Chawngte hi hnam hrang hrang, ze chi hrang hrang awmkhawm kan ni a, khawtlang inrelbawlna lamah pawh lui tuia daidang kan nih ang bawkin inenkawlna hran nei kan ni bawk a, chu chuan rilru sukthlek danglamna tam tak a awm thei.

Inpumkhatna tha leh tlo kan neih a tul hle a, hemi tur hian thil pawimawh tam tak a awm; in hriatthiam tawnna leh rilru zau tak kan put tlan a tul a, thu bul hre lem lova buaina punlun zawnga khawsa kan awm hian inpumkhatna a ti chhe thin a ni. Veng leh hnam hrang nimah ila khaw khata awm kan ni a, nitin khawsak a in mamawh tawn kan nihna hi a reh dawn hek lo; vawiinah in au el ila, naktukah in mamawh tur kan ni leh a, hreawm ti tur chu keimahni bawk kan ni. Heng zawng zawng ngaihtuah chunga harsatna leh ngaihdan in an loh chang a awm pawhin in hriatthiam tawnna neia ngaidamtu leh tlawm zawkah kan tan thiam a tul tak zet a ni.

Kan khawpui hi nuam taka siam theitu chu a chhunga chengte kan ni a, tawng chi hrang hrang hmang tamna khuaah chuan khawpui nuam tak a ni an tih theih nan in pumkhatna vawng nung zel ang u.