunpuia Renthlei chuan thu sawiin, Hetiang zat Chawngte ah ruihhlo man nih hi lungchhiattlak a tih thu sawiin man chhuah a nih erawh lawmawm a ti hle bawk. Chawngte Area Anti Drug Squad te thawhrimna leh inpekna te chu lawmawm a tih thu sawiin, kan thalai ruihhlo in a tih buai te chhanchhuak turin theihtawp chhuah zel turin a fuih a, tanpui an ngaihna pianga tanpui turin a inpeih reng thu a sawi a, Chawngte ah ruihhlo danchah a nih theih nan leh thalai ruihhlo bawiha tang mekte an chhanchhuah a nih theih nan Ruihhlo an man te chu a hal a ni.

 

Vawiina ruihhlo halralna inkhawmah hian tlawmngaipawl hrang hrang hruaitute kal khawmin Police Department aiawh pawhin thu an sawi bawk. 

 Chawngte a Samagra Shiksha Office dangin, office an khar tir.

 

July 7, 2025 Chawngte: Vawiin khan Chawngte a tlawmngaipawil inzawm khawm Joint NGO te chuan an hmalakna kal mek chhunzawmin Chawngte a Samagra Shiksha office kawtah lungawilohna lantirin office kal tur an danga, office khar tir a ni.

 

Tarlan tawh angin Block Resource Centre Kamalanagar Chawngte a thawk tur lak chungchanga thil fello tak avanga Mizoram sorkar kan ngenna chu vawiin thlenga chhanna duhawm leh lawmawm engmah anla dawn loh avangin lungawi lohna lantir chhunzawmin Chawngte a Samagra Shiksha office chu khar tir a ni a, Joint NGO te chuan resolution siamin an puang chhuak a, diklo taka hnalak chungchangah Mizoram Sorkarah hetiang hian ngenna an siam nghal a ni.

 

1. Mizoram Sawrkâr hian Block Resource Centre, Kamalanagar, Chawngte a thawk tûr tahrik 29 May, 2025 a tihchhuah Samagra Shiksha, Mizoram hnuaia Foundational Stage (FS) Helper leh PM SHRI hnuaia Music Instructor, Sports Instructor leh Hindi Instructor tûr a tihchhuah chungchângah thil fel lo a awm avângin dik lo taka hnalâk tawh chu zirlaite hmakhua ngaia cancel vekin advertisement chhuah ṭha leh rawh se.

2. Interview Board Member pawh a thar veka thlâk ni rawh se.

3. Tûn hnuah Sawrkâr hnalâk rêng rêngah a thiam leh phu te ngêi lâk an nih theih nân dik tak leh felfai taka hmalâk ni tawh rawh se.

4. Sawrkar thiltihah Party Workers nawrluihna avâng mai maiin sawrkâr hnathawktute chungah diklo takin thunnuna lekkawh ni tawh suh se.

5. Interview Board Member Secretary Pi Juhnee Chakma Repatriate Order cancel ni rawh se.  tih te hi an ni.

 

Joint NGO te chuan an lungawilohna tinlanna tura Samagra Office khar tir a nih chungchangahmipuite hriatthiamna an ngen a, midangte ruala hmasawnna rahbi rap ve thei turin Joint NGO hmalakna te in lungrual taka thlawp tlat turin mipute an sawm nghal a ni.

 

Joint NGO te hian ni hnih chhung chawngtea zirna in zawng zawng an khar tir hnuah hmasawnna duhawm engmah an la hmuh loh avangin Samagra Office hi khar tir leh a ni a, Mizoram sorkar atanga chhanna duhawm an dawn hma loh chu chak taka hmalak zel an tum a ni.

Joint NGO Chawngte chuan lungawi lohna lantirin Chawngtea zirna in 35 khar tir an ni a, sorkar in chhanna duhawm an pek hma loh chuan an thu-ah an ding reng dawn.

 

July 2, 2025 Chawngte: Chawngte a tlawmngai pawl in zawm khawm Joint NGO te chuan tun hnaia CADC huamchhunga hnalak chungchangah dikna aia Political pressure avanga harsatna thleng mek hi pawi an ti hle a, hemi chungchangah sorkar nen tha taka inbiakna a kal theih loh avanga zirna In khar tir an nih thu an sawi a ni.

 

Joint NGO Chawngte Chairman, Joseph Lalchhingpuia chuan, Joint NGO te hian dikna kan duh a, hnalak chungchangah Political pressure avanga heng harsatna thleng hi a pawi kan ti hle a, Sorkar do zawnga kal kan duh lo hle a, inbiakna fel leh hlawhtling tak neih kan duh laiin chhanna duhawm kan dawn loh avangin vawiina kan hmalakna hi loh theih lohna avanga ni a ti. He kan hmalakna avanga tuartu zirlai te leh zirlai nu leh pa te pawh pawi kan tih pui hle a, amaherawh chu hmalam hun ngaihtuahin kaltlangpui an nih thu a sawi bawk.

 

Tarlan tawh angin, Joint NGO thuchhuah chuan Tahrik 19th – 23rd May, 2025 chhunga Block Resource Centre, Kamalanagar, Chawngte (CADC area bik tân) a thawk tûr Samagra Shiksha, Mizoram Foundational Stage (FS) Helper leh PM SHRI Music Instructor, Sports Instructor leh Hindi Instructor tûr Interview kaltlanga lâk chungchângah Joint NGO Chawngte chuan diklo taka hnalâk a awm ngeia a hriatna an nei a, interview Board member te pawhin dik tak leh fair taka a thiam leh phû te ngêi lâk an tum laiin, CADC ZPM District Headquarters President,  Pu Karan Dewan, leh a thawhpui te’n he hnalâkah hian an duhsak zâwngte hnaa lâk an nih theih nân party chakna hmangin hma an la a, Recommendation List siamin Interview Board member te hnênah an duhsak zawng la tûrin Recommended List an thehlût a, an recommended list za a za (100%) titling tûrin an nawrlui zui bawk niin an tarlang.

 

ZPM Party, District Headquarters, CADC hruaitute chuan an duhsak zâwng za a za la tûr leh chutiang an tih loh chuan transfer an nih tûr thu thleng a ṭawngkâa Board member an lo vau tawhna bawhzuina nia ngaih theih tûrin Pi Juhnee Chakma, Interview Board Member Secretary, BRC, Kamalanagar, Chawngte-a attached a awm mêk chu tahrik 25th June, 2025 khân a post ngaia awm tûrin Repatriate Order tihchhuah anih thu an sawi a, Joint NGO Chawngte chuan Sawrkârin a Department enkawla thawktute, ṭha zâwk leh hlâwk zâwka hnâ an thawh theih nâna Transfer & Posting a ti ṭhin hi a tih tûr rêngah ngaiin a hrethiam êm êm a, Sawrkâr dodâl zâwngin hma a la ngai lo a ni. Amaherawhchu, tûna Pi Juhnee Chakma Transfer (Repatriate) anih dânah hi chuan thil dik lo a awm ngei a ni tih a hria a, Interview Board member te ngêi pawhin an chhia leh ṭha hriatna (conscience) hmang ngam lo khawpa Political Pressure an nei hi pawi an tih thu an tarlang a ni.

 

Joint NGO Chairman, Joseph Lalchhingpuia chuan Pi Juhnee Repatriate order chu sut turin Mizoram Sorkar an ngen thu sawiin, vawiin thlengin thu lawmawm chhanna an dawn loh avanga lungawilohna lantir an nih thu a sawi a, Mizoram Sorkar atanga chhanna duhawm kan hmuh hma loh chuan kan thu-ah kan ding reng dawn a ti a, naktuk lamah pawh zirna in (School) khar tir chhunzawm an tum thu a sawi a, a tul dan a zirin Sorkar pisa pawh khar tir an tum thu a sawi bawk.

Vawiin a Joint NGO te hmalaknaah hian Sorkar school 23 leh Private school 12 a  zirlai 6123 zet in vawiin khan zirna an chhunzawm thei lova, chawhma chhung school kawta an ven hnuah boruak muanawm tak hnuaiah Joint NGO te hi an tin ta a ni.

 

PRESS RELEASE

 

Tahrik 19th – 23rd May, 2025 chhunga Block Resource Centre, Kamalanagar, Chawngte (CADC area bik tân) a thawk tûr Samagra Shiksha, Mizoram Foundational Stage (FS) Helper leh PM SHRI Music Instructor, Sports Instructor leh Hindi Instructor tûr Interview kaltlanga lâk chungchângah Joint NGO Chawngte chuan diklo taka hnalâk a awm ngeia a hriat avângin thil awmdân dik tak Mizoram mipuite hriata târlan ṭûlin a hria a, hetiang hi thil awmzia chu a ni.

 

Tahrik 19th – 23rd, 2025 chhûng khan Block Resource Centre, Kamalanagar (CADC Area bik tân) hnuaia thawk tûr hnalâkna Interview kaltlanga neih a ni a, he hnalâk a Interview Board member te chu

1). Pu Santosh Chakma, Chairman.

2). Pi Juhnee chakma, Member Secretary.

3). Pu Rajendra Tongchangya, Member te an ni.

 

Dik tak leh felfâi taka hnalâkna (Recruitment) kalpui anih kan lo beisei lai leh Interview Board member te pawhin dik tak leh fair taka a thiam leh phû te ngêi lâk an tum laiin, Pu Karan Dewan, President, ZPM District Headquarters, CADC leh a thawhpui te’n he hnalâkah hian an duhsak zâwngte hnaa lâk an nih theih nân party chakna hmangin hma an la a, Recommendation List siamin Interview Board member te hnênah an duhsak zawng la tûrin Recommended List an thehlût a, an recommended list za a za (100%) titling tûrin an nawrlui zui bawk a ni. Interview Board Member te’n ZPM Party workers lam ngenna chu hnial harsa ti tak leh hreh tak chunga a thiam lo zual an thlitfîm hnuah Recommended List aṭanga 70% vêl chu lak an ni ta tho a ni .

 

Heti chung chung hian ZPM Party, District Head quarters, CADC hruaitute chuan an duhsak zâwng za a za la tûr leh chutiang an tih loh chuan transfer an nih tûr thu thleng a ṭawngkâa Board member an lo vau tawhna bawhzuina nia ngaih theih tûrin Pi Juhnee Chakma, Interview Board Member Secretary, BRC, Kamalanagar, Chawngte-a attached a awm mêk chu tahrik 25th June, 2025 khân a post ngaia awm tûrin Repatriate Order tihchhuah a lo ni ta chiah bawk a ni.

 

Joint NGO Chawngte chuan Sawrkârin a Department enkawla thawktute, ṭha zâwk leh hlâwk zâwka hnâ an thawh theih nâna Transfer & Posting a ti ṭhin hi a tih tûr rêngah ngaiin a hrethiam êm êm a, Sawrkâr dodâl zâwngin hma a la ngai lo a ni. Amaherawhchu, tûna Pi Juhnee Chakma  Transfer (Repatriate) anih dânah hi chuan thil dik lo a awm ngei a ni tih a hria a, Interview Board member te ngêi pawhin an chhia leh ṭha hriatna (conscience) hmang ngam lo khawpa Political Pressure an nei hi pawi kan ti hle. Chutihrualin, Mizoram hmun hrang hrangah Sawrkâr hnathawk huaisen leh dik taka thiltih tum tlat mi engemawzât an la awm thu hriat a ni chho zêl hi a lâwmawm hle thung a ni.

 

Joint NGO Chawngte chuan dik lo taka hnalâkna kalpui a nih chungchângah tahrik 28th June, 2025 khân a changtu Minister zahawm tak Dr. Vanlalthlana, Minister, School Education Department chu ziaka lehkha thawnin Repatriate Order cancel tûra ngenna leh thil awmzia a lo hriattir tawh a, diklo taka thilti te hrem a hneka diklohna dodâla dik taka thawktu (staff) zâwkin transfer a tâwk letling hlauh chu pawi an tih thu leh Repatriate Order cancel sak tûra ngên bawkin, tahrik 1st July, 2025 tlai Dar 4:00 ral hma ngeia Repatriate Order sût anih loh chuan Joint NGO Chawngte chuan aṭûl anga hma a lâk chhunzawm tûr thu pawh thlen a lo ni tawh bawk a ni. Hetiang hi thil awmdân anih avâng leh Sawrkâr aṭangin tûn thlenga Repatriate Order sûtna (cancellation) lehkha hmuh a la nih loh bawk avângin, Joint NGO Chawngte chuan hreh tak chungin Chawngte khawchhung (Town Area) a Zirna In (School) zawng zawng te 2nd July, 2025 aṭanga thu leh awm hmâ chu a thawhkhat nân tiam chin awm lovin a khâr dawn a ni. Joint NGO Chawngte chuan diklo taka hnalâk a nih avânga lungâwilohna lantîr nâna Zirna In khâr a nih chhûnga harsatna tâwk tûr Zirlai, Zirtirtu, Nu leh Pa leh khawtlâng mipuite hriatthiamna a dîl a, hun lo la kal zêl tûrah dik tak leh fair taka hnalâkna kalpui anih theih nân leh Sawrkâr hnathawk, huaisen taka diklohna dodâl ngam te chunga hremna lekkawh anih tawh loh nân Joint NGO Chawngte hmalâkna hi a tâwp thlenga thlâwp tlat tûrin mipuite a sâwm a ni.

 

Issued by : Joint NGO Chawngte