Chakma Autonomous District Council, Chief Executive Member atan Pu Buddha Lila Chakma lak luh a ni.

June 9, Chawngte: Vawiin khan 10th Chakma Autonomous District Council, Chief Executive Member atan Pu Buddha Lila Chakma chu Lawngtlai Bawrhsap, Pu Amol Srivastava'n rinawmna thu tiam tirin a la lut. 

May ni 9, 2022 a, Chakma Autonomous District Council Budget Session neihah CEM Pu Rashik Mohan Chakma chu rintawk lohna motion pu lutin paihthlak niin, term khat chhunga CEM 5na ni turin vawiin khan Pu Buddha Lila Chakma chu lakluh a ni.

10th CADC hi kum 2018 ah in thlanna neiin CEM hmasa ber, Pu Santi Jiban Chakma chu Pu Rashik Mohan Chakma hian a thlak a, a hnu reilo teah Pu Durjya Dhan Chakma in thlak lehin Pu Rashik Mohan Chakma hian a thlak nawn leh a, hun reilote chhung rorelna fawng vuanin Pu Budhha Lila hian a thlak leh ta a ni.

Pu Buddha Lila Chakma hi 13 Vaseitlang MDC Constituency atang thlantlin niin, CEM nihna te, Chairman leh Executive Member te pawh lo ni tawh a ni a, CADC ah hian CEM tum hnih a nihna tur a ni.

CEM atana lak luh thar Pu Buddha Lila Chakma chuan thu sawiin, Hruaitu hmasa te zahna chibai a buka, sawrkarna tha taka kalpui an tum thu sawiin, hna thawhna tur Budget siam a nih angin eirukna awmlova hma kan sawn theihna hmalak a ni ang a ti. Ṭhangthar ten aia upa te zahna an tlakchham tawh avangin Middle school ah Zirhtawpni apiangin in zirtirna kalpui a ni tawh ang a ti bawk.

CADC ah hian rorellai MNF party chuan member 20 neiin MDC zawng zawng hi MNF vek an ni a, tun term chhungah hian hruaitu in thlakna hi ṭum nga a thleng ta a ni.