MLA Dr. BD Chakma chuan vawiin khan Active Politics chawlhsan a tum tih a puang.

 

July 07, 2023: Chakma Autonomous District Council BJP President leh MLA ni bawk Dr. BD Chakma chuan vawiin khan Kamalanagar BJP Office ah Special Session kohin Party mipuite hnenah Politics a chawlhsan tur thu a puang.

Dr. BD Chakma chuan Kum 50 ka tlin hunah Active Politics chawlhsan turin Term hmasa congress a ka awm laiin ka lo sawi lawk tawh a, chuvangin tun MLA Term kan hman zawh chuan Politics a tangin ka chawl tawh dawn a ni, inthlan kan hmachhawh lehna turah MLA emaw MDC emaw pawh nise inthlannaah ka chuh ve tawh dawn lo a ni a ti. Chawngte Times zawhna chhangin, BJP Party-ah chuan ka la awm reng dawna amaherawh chu Party a nihna erawh ka bansan anga, kumin August thla chhungin ka aiawh tur President tha leh chak tak lo ruat sela a hnenah lungawi takin charge ka hlan dawn a ni a ti.

Dr. BD Chakma hi kum 2008 CADC MDC inthlanpuiah khan Borapasury-II MDC Constituency-ah Congress Party a thlantlin niin Politics-ah a lut tana, Executive Member niin, Department pawimawh tak tak a lo enkawl tawh a, Kum 2013 ah MDC ah thlantlin ni lehin, CADC Chief Executive Member nihna a chelh a, hemi kum vek hian MLA inthlanah Tuichawng Assembly Constituency atangin Congress Party candidate a thlantlin niin, Minister Of State chanvo a lo vuan tawh a ni. Kum 2018 MLA inthlanpuiah khan Tuichawng bial atangin BJP Candidate niin thlantlin a ni leh a, tun a MLA a nih mekna hi Politics khawvel a chhuahsanna tur a lo ni ta a ni.

Vawiina Special Session an neihah hian BJP National Council Member, leh CADC MDC ni bawk, Pu Nirupam Chakma te, CADC BJP Vice President, Pu Amar Smriti Chakma leh CADC BJP Treasurer Pu Purna Muni Chakma ten thu an sawi bawk.