CADC Inthlanpui neih tura Bial 20ah chuh tuma hming pelut 76 an awm.

April 25, 2023: Chakma Autonomous District Council Inthlanpui vawi 11na chuhtum hming pelutte chu Lawngtlai bawrhsap, District Election Officer nibawk, Pu David Lalthantluanga hoin vawiin khan endik a ni a, bial 20 ah Candidate chuh mi 76 an awm. Heng zingah hian mi pahnih te hi stanby niin INC atangin 18-Fultuli leh 16-Damdep bialah hming an pelut a ni.

Tuntum CADC inthlanpuia chuhtum hming pelut zingah MDC la ni ngailo mi 50 awmin MDC ni a, CEM, EM leh nihna pawimawh lo chelh tawh mi 26 an awm bawk.

MDC Term nga leh MLA lo ni tawh Pu Rashik Mohan Chakma chu 1-Borapansury ah MNF Tiket in a ding dawn a, MDC la ni ngailo mitharte, INC atangin Rustom Chakma te, ZPM atangin Prassanna Kumar Chakma te, BJP atangin Jupiter Chakma te nen an ding dawn a ni.

6-Kamalanagar South ah hian Minister lo nitawh leh politics a tawnhriat ngah tak, Pu Nirupam Chakma chu BJP Tiket in a ding dawn a, MNF lamin CADC Chairman lo ni tawh H. Amaresh Chakma dah in, INC lamin D. Jonjil Chakma leh ZPM lamin Subha Baran Chakma an din tir bawk a ni.

Tin, 18-Fultuli bialah hian CEM, Chairman leh nihna pawimawh hrang hrang chelh a, MDC Term 5 zet lo ni tawh Pu Kalikumar Tongchangya chu MNF tiket in a ding dawn a, hetah hian MDC la ni ngailo, mithar INC atangin Bijuram Tongchangya leh  BJP atangin Pankaj Tongchangya te a ding ve dawn bawk a ni.

11th CADC inthlanpuiah hian hundang ang lo takin Party pathum MNF, BJP leh INC te chuan bial awm zawng zawng an chuh vek a, INC hian 16-Damdep bial leh 18-Fultuli bialah Standby an dah bawk a, ZPM Party in bial 13 ah an chuh bawk, Independent candidate 1 awmin 6-Kamalanagar North bialah a chuh dawn a ni.

Inthlanna a chuh tum hming pelutte vawiina endiknaah hian endikna paltlang zolo an awm lova, inthlannaah an chuh thei vek dawn a ni. Heti hian CADC a bial 20 ah candidate 74 an awm dawn a, an mahni duhthlanna ngeia inhnuhdawhna hun hi April ni 27 chhun dar 12 thleng hawnsak an ni thung.