Chawngte Area Cleanliness Association huaihawtin Chawngte khaw pumpui faina hnatlang runpui neih a ni.

December 08, 2022: Chawngte khawpui faina leh thianghlimna lam hmalakna kalpui turin 'Chawngte Area Cleanliness Association' dinin Civil SDO hriatpuina in hmalakna kalpui a ni a, Chawngte khawchhung Village council pariat te leh NGO hrang hrang te tawiawmna nen hnatlang runpui hi neih a ni.

Chawngte Area Cleanliness Association (CACA) President, Pu Bonny Lalsangzuala chuan CACA hian kan khawpui chhung faina leh thianghlimna lama hma kan sawn theih nan hma kan la zel dawn a, aṭum khatna atan hnatlang runpui in kohin Village Council hotu te leh mipui pawhin min thlawp tha hle a ni a ti. Chawngte khawchhung Village Council level vengfai intihsiakna kalpui tan a ni a, lawmman tha tak buatsaih a ni bawk a, December leh January (thlahnih) chhunga veng fai intihsiak hi neih tan a ni a, hmalakna hrang hrang pawh kalpui zel a ni dawn a ni a ti. 

Vawiin a faina hnatlang neih ah hian CACA Vice President, Pu PC. Lalnunpuia chuan thu sawiin, Midang te pawhin khawfai lawmman dawng thei khawpa an fai theih chuan keini pawhin kan tifai thei tur a ni, thahnemngaih takin kan khawpui fai turin i thawkho zel ang u tiin mipui a sawm a ni. Faina hnatlanga ah hian CADC Chairman Pu Kali Kumar Tongchangya pawhin a telpui .

Vawiin hnatlangah hian Village Council hrang hrang in an vengchhung theuh tifaiin an hnatlang a, School hrang hranga zirlai thahnem tak an tel bawk. Vawiin a hnathlang thawkchhuak zawng zawng hi mi 3500 vel an ni.

Bangladesh atanga raltlan Lawngtlai district Parva -III ah mi 295 an awm mek.

December 05, 2022: Bangladesh ramchhung buaina avanga an sahimna zawnga raltlan Lawngtlai District, Chawngte Sub-Division huamchhung Parva -III ah mi 295 an awm mek.

Vawiin khan Chawngte Civil SDO, Dr. Manesia Khaimeichho chuan raltlan te awmna Parva-III a tlawh a,  Refugee Management Committee ten lo dawng sawng in, an harsatna te an sawi ho. Management Committee Secretary, Pu Lalrammuana chuan, raltlante awmna tur sak mek a ni a, sak zawh a nih hnuah dahluh nghal an ni dawn a, eirawngbawlna tur bungbel an neih loh thu sawiin, damdawi, Eng leh tui lamah harsatna an neih thu a sawi bawk. Civil SDO Dr. Manesia Khaimeichho chuan, an harsatna te pawh theih tawp chhuaha sut kian a nih theih nan hmalak pui a tum thu a sawi a, SDO hian raltlante awmna hmun hrang hrang a tlawh chhuak vek a, raltlante awmna tur Camp an sak mek pawh tlawhin an mamawh turte ngaihtuahpui thei turin ruahmanna a siam a, raltlan lo lut belh awm thei a nih avangin Parva-I lam pawh an lo in rinlawk theih nan ruahmanna a siampui bawk. Refugee Management Committee Secretary Pu Lalrammuana chuan Pathian ni kalta khan mi 120 vel lo lut awmin BSF lamin an danbeh avangin khaw chhung lo lut thei lovin nimin khan Bangladesh lamah an leh leh vek a ni a ti. November ni 20 khan aṭum khatna atan Simeinasora ah mi 274 rawn lutin Parva-III ah hruai phei an ni a, a hnu November ni 25 khan Chhippui ah mi 21 lut lehin Parva-III ah bawk hruaiphei an ni leh a, mi 295 an awm ta a ni.

Heng mite hi thuneitute chuan an awmna hmun sawn a siam rem tumna awm chu Refugee Management Committee hruaitute chuan tun dinhmunah ṭullo nia hriatna an neih thu an sawi.

Civil SDO hian Refugee Management Committee te hnenah tanpuina sumfai a hlan nghal a ni.

 Raltlante tanpuina hlan.

December 03, 2022: Vawiin khan Bangladesh atanga bawm raltlante hnenah Central Young Chakma Association ten tanpuina an hlan.

Central YCA President, Dr. Jyotirmoy Chakma leh a thawhpui ten vawiin khan raltlante awmna Parva -III ah kalin tanpuina an hlan a, Buhfai, Chi, Blanket, Alu thahnem tak an hlan a ni.

National Polution Prevention day an hmang.

December 2, 2022: Vawiin khan National Polution Prevention day pualin zirna in hrang hrangah hemi chungchang zir hona an nei a, Chawngte Block, Damdep -II Cluster ah chuan Govt. Primary School zirlai ten lem inziahsiak na te neiin thing leh tuihna humhalh tulna lan tirin an au rual bawk.

Mushroom Cultivation Training neiin Chawngte RD Block huamchhung an fang.

 

Mizoram State Rural Livelihood Mission BMMU Chawngte RD Block huamchhunga Village Council hrang hrang te hnenah Mushroom Cultivation Training buatsaih mek a ni a, Mipuiin an hlawkpui hle.

             MzSRLM BMMU Chawngte RD Block huam chhunga Mushroom Cultivation training neih mekah Coordinator farm, FC Kypachaki leh G. Lalremruata te chu Resource person niin, November ni 29 - 30 khan Silsury Self Help Group member te zirtir an ni a,

Village Council Member leh Young Chakma Associtation hruaitute pawhin tel puiin mi 90 vel an tel thei. Nimin khan Chhotapansury ah pawh training hi neih chhunzawm a ni a, mi 80 vel an tel thei bawk.

Mushroom Cultivation Training ah hian a tih dan tur hrang hrang thu hmang a an in zirtir mai bakah practical a tihpui an ni a, training a kal khawm te hian Mushroom block siam theuhin heng te hi  hawn tir an ni.

UNAU KAN NI         

 

            Tun hnaiah Ram thenawmte buaina avangin kan unau zo-hnahthlak khaw chhak leh khaw thlang atangin Mizoram, Lawngtlai District belin mi eng emaw zat an lo lut a, Myanmar buaina avang a, raltlan lo lut engemaw zatte tuam hlawm an nih mek laia, Bangladesh atangin an dikna chanvo an hmuh theih nana ram mutna avanga Bangladesh sorkar nekchepna chuan mi engemaw zat a rawn nawr lut leh ta ti ila kan sawi sual awm love.

            Kan unau ten tanpui leh chhawmdawl an ngaih hunah chhawmdawl thei a kan awm hi vanneih thlak tia sawi theih a nih laiin harsatna an tawh avanga lo lut an nih avangin a vanduai thlak tia sawi theih a ni bawk.

            Heng kan unaute harsatna tawhna atang hian hnam inpumkhatna leh in unauna tha zawk nei a, in hmangaih tawn na lo hring chhuak se ava duhawm tak em.