Chawngte khawchhung kawng chhiat a vanga lungawilohna lantir nan vawiin khan Chawngte a Mizo leh Chakma tlawmngai pawl hrang hrang ten kawng an zawh.

 

September 4, 2023: Chawngte a Mizo leh Chakma tlawmngai pawl hrang hrang intel khawm chuan Chawngte khawchhung kawngpui chhiat avanga lungawi lohna lantir nan vawiin khan kawngzawh a ni a, mi 500 chuangin kawngzawhah hian an tel.

 

Chawngte football ground atanga SDO office thleng kawngzawhnaah hian pawl hrang hrang aiawh ten thu an sawi a, Chawngte hi kawng hrang hrangah ngaithah kan ni a, kawng chungchangah kan chan tur leh a nih dan tur ang kan ni phalo fo thin a ni, Mizoram sorkar hian kan dinhmun harsat zia hi hria se, min ngaihsak ve se kan duh a ni an ti. Tin, kan khawtlang thatna tura hmalak hi NGO te chauh hi a mawhphurtu kan nilova, CADC sorkar pawh hian theih tawp chhuah ve rawh se, kawng siam tha tur hian CADC hian hma anla tawk lo em ni tih hi kan zawhna a ni an ti.

 

Vawiin kawngzawhah hian, Chawngte khaw chhung kawng chhe lutuk hi Mizoram sorkar hian siam tha vat rawhse, tih te, Chawngte kawng siamtha tur hian Mizoram leh CADC Sorkar in hma laturin an phut thu te, ngaihthah bik nihna an duh loh thu an auchhuah pui a, ‘No road, No vote, No election’ tih thuziak te an keng tel bawk.  

 

All NGO kal khawmte chuan Mizoram sorkarah Chawngte SDO (C) kaltlangin vawiin khan memorandum an thehlut nghal a, Chawngte Civil SDO, Pu Lalneihthanga Colney chu Election thila training a neih lai a nih avangin SDO charge latu, Pu Samar Bijoy Chakma in Civil SDO aiawhin memorandum hi a dawng a, Pu Samar-a hian tlawmngaipawl hruaitute hnenah he memorandum hi Lawngtlai DC office ah thawn nghal a ni ang tiin thuin a hriattir bawk.

 

Vawiina All NGO ten Memorandum an theh luhah, kawngpui chhiat avanga Chawngte mipui harsatna tawh mek tarlangin, School leh College Zirlai ten nitin zirna in an pan laiin harsatna an tawk reng a, chhungkaw hrang hrang eizawnna leh lirthei hmanga eizawng te pawhin harsatna an tawk reng bawk a, chuvangin Mizoram sorkar leh CADC sorkar hian kan kawngpui hi siam that a nih theih nan chak takin hma la turin an duh thu an tarlang a, All NGO hruaitu te chuan Sorkara kan thu thlen hi September 9, 2023 (zirtawp ni) thleng pawha hmalakna kan hmulo a nih chuan a tawp thlengin hma kan la zel dawn a ni an ti.