Union Minister of State Pu Nityanand Rai chuan Chakma Autonomous District Council tlawhin CADC hotute leh khawtlang hruaitute kawmna a nei.

 

April 09, 2025: Vawiin khan Union Minister of State for Home Affairs Pu Nityanand Rai chuan Chakma Autonomous District Council tlawhin CADC hotute leh khawtlang hruaitute a kawm a, CADC Executive member Pu Sanjeev Chakma sunna hun a hman pui.

 

Union Minister of State Pu Nityanand Rai hi CADC Rest house ah CADC sawrkar mi pawimawh ten lo dawng sawngin, CADC dinhmun in hrilhhriat nan hun an hmang ho a, CADC Secretariat Building thar sak zawh loh te, inkawlphawhna kawngpui tha an neih loh thute leh Health Facility an neih that tawk loh thu te sawi lan a ni a, CADC hi Indo Bangla Border a awm an nih angin India ram tan hmun pawimawh leh ngaihven ngai an nih thu CADC hotute hian an sawi bawk a, Tlawmngai pawl hruaitu, Central YCA, Central Mahil Samiti leh Chakma zirlai pawl te nen inkawm hona hun an nei bawk.

 

Pu Nityanand Rai chuan  harsatna hrang hrang a hnena an thlen ziaka a dawnte chu sawrkarlaipui hnenah a thlen tur thu a sawi. Union Minister for State chuan India ram chu 'Developed Nation' a siam turin Sawkarlaipuiin theihtawp a chhuah tih tarlangin, a bik takin One Nation One Ration Card, New Education Policy 2020, inkalpawhna leh Hriselna (health)  ah te  'Flagship Scheme'  pawimawh tak tak duanchhuah leh kalpui mek  a ni, a ti.

 

Union Minister of State chuan  Prime Minister- in  Hmarchhak State-  te a ngaipawimawh hle tih sawiin, Hmarchhak State ten hmasawnna tluantling an neih phawt chuan India Ram hi 'Developed Nation'  ah siam a ni ang, a ti. Pu Nityanand Rai chuan Autonomous District Council pathumte tan sawrkar laipuiin theihtawp a chhuah zel dawn a ti a. Myanmar leh Bangladesh nena ramri nei vek an nih bawk avangin, ramri venhim kawngah pawh theihtawp a thawkho turin a chah a. Pu Nityanand Rai chuan India khua leh tui an nihna hrechianga, ram leh hnam hmasawnna tura theihtawp chhuah fo thin turin a sawm nghal bawk.

 

Pu Nityanand Rai hian CADC BJP office a tlawhin CADC MDC ni lai pahnih Pu Mohan Chakma - Parva MDC Constituency, Pu Santosh Chakma - Ajasora MDC Constituency leh Bijuram Tongchangya te chu BJP Party ah a lawmlut a, hemi hnuah CADC Executive Member nilai Pu Sanjeev Chakma, ruang chungah pangpar dahin sunna hun an hmang a ni.

 

Pu Nityanand Rai, Union Minister of State for Home Affairs hi Pu Devesh Kumar, Bihar MLA leh Mizoram BJP President Pu Vanlalhmuaka’n an tawiawm a, vawiin vek khan Aizawl lam panin an chhuak leh nghal a ni.