Khawtlang hmasawn tur hian dikna leh rinawmna nen khawtlang rawng i bawl ang u. - MLA, C. Ngunlianchunga

September 26, 2022 : Vawiin khan Lawngtlai West Bialtu MLA Pu C. Ngunlianchunga chuan, MLA Fund atanga sak Chawngte 'P' YMA Library a hawng.

MLA Pu C. Ngunlianchunga Fund Rs. 6,00,000/- senga sak YMA Chawngte 'P' Branch Library hawnna ah MLA Pu C. Ngunlianchunga chuan thu sawiin, Khawtlang hmasawnna tur hian dikna leh rinawmna nen khawtlang rawng bawlin, rin tlak leh rah tha chhuah turin hna thawk ila, ruihhlo laka inthiar fihlim in, mahni kut ke a ding thei turin thalaite inbuatsaih ang u. a ti.  Chawngte 'P' khawtlang hmasawnna tur a, Library ṭha tak sak a nih theih leh thawhhona tha tak hmanga sak zawh a nih chu lawmawm a tih thu a sawi bawk. Hemi denchhen hian Chawngte 'P' Branch YLA te thilpek a hlan nghal a ni.

YMA Vice President, Pu K. Lalramenga kaihhruai YMA Library hawnna inkhawmah hian Branch Asst. Secretary, Pu Robert Lalrambuatsaiha'n Technical report a pek danin, YMA Chawngte 'P' Branch Library sak nan hian MLA fund Rs. 6,00,000/- (six lakhs) an dawn thu leh mitlawmngaite tanpuina hrang hrang a vangin Rs. 7,10,655/- sengin sak zawh a ni a ti.