Chakma Autonomous District Council inrelbawlna chu Lawngtlai Bawrsap kutah dah a ni.

December 17, 2022: Chakma Autonomous District Councila Chief Executive Member Buddha Lila Chakma in CEM a nihna atanga a inhnuhdawhna chu Larsap Hari Babu Kambampati chuan pawmin,  CADC inrelbawlna te chu Nimin khan  Lawngtlai Bawrhsap kutah a dah.

Mizoram Sawrkara District Council & Minority Affairs Department in nimina thuchhuah a siamah , Chakma Autonomous District Councila CEM ni lai Pu Buddha Lila Chakma in banna a theh luh chu Mizoram Larsap  in a pawm thu a tarlang  a. Buddha Lila Chakma in banna a thehluh rual hian Rasik Mohan Chakma chuan CEM dinhmun a luah theih thu hriattir mahse, Larsap  chuan CADC a sawrkar ngelnghet lo tak chu a huam chhunga mipui tan thil pawi thei nia a hriat avangin Lawngtlai Bawrhsap kutah thlaruk chhung rorelna a nghah thu  thuchhuah ah tarlan a ni. 

CADC chuan hnathawktu lak dan mumal a neih loh avangin Sixth Schedule inkaihhruaina dan bawhchhiatna a tam hle tih District Council & Minority Affairs  thuchhuahah tarlan a ni a, kawng hrang hranga ngaihtuah a nih hnuah Larsap chuan CADC chu 6th Schedule inkaihhruaina angin a kal thei lo nia  a hriat  thu tarlan a ni bawk. 

Hetiang a nih avang hian Larsap  chuan thuneihna a neih angin  CADC a inrelbawlna te chu Lawngtlai District Deputy Commissioner kutah dahin, thuchhuah a nih  atangin he mawhphurhna hi Lawngtlai DC kutah dah nghal a ni.

Chakma Autonomous District Council  inthlanpui hnuhnungber hi 2018 khan neih a ni a, BJP atanga  CEM hmasa ber Pu Santi Jiban Chakma chu, Pu Rashik Mohan Chakma MNF in a thlak a, CADC MDC te hi MNF Party ah lut vekin, CEM Pu Rashik Mohan Chakma chu Pu Durjya Dhan Chakma in a thlak leh a, hemi hnu hian Pu Rashik Mohan chakma chu term khat chhunga CEM tum hnihna ni tura thlan leh niin reilote ah Pu Buddha Lila Chakma hian a thlak leh a, Pu Buddha Lila Chakma hian November ni 10, 2022 ah banna thehlut lehin Mizoram Governor hian a pawm sak ta a ni.