Bangladesh buaina avanga an sahimna zawnga Mizoram a lo lutte, khaw hrang hrang atanga chhungkua lo luh dan.

Thingdawlte - 34

Theihkhiang - 2

Salopi - 12

Sunsawng - 5

Phainuam - 1

Cheih khiang - 12

Ruma - 3

Mipa - 149

Hmeichhia - 125

Total -  274

Bangladesh atangin Raltlan eng emawzat in Mizoram chhung Lawngtlai District, Chawngte Sub-Division huamchhung Simeinasora ah an lut.

November 21, 2022: ZORO thuchhuah a lan danin Bangladesh ramchhung, Chittagong Hill Tracks a Zo hnahthlak ten State hran ngiata Kuki-Chin-National Army (KNA) din a an beihna ah, tunlai hian Kuki-Chin National Army (KNA) te chu Bangladesh Sipai leh Arakan Army tangkawp ten an beihrawn mek a ni an ti.

The Chawngte Times thu dawn danin nimin khan buaina vanga an sahimna zawngin ramri kan a Mizoram a lo lut hi mi 272 an ni a, Lawngtlai District, Chawngte Sub-Division huamchhung Simeinasora ah lutin, a theih ang angin ramri a Sipai duty ten an lo chhinchhiah zel a ni a ti.

Tukin thleng a, report kan hriat danin ramri kana rawn lut te hi hmun dangah kalsawn remtih a nih loh avangin an mahni buaipuia eitur pe turin Parva atangin mi engemaw zat an kal a, damlo te pawh an awm avangin damdawi leh eitur te an pe bawk a ni. Hemi chungchang ngaihven tur hian Chawngte SDPO pawh nizan khan kal nghal in, Tukin khan Simeinasora a thleng nia thu dawn a ni.

Simeinasora hi Mizoram chhim lam, Lawngtlai District, Chawngte Sub-Division chhunga awm a ni a, Chawngte a tanga 210km ah awmin, Lawngtlai atangin 220km a hla a ni thung. 2011 Census a lan danin Simenasora ah hian Mipa 122, Hmeichhia 93 awmin, mi 215 cheng a chhinchhiah a ni a, Village Location code hi 271693 a ni.

 Motor chesual

November 18, 2022: Lunglei - Chawngte Maxi Cab Service, MZ-02A-3140 (Moi moi & Hannah) chu che sualin, Motor neitu leh Driver ni bawk Pu Lalrinchhana S/o. K. Ngaihzuala chu a hmunah a boral nghal. 

A chet sual hun hi chiang taka hriat nilo mahse, zan dar 6:45 vel nia rin a ni. Chawngte leh Rualalung inkar Chawngte atanga 5km vel, Panhnahhmunah a ni a, motor hi kawng thlang 20mtr vel a lum a, a chetsualna hmuna mita hmutute sawi danin, a khalhtu Pu Chhana chu motor hian a kâwng chin hnuai lam a delh a ni an ti.

Lunglei atanga passenger phurin Chawngte a thlenpui hnuah Rualalung ah riak turin a mahin a chho leh a, chutah chuan a che sual ta niin an sawi.

A ruang hi Chawngte 'L' ah lakthlak a ni a, Police te sawi danin, naktuk November ni 19 hian post-mortem a nih hnuah Chawngte 'L' thlanmualah vuiliam a ni ang.

Chawngte Maxi Cab welfare te chuan an member chet sualna avanga nunna chan a awm avangin Chawngte Maxi cab welfare member te November ni 19 hian an service thei dawn lo tih an sawi bawk.

CHC Chawngte bultumin Chawngte ‘C’ Health & Wellness Centre Area ah Health Mela neih a ni.

 

November 4, 2022: Vawiin khan Community Health Centre bultumin Chawngte ‘C’ Health & Wellness Centre Area  tan Health Mela buatsaih a ni a, Chawngte Civil SDO, Dr. Manesia Khaimeichho in a hmunah a tlawh.

 

S.M.O., Dr. Walter Lalnuntluanga Sailo chuan, Health Department hmalakna leh Health Mela neih dan te sawiin, tun hma a Health Sub-Centre te kha engemaw zat chu Health & Wellness Centre (HWC) ah hlankai a ni a, Health & Wellness Officer in a thut chilh dawn a ni a ti. Health mela hi kum tin April thla leh November thla hian Health & Wellness Centre ah neih thin a ni dawn a, natna inkaihchhawn theih loh te zawn chhuah chu ngaipawimawh bik a ni ang, ABHA ID nei tura in register theih a ni dawn a, hei hian tunhma natna lo neih tawh dan dinhmun thlengin awlsam taka hriattheih a ni tawh dawn a ni. Health & Wellness Centre (HWC) hian village level ah a tul dan angin home visit te an nei anga, damdawiin pan lem lova natna nei hrang hrang te, mahni natna hrelote zawnchhuah hna an thawk thin dawn a ni. Tin, HWC thenkhat chu an awmna a zirin nau neih theihna tur hmun (Delivery point) te buatsaih zel a ni bawk. Chawngte Area ah hian heng Health Sub-Centre, Lungrang, Rualalung, Chawngte ‘P’, Chawngte ‘C’leh Saizawh ‘W’ te hi Health & Wellness Centre (HWC) ah hlankai an ni tawh a ni.

 

Vawiin a Chawngte ‘C’ Area Health mela neihah hian, Non Communicable Diseases (NCD) 39, General Medicine 56, ICTC 1, Adolescent 9, Eye 30, Dental 13 an vaiin damlo mi 98 te an in entir a, Health Mela hi naktuk hian Chawngte ‘P’ HWC Area ah buatsaih leh a ni ang.  

Zirlaite hian chhawr tlak niturin tum mumal tak neia lehkha hi zir tur a ni. 

- FC. Zonghinga SDPO

November 12, 2022: Vawiin khan Chawngte BDO Conference Hall ah, Mizo Zirlai Pawl, Sub-Headquarters Chawngte buatsaihin Mizo zirlai titha chawimawina hun an hmang.

He hun hi, MZP Vice President, Pu Jefferson Ramdinmawia'n kaihruaiin Pu FC. Zonghinga SDPO Chawngte chuan khuallian niin a hmanpui. Khuallian Pu FC. Zonghinga chuan zirlaite chu chhawr tlak nitur leh tum mumal tak nei a zirna kawng zawh turte, taimakna leh tumruhna nen hlawhtlinna chang tura inbuatsaih theuh turin zirlaite a chah a, khual zahawm MZP Hqrs. Lunglei, President, Lalpeksanga pawhin thu sawiin mahni tan chauh nilo, kan ram leh hnam damna leh hmasawnna atan thahnemngai taka lehkha zir turin zirlaite fuihna thu a sawi bawk.

MZP Sub-Hqrs. Chawngte President Sama Lalchhunenga pawhin thu sawiin thiamna nei a, hna tha leh sang tak thawk thei a, kan mizopuite tan malsawmna kan nih theih nan zirlaite kan in buatsaih a tul tak zet a ni a ti.

Vawiin Mizo zirlai titha chawimawina hunah hian zirlai titha MA, Class - XII 1st. Div. chin mi 17 te hnenah chawimawina thilpek an hlan a, Lai Students' Association (LSA) leh Mizo Students' Union (MSU) hruaituten an telpui bawk.

CADC MNF Sorkar nghet lo leh inthlak zing lutuk duh lohna lan tir nan, CADC District BJP ten kawng an zawh.

 

November 10, 2022: Vawiin khan Chakma Autonomous District Council MNF sorkar chu term khat chhunga in thlak zing lutuk avangin duh lohna lantir nan BJP ten kawng an zawh.

He kawng zawh ah hian, Kamalanagar - I bazar atangin Civil SDO pisa thleng kalin Civil SDO kaltlangin Mizoram Governor hnenah Memorundum an thehlut.

Pu Molin Kumar, BJP Block President chuan thu sawiin, CADC MNF kaihhruai sorkar rintlak an nih loh zia te sawiin CEM in thlak zing lutuk chu sorkar ngelnghet lohna a lantir a, kan duh lo tak zet a ni a ti. Mipui te chuan CADC MNF Sorkar chu thiah nise in thlan that an duh thu an auchhuahpui a, 10th CADC MNF Sorkar chu thiat rawh se, tih leh Governor rule ah dah rawhse tiin an au rual a ni.

Mizoram Governor hnena an thuthlenah hian 10^th CADC MNF Sorkarna nghet lo tak chu thiat turin an ngen a, MNF MDC te hian sorkar ngelnghet siam hi an hlawhchham a, CADC chu Governor thuneihna hmanga Governor rule ah dah a phut bawk a ni.

 

Chakma Autonomous District Council, CEM Dg Buddha Lila Chakma chuan banna a thehlut.

 

November 10, 2022:  Vawiin khan Chakma Autonomous District Council thlasik thut khawm tan a ni a, hetah hian CEM nilai, Pu Buddha Lila Chakma chuan banna thehlutin an pawm.

10th CADC ah hian MNF Party in sorkarna siam mekin hruaitu inthlakna tum 5 a thleng ta a, CEM 6 na an thlang chhuak leh ang. CADC MNF Legislature party te chu CADC Rest house ah thukhawm nghal in CEM thar tur thlanna neih an tum a, amaherawh chu MNF Gen. Hqrs. lam thu nghakin CEM thar tur hi an thlang thei rih lo a ni.

10th CADC hi kum 2018 khan in thlanna neih a ni a, BJP atangin CEM hmasa ber Pu Santi Jiban Chakma chu, Pu Rashik Mohan Chakma MNF in a thlak a, CADC MDC te hi MNF Party ah lut vekin, CEM Pu Rashik Mohan Chakma chu Pu Durjya Dhan Chakma in a thlak leh a, Pu Rashik Mohan chakma chu term khat chhunga CEM tum hnihna a tan thlang lehin reilote ah Pu Buddha Lila Chakma hian a thlak leh a, vawiin khan CEM banta Pu Buddha Lila Chakma chuan CADC Session ah banna a thehlut leh ta a ni.