Bank a awm thei dan tur endik tur in Chawngte Civil SDO a kal.

Lawngtlai District CADC Area a, Borapansury leh Longpuighat ah Bank dah tumna awm chu Chawngte Civil SDO, Dr. Manesia Khaimeichho chuan thawhtanni khan a hmunah a en fiah. 

Chawngte Civil SDO hi Village Council leh khawtlang hruaitute, sawrkar mi pawimawh tak tak ten lo dawng sawng in Bank awm theihna tur building hrang hrang a hmunah an enpui.

SDO (C) Dr. Manesia Khaimeichho chuan, Borapansury leh Longpuighatah te hian bank an neih ngei theih nan duhsakna a hlan a, Report a lan angin Longpuinghat Area ah hian CADC lamah khaw 49 leh LADC lamah khaw 17 an awm a, In 5903 ah mi 26059 an cheng a, zirna in Primary atanga Higher Secondary thleng 18 a awm a, Sorkar pisa hmun pawimawh tak tak a awm bawk.

Borapansury Area ah hian khaw 18 awmin, mi 15619 an cheng a, sorkar pisa pawimawh tak tak a awm ni a tarlan a ni.

Civil SDO leh BDO ni bawk, Dr. Manesia Khaimeichho chuan Borapansury leh a area Village Council hruaitute kawm nghal in, MGNREGA hnathawh chungchangah harsatna an neihdan te a sawipui a, Network athat loh avangin hna thawhna thlalak an upload theih loh avanga harsatna an tawh thin thu an sawi.