Chakma Autonomous District Council kum 50na Golden Jubilee ropui takin an hmang.

April 29, Chawngte: Vawiin khan Chakma Autonomous District Council kum 50na Golden Jubilee lawmna Baganpara Helipad ah ropui takin an hmang.

Chakma Autonomous District Council Golden Jubilee lawmnaah hian Khuallian, Mizoram Lagislative Assembly Speaker, Pu Lalrinliana Sailo niin, CADC Chairman, Pu Budha Lila Chakma in a kaihhruai a, CADC a din theih nana sulsutute zahna chibai bukin, CADC lo kaihruai tawhtu mualliam tawhte an hre reng a ni a ti.

Khuallian Speaker, Pu Lalrinliana Sailo chuan Jubilee lawmna puanzar pawt pharhin Balloon a thlawh chhuah tira, ram hruaitute leh mipui kal khawmte Jubilee chibai a buk bawk. thu sawiin, Speaker, Pu Lalrinliana Sailo chuan, "Sawrkar fawng vuantu leh tlawmngai pawlte ṭha taka thawkhoin, Corruption awm lohna ramah siam ula, CADC a cheng hnam hrang hrang, Chakma, Bawm, Tlanglau, Pang, Bru te pawh hleibik nei lova thinlung hmunkhat puin cheng ho turin a duhthu a sawi a ni. Ram leh hnam hruaina kawnga tlawmngaipawl ten CADC sawrkar chu ṭha taka thawhpuiin Corruption a awmloh nan NGO te chu inrawlh ṭhin turin a fuih a, ruihhlo dona kawnga chak taka hma an lak theih nan Central YCA te chu Rs. 50,000/- a hlan bawk a ni.

CADC Chief Executive Member, Pu Rashik Mohan Chakma pawhin thu sawiin, "Kan ram leh hnam tana thawktu kan hruaitu hmasate thinlung takin chibai ka bûk a, he kan ram hmasawnna tur hian ram mipuite  tha taka thawk ho turin a chah.

Vawiin a CADC Golden Jubilee lawmna program-ah hian an pi leh pute hun laia Chakma te khawsakzia leh tunlai tak tak te entir a ni a, buh leh bal an thar chhuah dan leh an sawngbawl dan te, an hunpui Bizu an hman thin dan leh La an kaih dan te leh sakhuana an kalpui dante an entir bawk a ni.

He hunah hian MLA, Pu Nihar Kanti Chakma leh Tuichawng bialtu MLA, Dr. BD Chakma te telin, Mizoram pawna Chakma mipawimawh tak tak ten an rawn hman pui bawk a ni.

India ram dan pui Sixth Schedule hnuaiah kum 1972 khan Chakma Autonomous District Council hi din tan a ni a, Lawngtlai District chhunga awmin CADC hi 686.25 square kilometre a zau a ni a, kum 2011 Chhiarpuiah khan Mipa 23457 leh hmeichhia 21850 awmin an vaiin mi 45307 awma chhinchhiah an ni. Chakma hman tam zawk hi Buddhism chu an rinna innghahna a ni.