11^th CADC, Chief Executive Member a tan Pu Nirupam Chakma chu rinawmna thu tiam tira lak luh a ni.

 

Chawngte, 8^th July 2026 : Vawiin khan Chakma Autonomous District Council sawmpakhatna (11^th CADC) Chief Executive Member a tan Pu Nirupam Chakma chu Lawngtlai Bawrhsap Pu Donny Lalruatsanga MCS in rinawmna thu tiam tirin a la lut.

 

CADC Art & Culture Hall Chawngte a, CEM lakluh inkhawmah hian CADC Executive Secretary Pu Pronit Bikash Chakma in CADC CEM atana Pu Nirupam Chakma chu ruat a nih thu sawrkar lehkha pawimawh te a chhiar chhuak. CEM atan lak luh thar Pu Nirupam Chakma chuan thu sawiin, ‘Vawiin hi ka tan ni pawimawh leh hriatreng tlak berte zinga mi a ni. Chakma Autonomous District Council Chief Executive Member anga thutiam ka lak angin kan mite rawngbawl tura inpekna nghet tak nen in hmaah ka ding a ni. Kum khat dawn lai CADC chu Governor’s Rule hnuaiah a awm a kan mipuite chuan dawhthei takin democratic sorkar din thar leh hun chu kan nghak a vawiin hian democracy chu a lo awm leh ta a, kan mipuite tan beiseina thar leh remchang thar a rawn keng tel ta a ni.

 

Bharatiya Janata Party leh Zoram People’s Movement te pahnih in sorkar siam tura an thawkho thei chu lawmawm atih thu a sawi a, he thawhhona hi thuneihna insem tura ruahmanna mai a ni lo va; rorelna nghet, langtlang, mawhphurhna nei leh hmasawnna lam hawia kalpui tura thawhhona a ni a ti.

 

Hon’ble Prime Minister Shri Narendra Modi kaihhruaina chak leh hmathlir nei tak hnuaia chuan Act East Policy, PM-DevINE, infrastructure tihpun, digital connectivity, thingtlang lama hmasawnna, healthcare, education leh tribal community te tichak a hmalakna hmangin hmarchhak bial hmasawnna chu a hmaa a la awm ngai loh angin a ngai pawimawh fo a ni.

 

Tin, Hon’ble Chief Minister Pu Lalduhoma kaihhruaina Sawrkar chuan Autonomous District Council-te tan thawhhona a inhawng a, mi tin huapzo hmasawnna tura a inpekna a lantir bawk. Chakma Autonomous District Council chuan kan mipuite hamthatna tur leh Mizoram hmasawnna zawng zawng atan State Sorkar nen thawhhona tha tak neiin hna a thawk dawn tih Hon’ble Chief Minister hnenah ka tiam a ni ati.

 

Council-a Member thlan chhuah zawng zawngte pawh politics lama inthliarna awmte atanga tho chhuakin mipui rawngbawl tura inpe turin a sawm a, Mipui rinna chu rinawmna, dikna, langtlang, discipline leh thawhrimna hmangin kan chawinung tur a ni a ti.

 

Council-a Officer leh hnathawk te hian inpekna, mi dangte thliar hran lo, thawhrimna leh lainatna nen an hna an hlen chhuah ka beisei. Kan thalai, hmeichhia, loneitute, zirtirtu, sakhaw hruaitute leh civil society pawl hrang hrangte chu hmasawnna kawnga thawhpui tha tak ni turin a sawm a. Kan Sawrkar chuan kawngpui inkalpawhna, tui in tur, electric, healthcare, zirna, agriculture, horticulture, skill development, eizawnna siam, tourism, digital infrastructure, environment humhalh leh kan culture heritage hausa humhalh te chu a ngai pawimawh ber ang a ti. Entrepreneurship leh skill development hmanga tihchakna kawngah a bik takin hmalam hun duhawm tak dinna kawnga thawhpui an nih theih nan hmalak a ni ang. Chief Executive Member ka nih angin ka chakna zawng zawng, ka tawnhriat zawng zawng leh ka inpekna zawng zawng chu kan mipuite rawngbawlna atan ka hlan vek dawn tih ka tiam a ni. Chakma Autonomous District Council chak zawk, hausa zawk leh nung zawk kan din ngei ka ring tlat a ni. Duhthlanna pakhat, thiltum pakhat leh inpekna pakhat nen thawk ho ila chakma Autonomous District Council tha zawk, thangtharte tan hnutchhiah turin theihtawp kan chhuah dawn a ni a ti.

 

CEM lakluh inkhawmah hian Minister, Pu C. Lalsawivunga District Council & Minority Affairs chuan thu sawiin ‘Hun rei tak chu ADC te sorkar nghet lovin kan in thlak zut mai a, vawiin kan hun hman mek hian kan tan mellung min phun sak se, Sawrkar nghet lo zia hi kan thlak a he sorkar thar hi nghet taka awm tur leh hmasawn zel turin duhsakna a hlan a ni. Mizoram sorkar hian ADC te a duhsak hle a, Budget pharh a nih pawhin ADC te budget hi tih pun a ni. Kalphung thar mipui sorkar hian kan au hla angin ADC te hian direct funding leh Anti-defection law an hman theih nan tan lain Central ah recommendation a pe tawh tih a sawi a, hna lak chungchangah kan chin dan thalo bansanin budget ngaihtuah miah lova politics khel nana hna lak intiamte hi awm tawh lo se, he ram hi a chhiat a thatah mawhphurtu kan ni a, mipuite hmasawnna tur ngaihtuah hi sorkar tih tur a ni a ti. Minister chuan Mipui ten an chan tur an chan loh chuan sorkarna siam hian awmzia a nei lova, tun CADC Sorkar thar hian beiseina thar min siam a, tawn hriat ngah tak Pu Nirupam Chakma kaihhruaiah hian sorkar nghet leh rintlak a awm ngei ka beisei a, he sorkar hnuaiah hian chakma mipuite thlamuang taka awm turin a chah bawk a ni.

 

11^th CADC hi July ni 7, 2025 khan thlaruk chhung atan Governor thuneihnaah dah niin, January ni 12, 2026 khan sorkar a la pian theih loh avangin Governor rule ah dah chhunzawm a ni. CADC MDC 20 te hi tun dinhmunah BJP 10. ZPM 9 leh MNF 1 an awm mek a, BJP leh ZPM chuan Chakma Democratic Alliance Legislature Party dinin sawrkarna an kalpui dawn a, CEM hian vawiinah a pisa luah lut nghal in, CADC a MDC leh Party hruaituten an tawi awm a, naktuk ni July ni 9 hian CEM hi Session ah fiah a ni dawn a ni.

 

 Young Mizo Association (YMA) Day vawi 91-na hlim takin an hmang.

June 15, 2026: Mizoram a tlawmngai pawl lian ber, Young Mizo Association (YMA) Day vawi 91-na chu Chawngte 'P' Branch YMA te chuan, Chawngte 'P' Mini Sports Complex-ah hlim taka hman a ni a, Lawngtlai Bawrhsap, Pu Donny Lalruatsanga chuan khuallian niin a hman pui.

 

YMA Chawngte 'P' Branch Asst. Secretary, Tv. Lalenkawla kaihhruai YMA Day lawmna inkhawmah khuallian Pu Donny Lalruatsanga Lawngtlai DC chuan thu sawiin, Ram leh hnam humhalhna atan hian do rawn tur pawimawh tak kan nei a, chu chu ruihhlo hi a ni a ti. Nang leh kei hian nasa takin ruihhlo kan do loh chuan kan ramin chhiatna nasa tak kan tawk dawn a, sawrkar pawhin nasa takin hmalakna a kalpui mek a, khawtlang mipuite pawhin tha thlah lovin ruihhlo i do zel ang u. Kan ram leh hnam a dinchhuah a, hnam ropui kan nih theih nan Zirna hi ngaipawimawh hmasa ila, thalaite hi hnam rohlu kan nih theihna turin zirna lamah theihtawp chhuah zel turin a sawm a ni. Khawvel hmasawnna kal mekah hian kan hnam zia kan chawi nun a pawimawh em em a, kan tawng te, kan lam te, kan zai te leh zonun zemawi takte hi chhawm nung zel ila, hman phatsantu ni lovin, hnam chawinungtu kan nih a tul a ni a ti.

 

He hunah hian khual zahawm, LADC Executive Member, Pu HC. Lalengkima chuan, LADC leh District Administration inkarah thawhhona tha tak a awm thu sawiin,  Lawngtlai District in kangmei chhuak tur ven kawngah a ti tha ber lawmman kan dawn theihna hi kan DC leh khawtlang hruaitu leh mipui te thawhrah a ni a, tan la sauh sauh ang u a ti bawk. Mipui kal khawmte chu tih tak takna nen khawtlang hmangaih turin a sawm a, a tha zawngin midangte el thiamin, zirna leh thil hrang hrangah tan la tharin, Kan khawtlang hmangaih a hmasawnna kawng zawh turin a michengte hi kan pawimawh ber a ni a ti. Khawtlang intodelh kan nih theih nan tawng dang thiam tumin, Chawngte 'P' pelin thiamna leh theihna neia lanchhuah tir i tum ang u tiin mipuite a chah bawk.

 

YMA Day lawmna inkhawmah  hian zirnna a hlawhtling MIS inziak tling, Tv. K. Lalruatliana leh HSSLC Mizoram Top 10 holder Tv. Krista Hmingropuia te, Infiamna lama hlawhtling Tv. Jeho Himnakulhpuingheta te chawimawina hun hman a ni a, YMA Member boralte hriatrengna an chhungte hnenah an hlan bawk. YMA Day lawmna inkhawmah hian, SDC Pu Lalhruaizela te, Chawngte SDO (C) Pu Lalnunpuia Rethlei te, SDPO Chawngte, Pu Malsawma te leh khawtlang hruaitu pawimawh tak tak te an tel a ni.

YLA Sub-Hqrs Chawngte Office Bearers 2026 - 2028

President: A. Lalzarliana

Vice President: J. Thanghleia  

Secretary: K. Lalthupuia

Asst. Secretary: Lalthanzuala

Treasurer: Lalthanchhunga

Fin. Secretary: T. Lalrawngbawla

Mizoram Bawm Students' Association (MBSA) General Conference vawi 7-na chu nimin April 22, 2026 khan Hruitezawl ah hman a ni a. He hun hi Adviser to Chief Minister Dr. Lorrain Lalpekliana Chinzah chuan khuallian niin hun a hman pui.

Khuallian chuan thusawiin, "Kan rama zohnahthlakte chi peng hrang hrangte leh kan zirlaite, hnam a kan chian leh zualna hun leh kan hnam ziarang kan ngaihhlut leh zualna hun atan MBSA General Conference chu ṭangkai taka hmang turin a chah a.  "Mithiam te zirchiana ah chuan 'Bawm tobul chu Chin State, Myanmar a Tiphul khua, Haka township hi a ni' an ti a. Hei hian Lai hnam leh Bawm hnamte inzawmna chu a ti chiang hle in ka hria." tiin - "Pathian leh kan ram hmangaihtu mi hmasate zarah, hnam anga rorelna inpui LADC kan nei a. LADC hi hlawh lakna tan chauh hmang lova, kan hnam leh culture lungphum na tur rohlu a ni tih hria in, tun ai a kan hlut thiam a pawimawh hle a ni." tiin kalkhawm te chu a fuih bawk a.  

Lawngtlai East MLA Dr. Lorrain Lalpekliana Chinzah chuan "Keini zohnahthlakte hi ram hrang hrangah in then darh mah ila, rilru hmun khat pu a, in unauna nghet tak kan neih zel hi a pawimawh a. Myanmar leh Bangladesh leh ram danga khawsa kan unaute, tihhreawm leh harsatna tawk mekte tan innghahna tlak kan nih theih nan theihtawp chhuah tlang turin zirlaite leh thalai te chu a sawm thu a tarlang bawk.

Mizoram Journalists' Association General Conference vawi 52 na neih a ni.

Aizawl March 27, 2026: Vawiin khan Mizoram Journalists' Association General Conference vawi 52 na chu IPR Auditorium Aizawlah neih a ni a, Finance Department Secretary Pu Ramchuana MFAS chu khuallian niin a hmanpui.

Khuallian, Pu Ramchuana chuan, Finance department in kan theih ang tawkin MJA te pual hian kut kan lo thawh ve thin a, Journalist te chuan awn lam leh tan lam neih a rem lova, mite tina lo thei tur ang berin thudik pho chhuan kan tum tlat tur a ni a ti. Thu thar thehdarh kawnga finfiah peih a, inrin tawkna leh huaisen taka hna thawk turin a chah a, in tuaitharna leh inzir chho peih a pawimawh thu a sawi bawk. Print media te chhiar hlawh lo anga ngaih mah nise, a hlutna a nep chuang lova, Electronic media kal chak tak ruala kal dan kan thiam pawh a tul a ni. Mizo tawng ziak dan dik hmanga mipuite zirtir leh entawn tlak kan nih theih nan tan la thar turin a fuih a. Tiang rit deuh hmanchang awm mahse, thudik tak hmanga sorkar khalh ngil tu ni zel turin a sawm bawk a ni.

MJA Vice President Pu C. Lalhmachhuana kaihhruai MJA General Conference inkhawm ah hian MJA Member boralta Ezrela Dalidia Fanaipari Fanai DDK Reporter sunna hun hman a ni a, Gen. Secretary Pu K. Zothanpara'n MJA hmalakna report pein, MJA President Pu C. Lalrambuatsaiha'n thu a sawi bawk. MJA President Pu C. Lalrambuatsaiha chuan MJA leh Mizoram Sorkar thawhhona chungchangte sawiin, Sorkar atanga Advertisment hmuh dan felfai zawk duan a nih avang leh Journalist Pension tih fel a nih chu lawmawm a tih thu a sawi a, MJA hmasawnna tichak tur hian hruaitute tawiawm tha ila, in sawisel mai lovin thawhhona tha neih hi pawl zahawmna vawng him leh ti hlu tu a ni a ti. Social Media in min run mek a, hetih mek lai hian MJA member te chu rintlak bik kan ni tur a ni a, MJA Member thuziak chu mipuiin a rintlak zia an hmu zel tur a ni a ti.

Chawhnu lamah rorelna neih a ni a, MJA hruaitu thlanna neih nghal a ni.

MJA HRUAITU THLAN THARTE 2026 - 2028

President : Pu Vanlalrema Vantawl

Vice President : Pu C. Lalhmachhuana

Treasurer : Pu Zohmingmawia

Executive Committee Member:

1) F. Lalrinfela

2) Samuel Lalruatsanga

3) H. Lalchhandama

4) Joseph Lalnuntluanga

5) Lalbiakzama

6) Lalnunzira Chawngthu

7) Vanlalruata

8) T. Lalbiakdika

9) Malsawmdawngzela Hrahsel

10) Lalramdinsanga

11) K. Zothanpara

MJA GENERAL CONFERENCE 2026 RORELTE

1. Mizoram sorkarin sum renchem chhuanlama a hnathawkte chanchinbu lak theih zat nasa taka a titlem hi ngaihtuah tha leh turin hmalak ni rawh se.

2. MJA member, accredited journalist-te an thiha sorkarin a ràlna (ex gratia) Rs 2,00,000 hi tisang turin sorkarah thlen ni se. Accredited journalist ni lo, MJA member thite sorkarin a ràlna Rs 1,50,000 pawh hi tihsan ni rawh se.

3. Mizoram Journalist Pension Scheme kan hman mek hi Family Pension Scheme anga kalpui a nih theih nan hmalak ni rawh se.

4. MJA Gen Hqrs hian MJA hmingin social media-ah account siam rawh se.

5. MJA-in prominent journalist puan tura a thlan dan hi Coordination Committee-ah postal ballot hmangin thlan thin ni tawh rawh se.

6. MJA Rising Day, March 23 hi General Headquarters leh District tinah hman thin ni rawh se.

7. MJA sticker, motor-a târ tur, lak sawn theih siam turin MJA Gen. Hqrs-in hma la rawh se.

OFFICIAL RESOLUTION

i) Mizoram sorkarin MJA ngenna anga kum 2026-27 budget estimate-ah Advertising and Publicity atan IPR Department-ah sum a hlawma a dah tak avangin kan lawm tak zet a. Advertisement atana sum dahte hi government approved media firm-te tan rualkhai taka hman a nih theih nan min bawhzuisak turin IPR Department kan ngen a ni.

ii) Mizoram sorkarin IPR Department kaltlanga press tour min buatsaihsak thin leh Press Information Bureau (PIB)-in press tour min buatsaihsak hi kan lawm tak zet a. Hun lo kal zel turah pawh press tour min buatsaihsak zel turin kan beisei a, kan ngen nghal a ni.

Zofate kut ropui leh ngaihhlut hlawh ber Chapchar kut chawngteah hlim taka hman a ni.

 

March 13, 2026 : Vawiin khan Zoram hmundangte rualin Chawngte khelmualah Chapchar kut hlim taka hman a ni a, Kut pa a tan Lunglei South Bialtu MLA Pu Lalramliana Papuia chu hman niin, Chawngte SDO(C) Pu Lalnunpuia Renthlei in kut a thleng a ni.

Chawngte Group YMA bultuma vawiina chapchar kut hmanah hian Kut Organizing Chairman Pu ZD Ramngamzauva chuan Kut hlim taka hmang turin a sawm a, Pu K. Lalchhawnkhama hnen atangin Pasalthate Hlado chham thin chu ngaihthlak leh thlir ho a ni. Kut thlengtu, SDO (C) Pu Lalnunpuia Renthlei MCS chuan, Chawngte Group YMA huaihawta Chapchar kut hman a nih chu lawmawm a tih thu a sawi a, Kut thupui ang ngeiin inremna neia, zo ram leh hnam tan theihtawp chhuah turin mipui te a sawm bawk a ni.

Kut Pa, MLA Pu Lalramliana Papuia chuan, Chawngte a piang ka nih angin, ka pianna hmun ngeiah Khuallian ni a, Chapchar kut ka hmang thei hi a lawmawm ka ti tak zet a, mizo hnam kengtu chu mizo mipa te kan nih ang mawhphurhna lian tak a in ngat a ni. Mizoram chhunga cheng hnamdang te, kan kianga khawsa te nen pawh in rem taka awm tum tur a ni a, chutih rual in hnam bil tana ruahmanna thil erawh chu hnam dangin min zen tawm rem lo chin engemaw zat a awm ve thin a, chungah chuan an kut rawn zen loh pawh an tan a him ang tih ka sawi duh a ni a ti. Hnam hrang hrang ten kan hnam nunphung in zah sak te pawh tul a, lung rual taka hun hman ho te pawh a tul a ni. Tun hnaiah inneih thuam chhawm chungchangah dan ennawn a ni a, dan te siamthat a ni a, mizo thlah leh hnamdang thlah ten mizo anga hamthatna kan neih te inang khat veka kan hmang leh hnamdang thlah ten an kut an rawlh lohna turin heng dante pawh siam a ni a ti. Hnam lam leh incheina hmang chauhva mizo zia lantir tum leh engemaw hun bik a tan chauhva mizo kan ni palh ang tih ka hlau a ni. Inti mizo lovin, mizo nunzia hi kan nun chhuah pui zawk tur a ni a ti.

Chawngte a chapchar kut hmannaah hian CADC Art & Culture Department ten Chakma Kut (Biju) lam an en tir a, Chawngte Group YMA huam chhunga Branch ten hnam lam chi hrang hrang leh mizo ten nundan leh in cheina te an entir a, MHIP Chawngte ‘P’ Branch pawhin Mizo te La deh dan entirin an chai nghal bawk a ni. Chapchar kut ah hian Chawngte leh a chheh vel khaw hrang hrang te fuan khawm in, Mizo Zaithiam lar, Siampuii Ralte, J. Lalrosanga, Thangromawia, Young Fella leh tulachhung zaithiam te an in lan bawk a ni.