JOINT NGO CHAWNGTE IN MIZORAM SORKAR ATANGA THU LAWMAWM AN HRIATLOH CHUAN INDEPENDENCE DAY BOYCOTT AN TUM

August 10, 2024: Vawiin khân Joint NGO Chawngte chuan Community Service Center, Chawngte 'P' ah join meeting neiin, Chawngte CHC leh Police Station a thawktu leh an mamawh dangte dahbelh sak tûra an ngenna leh, Chawngte khawchhung kawng siam chungchâng sorkar hnêna an thlen chungchanga hmalâk zêl dân tur an sawiho a ni.

Joint NGO Chawngte meetingah hian Joint NGO kaihruaitu tur Chairman, Secretary leh Treasurer te ruat thar an ni. Chairman atân Tv. Joseph Lalchhingpuia, Secretary atân Tv. Steven Lalramtluana, Treasurer atân Pu Sadan Bikash Chakma te chu ruat an ni.

He meeting ah hian Chawngte khawtlâng mamawh sorkara an thlen chungchang report ngaihthlâk ni in, Home Department aṭanga Police 8 Chawngte Police Station  ah dahbelh sak an nih thu ngaihthlâk a ni. PWD Minister hnêna Chawngte khaw chhung kawng chungchang an thlen pawh duhthusam a sorkar aṭanga hmalâkna a awm loh thu leh,  Health Minister hnêna an thlen, CHC, Chawngte a thawktu leh hmanraw dang indaihlohna chungchangah pawh hmalâkna duhthusam ala awmloh thu sawiin, an mamawh an thlen angte hlawhtlinna Ni 13 August thlenga an la hmuhloh chuan, Chawngte hmunah bîk kumin 2024 Independence Day chu Boycott tlang ni se ṭha an ti a ni.

Joint NGO Chawngte chuan Dt.18 July, 2024 khan Press Conference-ah Mizoram sorkar hnêna an khawtlângin an mamawh chi hrang hrang an thlen chungchangah, Dt.13.8.2024 thleng an ngaihchân tûr thu an lo sawi tawh a ni.

Joint NGO Chawngte chuan, India khua leh tui an nihna anga an basic necessities Mizoram sorkara an thlente Dt.13 August, 2024 tlai Dar 5:00PM hma a, a lehkha mai nilo, ataka tih hlawhtlin anih loh chuan, Independence Day hi boycott ni se tih meeting ah an rel a ni.

Joint NGO Chawngte ah hian Chawngte khua NGO lian zual YMA Branch leh Group, YLA Branch leh Sub Headquarters, CYCA, LDSA, MCSU, MSU, MZP, Central Chakma Mahila Samiti bâkah Chawngte 'P' Ṭhalai Pawl te an tel a ni.