Hrikai enkawl lai te eitur zawngin an fehchhuak.

August 03, Chawngte: Vawiin khan Chawngte 'P' 4C a hri kai enkawl lai te eitur chawhmeh zawngin YMA Chawngte 'P' Branch a, Section pahnih, Khuangchera Section leh Zampuimanga Section te ram lamah chawhmeh zawngin an fehchhuak a, Mautuai, Tumbu leh chawhmeh dang thahnem tak an la khawm. Chawngte Times zawhna chhangin YMA President, Pu PL. John Maryan chuan, "Section paruk te hi Section pahnih te te a, inkawp in nikhat dan zelah chawhmeh zawn hnatlang hi neih tum a ni" a ti.

Chawngte 'P' Community Covid Care Centre ah hian July ni 5 atangin hrikai enkawl tan a ni a, 4C (LADC Rest House) pakhat ah an len tawh loh avangin Govt. High School chu 4C a hman chhunzawm a ni a, tun dinhmunah hrikai 30 enkawl mêk a ni a, hrikai hmuhchhuah tawh zawng zawng mi 46 atangin mi 16 te chu dam taka chhuahtir an ni tawh bawk.

4C a damlote enkawl na tur hian Chawngte 'P' VLTF hnuaiah 4C management Comt. dah a ni a, Pawl, Kohhran, mimal tlawmngai te thawhkhawm sum atangin enkawlna pek an ni. 4C pahnih enkawl tur hian mi tlawmngai pahnih ve ve dah an ni a, eirawng bawl tura inpe ten mahni inlum chhuah sanin an riak lut bawk.