Chawngte ah India Independence Day ropui taka lawmna neih a ni.

 

August 15, 2024: Vawiin khan India ram zalenna ni vawi 78na chu ropui taka lawmna hun Chawngteah hman a ni a, MLA leh CEM, CADC ni bawk, Pu Rasik Mohan Chakma chu khuallian niin ram puanzar a pawtpharh.

 

Independence day lawmna pual hian khuallian Pu Rasik Mohan Chakma hian zing karah Chawngte CHC ah damlo te kanin thilpek a hlan a, Executive Member Pu Montu Chakma, MDC Pu RD. Sangzela leh Pu Santosh Chakma, leh SDO (C) staff ten an tawiawm.

 

Chawhma dar 8:30 khan Chawngte ‘C’ khelmualah lawmna hun hman niin Khuallian Pu Rasik Mohan Chakma chuan ram puanzar pawt pharhin, NCC Unit leh School contingent sawmpahnih te hman puanzar chibai buk a chhang let a ni.

 

Khuallian chuan thu sawiin, India ram zalenna sualtu, Mahatma Gandhi, Pt. Jawaharlal Nehru, Netaji Subhas Chandra Bose, Bhagat Singh leh midangte pawh sawiin Independence hnu lama hmathlir neitute thawhhlawkzia a sawi bawk a, India ram chu khawvel ram chak takah a chantir thei a ni. A bik takin Dr. B.R. Ambedkar chu ram chhunga hnam hnuaihnung leh hnam tlem zawkte chakna pe thei tur constitutional framework nghet tak siam tura a thawhhlawk avangin lawmthu a sawi. Kum 2023-2024 chhunga CADC hlawhtlinna hrang hrangte a tarlang bawk a, zirna, infrastructure, leh social welfare lama hmasawnna te bakah Chawngte Sub-Division-a hmasawnna hna thawh mekte a tarlang bawk.

 

Vanduaithlak takin march past a tel school naupang engemaw zat chu Ni sa avanga harsatna tawkin an tlu a, an zinga mi 23 te chu CHC pan pui nghal an ni a, dinhmun thalo leh ngaihtuahawm erawh an awmlo tih damdawiin thuneitute hnen atangin The Chawngte Times chuan thu a dawng a ni.

 

Vawiina I-Day lawmnaah Art & Culture Department CADC, Central Chakma Mahila Samiti, Branch YMA Chawngte-P, leh school thenkhat atangin lam hmuhnawm tak tak thlir a ni a, tlai lamah CAFA te huaihawtna hnuaiah Football final hmuhnawm tak thlir a ni bawk a, Chawngte ‘P’ FC ten kum 2024 I-Day Football Tournament a champion No pui an dawng bawk a ni.