Lawngtlai Bawrhsap in, sawrkara nihna te mimal hlawk nana hman lovin, mahni hlawha lungawi thiam turin CADC Officers te a fuih.

January 16, 2026 : Vawiin khan Lawngtlai Bawrhsap leh CADC Caretaker- ni bawk Pu Donny Lalruatsanga chuan Chakma Autonomous District Council (CADC) Executive Secretary leh Officers -te CADC Conference Hall, Kamalanagar ah meeting a neih pui.

DC Pu Donny Lalruatsanga chuan CADC-Executive Secretary Pu Pronit Bikash Chakma, leh Officers- dangte chu kum thar chibai a bukna a nei a. CADC Caretaker a nih chhungin tha taka kalpui a duh thu a sawi, ADC - area ten malsawmna tam tak neiin, hmasawnna kawng hrang hrang thlentu a nih laiin hmansual a hlauhawm hle a, dik leh tangkai tak hmang thiam turin a chah a. CADC Official - te chu mipuite rawngbawltu an nihna hre reng chungin, mipuite chhawr tlak leh fak tlaka an nun pawh fimkhur turin a chah a ni. Hun vawn that a pawimawh thu sawiin, a hun taka Office thleng leh bâng thin turin a chah a ni. Bawrhsap chuan rinawmna nena hnathawh a pawimawh hle tiin, sawrkara nihna te mimal hlawk nana hman loh hi a tha hle a, mahni hlawha lungawi thiam turin a fuih a. Pu Donny Lalruatsanga chuan CADC Officers - te chu ram leh hnam hmasawnna tura theihtawp chhuaha thawk turin a sawm nghal bawk.

Thutkhawmah hian CADC - department hrang hrangten harsatna an neih te, Staff recruitment, Muster Roll leh Provisional Employees chungchangte, CADC Budget chungchangte, Utilisation of Local Receipt, chungchang te sawiho a ni a. A tul angin thuneitu sang zawkah thlen leh se an ti a ni.

CADC Executive Secretary, Pu Pronit Bikash Chakma, chuan CADC dinhmun tlangpui, department leh thawktu awmzat, leh hnathawh dan tlangpui report a pe a ni.

LAWNGTLAI BAWRHSAP- IN DILTLANG 'S' CHAWNGTELUI, MUALBU 'L' LEH HMUNLAI VC- TE KAWM

January 16, 2026: Vawiin khan Lawngtlai Bawrhsap Pu Donny Lalruatsanga chuan Diltlang 'S', Chawngtelui, Mualbu 'L' leh Hmunlai khuate tlawhin an Village Council Member-te nen inkawmna an nei.

Pu Donny Lalruatsanga chuan VC - te chu khawtlang mipuite enkawltu ber an nihnaah theihtawp chhuah turin a chah a. Mipuite rawngbawl chu hna zahawm tak a ni tih hre reng tur leh mahni inphahhniam chunga hnathawk turin a fuih a ni. Bawrhsap chuan Lawngtlai District- ah hmasawnna hnathawh rualkhai taka kalpui a nih thin thu tarlangin, khaw hrang hrangte hmasawnna tura theihtawp chhuah reng a nih thu a tarlang a ni.

Diltlang 'S' VC - te chuan 'mobile connectivity' lamah harsatna an tawh thu leh Bank mumal an neih loh thu Bawrhsap hi an lo hrilh a. Chawngtelui VC - ten an khawtlangin Tower an neih mek 2G chu 4G emaw tala siam an mamawh thu an sawi a. Kawngpui laih mek chak zawka laih a nih theih nan a tan lakpui turin an Bawrhsap hi an ngen a ni. Mualbu 'L' VC - te khelmual an mamawh thu te, Godown an mamawh na te, ran khuahkhirh chungchangah leh kawngpui laih mekah chak zawka laih a nih theih nan te hmalaksak turin Bawrhsap hi an ngen a. Hmunlai VC- te chuan Community Hall - repair an mamawh thu te, Zirna in chei that kawngah tanpuina an mamawh thu Bawrhsap hi an lo hrilh a ni. 

Bawrhsap chuan VC- ten an lo dawngsawnnaah lawmthu sawiin, khawtlang mipuite  harsatna zir chiang tura a hmun ngei kal a nih thu a sawi a. Village Council hrang hrang ten harsatna leh khawtlang mamawh a hnena an lo thlengte chu a theih chin china tihlawhtlin a tum thu a tarlang a. Pu Donny Lalruatsanga chuan kangmei chhuak lo tura theihtawp lo chhuah tur te, Ruihhlo do kawnga theihtawp chhuah tur te, khawtlang tan a nu leh pa lo ni zel turte, fai leh thianghlim kawnga hmasawn  tur leh kawng hrang hranga sawrkar lo tawiawm zel turin VC- te a sawm nghal bawk.