Nungcha, an hming kan hriat, atak hmuh tur awm tawhlo, an hram ri hriattur awm   tawhlo an va tam tawh tak em.

Hman laia pasaltha te chu, Sakap thei, mihuaisen, ral laka khua leh tuite veng him thei te an ni a, zah leh chawimawi pawh a hlawh thin. Pasalthate chu hmeithai leh mi harsa zawkte tan pawh an thlamuanpui thin an ni a, an hming pawh a thang hle thin.

Tun hunah hian sa kap theite hi Pasaltha kan la ti reng em? Sa kap thei te hi Pasaltha nihna hi pek reng tur a ni em?

Pathian thil siam nungchate hi, ram changkang leh hnam ropui tak tak te chuan an humhalh nasa tawh hle a, tih hlum aiin eitur an pe a, silai aiin thlalakna in an veh tawh zawk a ni. Kan mamawh tawka ei leh hman tangkai erawh sawi sel a rem lo a ni mai thei, amaherawh chu mamawh tawk piah lamah kan che tawh in a lang.

Chutih mek laiin Sava inthlah hun laia Silai dah tha a, zahngaihna lantir thin, sava vehtu engemaw zat an awm tawh tih pawh sawi hmaih phal rual a ni lo. Heng mite hi an thian sava veh thinte hian an la entawn ve ngei a beisei awm bawk e.

Kan rinna nena inmil em em, nungchate hmangaiha, kan chenpui theih a va tul tak em. Nungchate hian an himna leh thlamuang taka an awm theihna tur hmun hi an hre thei hle a, kan khawlaiah hian thlamuang taka sava te an awm theih hun a nghahhleh awm tak zet a ni.