Mizoram Journalists' Association General Conference vawi 52 na neih a ni.

Aizawl March 27, 2026: Vawiin khan Mizoram Journalists' Association General Conference vawi 52 na chu IPR Auditorium Aizawlah neih a ni a, Finance Department Secretary Pu Ramchuana MFAS chu khuallian niin a hmanpui.

Khuallian, Pu Ramchuana chuan, Finance department in kan theih ang tawkin MJA te pual hian kut kan lo thawh ve thin a, Journalist te chuan awn lam leh tan lam neih a rem lova, mite tina lo thei tur ang berin thudik pho chhuan kan tum tlat tur a ni a ti. Thu thar thehdarh kawnga finfiah peih a, inrin tawkna leh huaisen taka hna thawk turin a chah a, in tuaitharna leh inzir chho peih a pawimawh thu a sawi bawk. Print media te chhiar hlawh lo anga ngaih mah nise, a hlutna a nep chuang lova, Electronic media kal chak tak ruala kal dan kan thiam pawh a tul a ni. Mizo tawng ziak dan dik hmanga mipuite zirtir leh entawn tlak kan nih theih nan tan la thar turin a fuih a. Tiang rit deuh hmanchang awm mahse, thudik tak hmanga sorkar khalh ngil tu ni zel turin a sawm bawk a ni.

MJA Vice President Pu C. Lalhmachhuana kaihhruai MJA General Conference inkhawm ah hian MJA Member boralta Ezrela Dalidia Fanaipari Fanai DDK Reporter sunna hun hman a ni a, Gen. Secretary Pu K. Zothanpara'n MJA hmalakna report pein, MJA President Pu C. Lalrambuatsaiha'n thu a sawi bawk. MJA President Pu C. Lalrambuatsaiha chuan MJA leh Mizoram Sorkar thawhhona chungchangte sawiin, Sorkar atanga Advertisment hmuh dan felfai zawk duan a nih avang leh Journalist Pension tih fel a nih chu lawmawm a tih thu a sawi a, MJA hmasawnna tichak tur hian hruaitute tawiawm tha ila, in sawisel mai lovin thawhhona tha neih hi pawl zahawmna vawng him leh ti hlu tu a ni a ti. Social Media in min run mek a, hetih mek lai hian MJA member te chu rintlak bik kan ni tur a ni a, MJA Member thuziak chu mipuiin a rintlak zia an hmu zel tur a ni a ti.

Chawhnu lamah rorelna neih a ni a, MJA hruaitu thlanna neih nghal a ni.

MJA HRUAITU THLAN THARTE 2026 - 2028

President : Pu Vanlalrema Vantawl

Vice President : Pu C. Lalhmachhuana

Treasurer : Pu Zohmingmawia

Executive Committee Member:

1) F. Lalrinfela

2) Samuel Lalruatsanga

3) H. Lalchhandama

4) Joseph Lalnuntluanga

5) Lalbiakzama

6) Lalnunzira Chawngthu

7) Vanlalruata

8) T. Lalbiakdika

9) Malsawmdawngzela Hrahsel

10) Lalramdinsanga

11) K. Zothanpara

MJA GENERAL CONFERENCE 2026 RORELTE

1. Mizoram sorkarin sum renchem chhuanlama a hnathawkte chanchinbu lak theih zat nasa taka a titlem hi ngaihtuah tha leh turin hmalak ni rawh se.

2. MJA member, accredited journalist-te an thiha sorkarin a ràlna (ex gratia) Rs 2,00,000 hi tisang turin sorkarah thlen ni se. Accredited journalist ni lo, MJA member thite sorkarin a ràlna Rs 1,50,000 pawh hi tihsan ni rawh se.

3. Mizoram Journalist Pension Scheme kan hman mek hi Family Pension Scheme anga kalpui a nih theih nan hmalak ni rawh se.

4. MJA Gen Hqrs hian MJA hmingin social media-ah account siam rawh se.

5. MJA-in prominent journalist puan tura a thlan dan hi Coordination Committee-ah postal ballot hmangin thlan thin ni tawh rawh se.

6. MJA Rising Day, March 23 hi General Headquarters leh District tinah hman thin ni rawh se.

7. MJA sticker, motor-a târ tur, lak sawn theih siam turin MJA Gen. Hqrs-in hma la rawh se.

OFFICIAL RESOLUTION

i) Mizoram sorkarin MJA ngenna anga kum 2026-27 budget estimate-ah Advertising and Publicity atan IPR Department-ah sum a hlawma a dah tak avangin kan lawm tak zet a. Advertisement atana sum dahte hi government approved media firm-te tan rualkhai taka hman a nih theih nan min bawhzuisak turin IPR Department kan ngen a ni.

ii) Mizoram sorkarin IPR Department kaltlanga press tour min buatsaihsak thin leh Press Information Bureau (PIB)-in press tour min buatsaihsak hi kan lawm tak zet a. Hun lo kal zel turah pawh press tour min buatsaihsak zel turin kan beisei a, kan ngen nghal a ni.