Chawngte 'P' Village Council By-Election tur atan vawiin khan mi pali in hming an pelut.

November 12, 2026 : Lawngtlai District, Chawngte 'P' Village Council By-Election neih turah chuh tum hming pekluh hun tawp ni thlengin hming pelut pali an awm.

Chawngte 'P' Village Council ah hian VC Member pasarih awmin member Pakhat boral avangin By-Election neih tura ruahmanna siam a ni a, State Election Commission chuan inthlannaa chuh tum tan hming pek luh hun tawpna a ruatah mi pali ten hming an pe lut a ni. Hming pelut zingah Independent Pakhat awmin ZPM, MNF, leh INC party aiawh ten hming an pe lut a, Political Party ah BJP in an chuh dawnlo niin a lang.

VC By- Election neih tur atan hian November ni 5, 2026 khan State Election Commission chuan hriattirna a tichhuak tawh a, Nomination hi November ni 12,2026 tlai dar 3:00 PM thleng file theih a, hming pelutte hian November ni 16, tlai 3: 00 PM thleng inhnuhdawkna hun an nei. December ni 8, 2026 zing dar 7:00 AM atanga tlailam dar 4: 00 PM chhungin vote thlak a ni anga, December ni 8 ah vote tlate hi chhiarfel nghal a ni ang a, A tul a nih chuan Re-Poll hi 9th December, 2026 7:00 AM - 4:00 PM ah neih a ni dawn a ni. December ni 14, 2026 ral hmain Executive Body hi siamfel tawh tur niin, 15th December,2026 hian Election Process hi zawhfel a ni ang.

VC By- Election hi khua pakua- 1- Chawngte 'P', 18- Saikah 'L',   29- Saikhawthlir,  33- Vaseikai,  41 - Ngengpuitlang,  60- Bolisora, 61- Mautlang, 65-Kawngkhua leh 96- Saibawh II ah te   VC Seat- 11 ah nei a ni dawn a ni. Khaw pakua zingah hian 61- Mautlang ah Seat - 3 awmin, a dang zawngah hian seat - 1 theuhah By - election neih tur niin,65-  Kawnkhua hi Hmeichhia chauh thlanna tur (Reserved Seat) a ni.